Oksi li tasal hu Sahaq laachʼool! re xkawresinkil xpaabʼalebʼ chirix li Jehobʼa ut li Jesús

Ebʼ li nekeʼxtzol li Santil Hu aajel ru naq teʼxkawresi li xpaabʼal re naq teʼxsahobʼresi xchʼool li Jehobʼa (Heb 11:6). Li tasal hu Sahaq laachʼool! nokooxtenqʼa re naq toowulaq saʼ xchʼoolebʼ. Chisaʼ wank xraqal li Santil Hu, naxchʼolobʼ chiʼus li naʼlebʼ, wank li chaabʼil patzʼom, wank chʼinaʼus eetalil ut ebʼ li bʼideo. Wi tqatenqʼa li yookebʼ chi tzolok re naq tchaabʼiloʼq li xnaʼlebʼebʼ ut re naq teʼwanq choʼq ramiiw li Jehobʼa, qʼaxal kawaqebʼ li xpaabʼal (1Co 3:12-15).

Wankebʼ nekeʼxkʼoxla naq inkʼaʼ teʼruuq chi wank joʼ ramiiw li Yos xbʼaan naq inkʼaʼ nekeʼril ru. Joʼkan naq aajel ru naq tqatenqʼahebʼ chi xnawbʼal ru chiʼus li Jehobʼa ut naq teʼxkʼojobʼ xchʼool rikʼin.

NAQ AK XAAWIL LI BʼIDEO KAWRESI XPAABʼALEBʼ CHIRIX LI JEHOBʼA RIKʼIN LI HU «SAHAQ LAACHʼOOL!», TAASUME EBʼ LI PATZʼOM AʼIN:

• Chanru naqanaw naq li hermaan kixkawresi ribʼ chiʼus re xkʼebʼal li tzolom?

• Kʼaru chik li patzʼom kixbʼaanu li hermaan re naq li yook chi tzolok tixye li naxkʼoxla chirix Isaías 41:10, 13?

• Kʼaru kirekʼa naq kiril li bʼideo ut li xraqal li Santil Hu?

Naabʼalebʼ inkʼaʼ nekeʼxtaw ru kʼaʼut naq li Jesús kixkʼe li xyuʼam saʼ qakʼabʼaʼ malaj inkʼaʼ nekeʼril joʼ jun li maatan li naxkʼe li Yos (Gál 2:20). Joʼkan naq tqatenqʼahebʼ re naq kawaqebʼ xpaabʼal chirix li xkamik li Jesús.

NAQ AK XAAWIL LI BʼIDEO KAWRESI XPAABʼALEBʼ CHIRIX LI JESÚS RIKʼIN LI HU «SAHAQ LAACHʼOOL!», TAASUME EBʼ LI PATZʼOM AʼIN:

• Chanru naqanaw naq li hermaan kixkawresi ribʼ chiʼus re xkʼebʼal li tzolom?

• Chanru kiroksi li tasal «Sikʼ xkomon li naʼlebʼ» re xtenqʼankil?

• Kʼaʼut naq qʼaxal wank xwankil li tijok choʼq re li naxtzol li Santil Hu?