Ma nakaanaw?

Kʼaru nekeʼxbʼaanu ebʼ laj tij rikʼin xkikʼel li xul li nekeʼxmayeja saʼ rochoch li Yos?

SAʼ NAJTER Israel, ebʼ laj tij nekeʼxkamsi chi mil ebʼ li karneer choʼq re li mayej rajlal chihabʼ. Laj Josefo li naxtzʼil rix li xkʼulmank chaq saʼ xkutankil li apóstol, naxye naq numenaq 250,000 chi karneer nekeʼxkamsi saʼ xkutankil li Paswa. Naraj xyeebʼal naq naabʼal li kikʼ nahoymank (Lev. 1:​10, 11; Núm. 28:​16, 19). Kʼaru nabʼaanumank rikʼin li kikʼ aʼin?

Ebʼ li nekeʼpikok malaj nekeʼbʼekok najteril kʼaʼaq re ru xeʼxtaw naq saʼ li rochoch li Yos li kixyiibʼ laj Herodes, li xʼoksimank toj reetal naq xjukʼeʼk saʼ li chihabʼ 70, jun li jul bʼarwiʼ nakutmank li tzʼaj, chanchan naq aʼin kiʼoksimank re xkutbʼal li kikʼ li naʼoksimank chaq saʼ rochoch li Yos.

Qilaq wiibʼ li naʼlebʼ chirix aʼin:

• Ebʼ li jul chixkʼatq li altar. Jun li najteril hu li xtzʼiibʼamank chirixebʼ li xchaqʼrabʼ laj judiiy naq ak xnumeʼk wiibʼ siʼeent chihabʼ, naxye naq saʼ xxuk li altar wank wiibʼ li jul bʼarwiʼ li xkikʼel li xul li nekeʼxmayeja ut li haʼ li naʼoksimank re xchʼajbʼal li altar naxik saʼ li jul aʼin toj reetal nawulak saʼ xtaqʼahil Cedrón.

  Jun chik li hu saʼebʼ li qakutan li naʼaatinak chirix li kikʼulmank chaq rikʼinebʼ laj judiiy naxchʼolobʼ naq ebʼ li nekeʼpikok malaj nekeʼbʼekok najteril kʼaʼaq re ru xeʼxtaw ebʼ li jul chixkʼatq li rochoch li Yos li kiʼoksimank tana re risinkil li xkikʼel ebʼ li xul li nekeʼxmayeja ut li haʼ re xchʼajbʼal li altar.

• Numtajenaq li haʼ naʼajmank. Naʼajmank chiruhebʼ laj tij naabʼal li haʼ re xchʼajbʼal li altar ut li jul bʼarwiʼ natzʼeqmank li kikʼ. Bʼar nekeʼxtaw li haʼ? Nekeʼroksi li jul ut jalan chik li naʼlebʼ re xkʼambʼal li haʼ toj saʼ rochoch li Yos ut naʼoksimank ajwiʼ jalan chik re xxokbʼal li haʼ. Laj Joseph Patrich li napikok malaj nabʼekok najteril kʼaʼaq re ru naxye: «Saʼ maajun chik rochoch li Yos saʼ najter qʼe kutan natawmank junaq li xnaʼaj li haʼ li qʼaxal nim li naʼoksimank re saabʼesink ut re xtzʼeqbʼal li tzʼaj».