Laaʼat ajwiʼ tatruuq xkawresinkil aawibʼ anaqwan re naq tatruuq chi wank saʼ li akʼ Ruuchichʼochʼ.
Chi seebʼ toowanq saʼ li akʼ Ruuchichʼochʼ!
Li Yos kixyiibʼ li Ruuchichʼochʼ re naq ebʼ li qas qiitzʼin li teʼabʼinq chiru teʼruuq chi wank chi junelik chisaʼ (Salmo 37:29). Joʼkan naq kixkʼe laj Adán ut li xʼEva saʼ li chʼinaʼusil naʼajej Edén re naq ebʼ aʼan ut ebʼ li ralal xkʼajol teʼril ut teʼxkʼanjela li Ruuchichʼochʼ (Génesis 1:28; 2:15).
Li Ruuchichʼochʼ li wanko wi anaqwan moko juntaqʼeet ta rikʼin li kixyiibʼ li Yos saʼ xtiklajik. Abʼan inkʼaʼ najalaak li rajom li Yos. Kʼaru tixbʼaanu li Yos re naq ttzʼaqloq ru li rajom? Joʼ ak xqil saʼebʼ li junchʼol chi tzolom, li Yos inkʼaʼ tixsach li Ruuchichʼochʼ tixbʼaanu bʼan naq ebʼ li nekeʼabʼink chiru teʼwanq saʼ xbʼeen chi junelik. Chanruhaq li yuʼam saʼ Ruuchichʼochʼ naq ttzʼaqloq ru li rajom li Yos?
Jun li awabʼejilal li ttaqlanq saʼ xbʼeen chixjunil li Ruuchichʼochʼ
Chi seebʼ li Xʼawabʼejilal li Yos, li wank saʼ choxa, t-awabʼejinq saʼ xbʼeen li Ruuchichʼochʼ ut ebʼ li kristiʼaan sahaqebʼ chik saʼ xchʼool, teʼwanq saʼ tuqtuukilal ut teʼxyal xsahil li xkʼanjelebʼ. Li Yos kixxaqabʼ li Jesukriist re naq t-awabʼejinq saʼ xbʼeen li Ruuchichʼochʼ. Aʼan moko juntaqʼeet ta rikʼinebʼ li awabʼej li wankebʼ saʼ Ruuchichʼochʼ. Li Jesús junelik naxkʼe chiʼubʼej ebʼ li junchʼol. Li rahok aʼan li naʼekʼasink re li Jesús chi awabʼejink, aʼan junelik tuulanaq, tiikaq xchʼool ut t-uxtaananq u (Isaías 11:4).
Twanq li junajil saʼ xbʼeen chixjunil li Ruuchichʼochʼ
Ebʼ li kristiʼaan li teʼwanq saʼ Ruuchichʼochʼ inkʼaʼ chik xikʼ teʼril ribʼebʼ saʼ xkʼabʼaʼ li xtenamitebʼ malaj li xwanjikebʼ (Apocalipsis 7:9, 10). Chixjunilebʼ li kristiʼaan li teʼwanq saʼ xbʼeen li Ruuchichʼochʼ teʼxra li Yos joʼ ajwiʼ teʼxra ribʼ chiribʼilebʼ ribʼ. Chiqajunilo tookʼanjelaq saʼ junajil ut saʼ tuqtuukilal re naq ttzʼaqloq ru li rajom li Yos: xchʼinaʼusinkil li Ruuchichʼochʼ (Salmo 115:16).
Ebʼ li kristiʼaan ut ebʼ li xul teʼwanq saʼ junajil
Naq li Xʼawabʼejilal li Yos t-oq chi awabʼejink saʼ Ruuchichʼochʼ, laj Yobʼtesinel aʼanaq chik yaal re chanruhaq li junjunq chi kutan (Salmo 24:1, 2). Naq li Jesús kiwank saʼ Ruuchichʼochʼ, kixxaqabʼ jun li kawil iqʼ. Rikʼin aʼin kixkʼutbʼesi li truuq xbʼaanunkil rikʼin li xmetzʼew li Yos (Marcos 4:39, 41). Naq li Jesús t-oq chi awabʼejink, maaʼani chik tixxuwa ebʼ li kaqsut-iqʼ, li hiik malaj jalan chik li naʼlebʼ li nokooxkʼe saʼ rahilal. Joʼkan ajwiʼ, li Xʼawabʼejilal li Yos tixbʼaanu naq ebʼ li kristiʼaan ut ebʼ li xul teʼwanq saʼ tuqtuukilal ut maaʼani chik tixtzʼajni li Ruuchichʼochʼ (Oseas 2:18).
