QAYU‘AM JO‘ AJ PAAB‘ANEL
Li Jehobʼa nokooxtenqʼa xkuybʼal ebʼ li aaleek
Saʼebʼ li qakutan, chiqajunilo naqanumsi ebʼ li chʼaʼajkilal. Maare wank sut naqakʼoxla naq inkʼaʼ chik tooruuq xkuybʼal. Abʼan, wi naqasikʼ li xtenqʼ li Jehobʼa tooruuq xkuybʼal ebʼ li chʼaʼajkilal (Is 43:2, 4). Wi yookat xnumsinkil junaq li chʼaʼajkilal, kʼaru ttenqʼanq aawe re naq tatjiloq chixkʼatq li Jehobʼa?
Li tijok. Wi naqate qachʼool chiru li Jehobʼa, aʼan tixkʼe qe li tuqtuukilal ut li metzʼew re xkuybʼal (Flp 4:6, 7; 1Te 5:17).
Ebʼ li chʼutam. Anaqwan, aajel ru naq tqakawresi li qapaabʼal ut naq ebʼ li qechpaabʼanel nekeʼxwaklesi qachʼool (Heb 10:24, 25). Naq naqakawresi qibʼ, nokoowulak ut nokootzʼaqonk saʼebʼ li chʼutam, naqoksi chiʼus li tenqʼ li naxkʼe li xsantil musiqʼej li Jehobʼa (Ap 2:29).
Li puktesink. Wi naqabʼaanu chixjunil li wank saʼ quqʼ re wank saʼ li puktesink moko tchʼaʼajkoʼq ta chiqu xkʼoxlankil ebʼ li chaabʼil naʼlebʼ. Joʼkan ajwiʼ li qamiiwil rikʼin li Jehobʼa ut ebʼ li qechpaabʼanel nakawuuk xbʼaan naq nokookʼanjelak rochbʼenebʼ (1Co 3:5-10).
NAQ AK XAAWIL LI BʼIDEO LI JEHOBʼA TATXTENQʼA, TAASUME EBʼ LI PATZʼOM AʼIN:
Kʼaru kitenqʼank re li xMalu re naq inkʼaʼ tnajtoʼq rikʼin li Jehobʼa?
Joʼ li xMalu, chanru naxkʼojobʼ qachʼool Salmo 34:19?
Chanru naxkʼutbʼesi li kixkʼul li xMalu naq li Jehobʼa naxkʼe «li xnimal ru wankilal» naq naqanumsi ebʼ li chʼaʼajkilal? (2Co 4:7, SBG).