Li akʼ bʼich re xkʼebʼal xloqʼal li Jehobʼa
1 Saʼ 4 re Octubre 2014 ebʼ li wankebʼ Watch Tower Bible and Tract Society of Pennsylvania keʼxbʼaanu jun li chʼutam li nabʼaanumank jun sut ajwiʼ chiru li chihabʼ. Saʼ li chʼutam aʼin kiyeemank naq ttzʼilmanq rix li qabʼichlebʼaal. Xsahoʼk qachʼool naq xqabʼi aʼin. Kiyeemank ajwiʼ rehebʼ chixjunilebʼ naq ebʼ li bʼich naxkʼe xloqʼal li Yos (Sal. 96:2).
2 Abʼan, kʼaʼut naq ttzʼilmanq rix wiʼ chik li qabʼichlebʼaal? Wank wiibʼ oxibʼ xyaalal. Li xbʼeen xyaalal, anaqwan naqataw ru chiʼus ebʼ li raqal li Santil Hu, joʼkan naq maare tjalmanq li naxye wiibʼ oxibʼ rehebʼ li bʼich (Prov. 4:18). Ut li xkabʼ xyaalal, saʼ xkʼabʼaʼ naq saʼ naabʼal chi aatinobʼaal yook chi tzʼilmank li Santil Hu Traducción del Nuevo Mundo, maare tjalmanq wiibʼ oxibʼ li aatin li wank saʼ li qabʼichlebʼaal li xʼisimank chaq saʼ li Santil Hu li yooko roksinkil. Ut, saʼ xkʼabʼaʼ naq maare tjalmanq naabʼal li raqal malaj li aatin li wank saʼ li qabʼichlebʼaal, xkʼoxlamank naq twanq ajwiʼ li akʼ bʼich.
3 Ma toj tqoybʼeni naq teʼrisi chi huhil li bʼichlebʼaal re naq tooruuq roksinkil li akʼ bʼich? Inkʼaʼ, xbʼaan naq chiruhebʼ li po li xchalk chiqu tkʼemanq saʼ jw.org wiibʼ oxibʼ rehebʼ li bʼich aʼin. Naq ak kʼebʼil jun li akʼ bʼich, tqabʼicha saʼ jun rehebʼ li qachʼutam Tzolok chirix li Xkʼanjel li Yos abʼan toj saʼ raqik. Chiru li xamaan aʼan ttawmanq xkʼabʼaʼ li bʼich ut chixkʼatq wanq li aatin: «akʼ bʼich».
4 Chanru tqatzol li akʼ bʼich. Wank sut chʼaʼaj xtzolbʼal junaq li bʼich. Usta joʼkan, laaʼo naqaj xkʼambʼal qe rikʼin jun rehebʼ laj bʼichanel naq kixye: «Tinbʼichaanq re aaloqʼoninkil, at qaawaʼ Dios. Inkʼaʼ naru ninkana chi inkʼaʼ tinkʼe aaloqʼal» (Sal. 30:12, Wy). Li wiibʼ oxibʼ chi naʼlebʼ li wank taqʼa tooxtenqʼa chi xtzolbʼal li akʼ bʼich ut xbʼichankil chi anchal qachʼool.
Qabʼihaq naabʼal sut li akʼ bʼich naq wanq saʼ jw.org. Chi joʼkan tqatzol saʼ junpaat.
Qayehaq li naxye ut qaxokaq saʼ li qakʼaʼuxl.
Qabʼichaq naabʼal sut ebʼ li bʼich toj reetal t-elq chiʼus chiqu.
Qabʼichaq naq tootzoloq saʼ junajil re naq li qajunkabʼal truuq xbʼichankil.
5 Chiru ebʼ li po li yookebʼ chi chalk twanq xbʼichankil junaq li akʼ bʼich saʼ raqik li chʼutam Tzolok chirix li Xkʼanjel li Yos, xbʼeenwa li chʼuut yal trabʼi xyaabʼ li bʼich. Ut chirix chik aʼan teʼoq chi bʼichank joʼ nabʼaanumank chi rajlal.
6 Jwal oxloqʼ bʼichank saʼ li chʼutam xbʼaan naq aran naqajunaji xyaabʼ li qakux re xkʼebʼal xloqʼal li Jehobʼa. Joʼkan bʼiʼ, miqabʼaanu junaq chik li naʼlebʼ naq yooqo chi bʼichank saʼ li chʼutam.
7 Kʼaru chik tento tqabʼaanu re xkʼutbʼesinkil naq oxloqʼ chiqu bʼichank chiru li Jehobʼa? Saʼebʼ li nimla chʼutam naq ak tiklaak re li chʼutam xbʼeenwa naʼok chi eekʼank xyaabʼ li bʼich. Ebʼ li hermaan li nekeʼchalk saʼ jalan jalanq chi tenamit saʼ chixjunil li Ruuchichʼochʼ nekeʼxkʼe xqʼe chi xyiibʼankil chixjunil xyaabʼ li bʼich li t-oksimanq re xloqʼoninkil li Jehobʼa. Ebʼ li hermaan aʼin wiibʼ sut chiru li chihabʼ nekeʼxik Patterson (Nueva York), ut aʼanebʼ ajwiʼ nekeʼxtoj xpasaaj re wulak. Joʼkan bʼiʼ, naq laj bʼeresinel chʼutam naxye qe naq tqasikʼ qanaʼaj ut tqabʼi xyaabʼ li bʼich li kʼubʼanbʼil, tento tqabʼaanu saʼ junpaat. Aʼin tixbʼaanu naq tqakʼul chi anchal qachʼool li naʼlebʼ li ok qe rabʼinkil (Esd. 7:10).
8 Saʼ raqik li qachʼutam re anaqwan tqabʼicha jun li akʼ bʼich li tixkʼabʼaʼi «Chalkaq li Awabʼejilal li kʼojobʼanbʼil xbʼaan li Yos!». Li bʼich li kiʼoksimank saʼ li chʼutam li kiwank saʼ li 4 re Octubre, kiyiibʼamank re xnimankil li jun siʼeent chihabʼ rokik chi jolomink li Xʼawabʼejilal li Yos
9 Li akʼ bʼich aʼan jun rehebʼ li chaabʼil maatan li naxkʼe qe li Jehobʼa (Mat. 12:35a). Qakʼehaq qaqʼe chi xtzolbʼal li junjunq chi bʼich re naq tqabʼicha chi anchal qachʼool. Ut chi joʼkan tqanima li Yos xbʼaan naq wank xkʼulubʼ naq tqakʼe xloqʼal (Sal. 147:1).