Kawaq chik li qajunxaqalil ut naabʼalaq chik li tzakahemq
Chiqajunilo tzʼaqalaq chik re ru li qayuʼam. Maaʼani chik tyajerq, ttixq malaj tkamq (Isaías 35:5, 6). Toowanq chik saʼ jun li chʼinaʼusil naʼajej bʼarwiʼ maakʼaʼaq chik li tzʼaj, joʼ xeʼwank chaq laj Adán ut li xʼEva saʼ xtiklajik. Saʼ li akʼ Ruuchichʼochʼ chaabʼilaq chik li chʼochʼ ut naabʼalaq chik li tzakahemq tixkʼe choʼq rehebʼ li qas qiitzʼin, joʼ kikʼulmank chaq saʼ li naʼajej Edén (Génesis 2:9). Saʼ li chʼinaʼusil naʼajej ttzʼaqloq ru li kixyeechiʼi chaq li Yos choʼq re li tenamit Israel: «Texwaʼaq toj reetal taakʼojlaaq eechʼool» (Levítico 26:4, 5).
Twanq tuqtuukilal ut maakʼaʼaq chik xiwxiwal
Rubʼel li Xʼawabʼejilal li Yos, ebʼ li kristiʼaan teʼwanq saʼ tuqtuukilal ut inkʼaʼ chik xikʼ teʼril ribʼebʼ. Maakʼaʼaq chik li yalok u, maaʼani chik ttaqlanq saʼ xbʼeenebʼ li junchʼol ut twanq chik li t-ajmanq chiqu. Li Santil Hu naxye: «Li junjunq taahilanq saʼ xmu li rochoch saʼ tuqtuukilal, chi maakʼaʼaq xxiw» (Miqueas 4:3, 4).
Wanq chik qochoch ut tqataw xsahil li qakʼanjel
Chixjunilebʼ li junkabʼal teʼwanq rochoch ut teʼxyal xsahil chixjunil li teʼxbʼaanu. Joʼkan naq, li Santil Hu naxye naq li teʼwanq saʼ li akʼ Ruuchichʼochʼ «inkʼaʼ chik teʼxtawasi ribʼ chi kʼanjelak chi maakʼaʼ rajbʼal» (Isaías 65:21-23).
Li tento xtzolbʼal
Li Santil Hu naxye: «Chixjunil li ruchichʼochʼ nujenaq rikʼin li xnaʼlebʼ li Qaawaʼ» (Isaías 11:9, Wy). Chixjunilebʼ li qas qiitzʼin teʼxtzol re rikʼin li xchoxahil naʼlebʼ li Jehobʼa, joʼ ajwiʼ rikʼin li xyobʼtesihom. Moko tqoksi ta li xseebʼal qachʼool re xyiibʼankil ebʼ li puubʼ chi moko re xrahobʼtesinkil li qechpoyanamil, re bʼan naq toowanq saʼ tuqtuukilal ut re xchʼolaninkil li Ruuchichʼochʼ (Salmo 37:11; Isaías 2:4).
Li junelik yuʼam
Li Yos kixkʼe xchʼool chi xyiibʼankil chi chaabʼil li Ruuchichʼochʼ re naq tqayal xsahil rajlal kutan, aʼan naraj naq toowanq chi junelik (Salmo 37:29; Isaías 45:18). Re xbʼaanunkil aʼin, li Yos «tixsach chi junajwa xwankil li kamk» (Isaías 25:8). Li Santil Hu naxye ajwiʼ «tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal» (Apocalipsis 21:4). Li Yos tixbʼaanu naq ebʼ li kristiʼaan li teʼkoleʼq saʼ li rosoʼjik li Ruuchichʼochʼ ut ebʼ li teʼwakliiq wiʼ chik chi yoʼyo teʼwanq xyuʼam chi junelik (Juan 5:28, 29; Hechos 24:15).
Saʼebʼ li qakutan, chi miyon ebʼ li kristiʼaan ak yookebʼ xkawresinkil ribʼ re naq teʼwanq rubʼel li Xʼawabʼejilal li Yos, li ak nachʼ wank chaq. Usta ebʼ aj maak, yookebʼ xyalbʼal xqʼe chi naʼlebʼak joʼ chanru naraj li Yos naq teʼnaʼlebʼaq ebʼ li kristiʼaan saʼ li akʼ Ruuchichʼochʼ. Chanru nekeʼxbʼaanu? Rikʼin xtzolbʼal chirix li Jehobʼa ut li Jesukriist (Juan 17:3).
Chi seebʼ t-osoʼq li Ruuchichʼochʼ aʼin. Wi taawaj xnawbʼal kʼaru tatruuq xbʼaanunkil re naq tatkoleʼq ut tatwanq saʼ li akʼ Ruuchichʼochʼ, kʼulubʼa naq ebʼ laj testiiw re li Jehobʼa teʼxkʼe aatzolbʼal chirix li Santil Hu rikʼin li tasal hu Sahaq laachʼool!