Ma traqeʼq saʼ junaq kutan li nimla kamsink?

Naq nak’ulmank junaq li nimla kamsink, nachalk sa’ li qach’ool eb’ li patz’om a’in: Ma naxk’e xch’ool li Yos chirix li nak’ulmank? K’a’ut nak’ulmank a’in? Ma traqe’q sa’ junaq kutan li nimla kamsink?a Chanru tinq’ax ru linxiw chirix aʼin? Li Santil Hu naxsume chi ch’olch’o ru eb’ li patz’om a’in.

K’aru narek’a li Yos naq naril li nimla kamsink?

Li Yos xik’ naril li nimla kamsink ut li raxiik’ (Salmo 11:5; Proverbios 6:16, 17). Ut li Jesús, li wank cho’q ruuchil li Yos, kixq’useb’ li xtzolom naq ke’xb’aanu jun li rahilal (Mateo 26:50-52). Wankeb’ li poyanam neke’kamsink ut neke’xye naq neke’xb’aanu sa’ xk’ab’a’ li Yos. Ab’an li Yos moko naxk’ulub’a ta li neke’xb’aanu chi moko narab’i ta eb’ li xtij (Isaías 1:15).

Li Yos naxk’e xch’ool chirix li neke’xk’ul li rahilal jo’ ajwi’ chirixeb’ li neke’xk’ul li nimla kamsink (Salmo 31:8; 1 Pedro 5:7). Joʼkan ajwi’, li Santil Hu naxye naq chi seeb’ li Yos trisi chixjunil li raxiik’ (Isaías 60:18).

Li nakʼamok chaq re li nimla kamsink

Li Santil Hu naxye kʼaʼut wank li nimla kamsink: «Wankebʼ winq kʼeebʼilebʼ xwankil chi xrahobʼtesinkil ebʼ li ras riitzʼin» (Eclesiastes 8:9, Li Santil Hu, Sociedad Bíblica de Guatemala, SBG). Chalen sa’ xtiklajik, eb’ li poyanam li wankebʼ xwankil rajlal nekeʼxsebʼesi li junchʼol re xrahobʼtesinkilebʼ. Saʼ xkʼabʼaʼ li rahobʼtesiik aʼin, wankebʼ nekeʼok xbʼaanunkil li nimla kamsink (Eclesiastés 7:7).

Li xraqik li nimla kamsink

Li Yos naxyeechiʼi naq chi seebʼ trisi li raxiikʼ, li xiw li naxk’am chaq li kamsink ut tixkʼam chaq li tuqtuukilal saʼ xbʼeen li Ruuchichʼochʼ (Isaías 32:18; Miqueas 4:3, 4). Chaawil li tixbʼaanu li Yos:

Trisi chi junajwa li nimla kamsink. Li Yos trisi li xʼawabʼejilal li winq ut choʼq reqaj tixkʼe li Xʼawabʼejilal saʼ chixjunil li Ruuchichʼochʼ. Li Jesús, li xaqabʼanbʼil joʼ li awabʼej, trilebʼ saʼ tiikilal li poyanam ut tixsach chi junajwa li raxiikʼ ut li kamsink (Salmo 72:2, 14). Naq tkʼulmanq aʼin, maaʼani chik tixsebʼesi li ras riitzʼin chi moko twanq li nimla kamsink. Chixjunilebʼ li poyanam «kʼajoʼ xnimal li tuqtuukil usilal teʼxyal chi junelik!» (Salmo 37:10, 11, SBG).
Tixsach li rahilal li naxkʼam chaq li nimla kamsink. Li Yos tixtenqʼahebʼ li kristiʼaan li xeʼxkʼul li rahilal saʼ li nimla kamsink, tixkʼirtasihebʼ li xjunxaqalil ut trisi li xrahilebʼ xchʼool ut li xxiw (Isaías 65:17; Apocalipsis 21:3, 4). Ut joʼkan ajwiʼ, naxyeechiʼi naq tixwaklesihebʼ chi yoʼyo li xeʼkamsiik: teʼwanq saʼ tuqtuukilal arin saʼ Ruuchichʼochʼ (Juan 5:28, 29).

Saʼ li Santil Hu naru naqatzol kʼaʼut tqapaabʼ naq chi seebʼ li Xʼawabʼejilal li Yos tixjolomi li Ruuchichʼoch’. Abʼan maare nakaakʼoxla: Kʼaʼut naq li Yos toj maajiʼ narisi li nimla kamsink? Wi taawaj xnawbʼal li xsumenkil, chaawil li bʼideo Kʼaʼut naq li Yos inkʼaʼ narisi li rahilal?

a Saʼ li nimla kamsink naʼok ajwiʼ li raxiikʼ ut xseb’esinkilebʼ li poyanam re xjalbʼal junaq li awabʼej, junaq li naʼlebʼ saʼebʼ li xpaabʼal malaj saʼ xwanjikebʼ li kristiʼaan. Abʼan, naq nakʼulmank junaq li rahilal moko chʼolchʼo ta chiruhebʼ li kristiʼaan ma aʼan jun li naʼlebʼ chirix li nimla kamsink.

Li Santil Hu naxtenqʼahebʼ li ra xeʼxkʼul

Li Santil Hu naxk’e wiibʼ li naʼlebʼ li tatxtenq’a:

Tijok chiru li Yos (Filipenses 4:6, 7).
Xkʼebʼal qachʼool chirix li naxyeechiʼi li Santil Hu choʼq re li kutan chalk re (Hebreos 6:19).

Wi taawaj xkomon aanaʼlebʼ chirix li wank saʼ li Santil Hu, chaawil li naʼlebʼ «Kʼaru naru tinbʼaanu re naq inkʼaʼ t-oq inkʼaʼuxl».

Eb’ laj testiiw re li Jehobʼa li xeʼxkʼul li rahilal xbʼaan li nimla kamsink keʼxtaw xkʼojobʼankil xchʼool rikʼinebʼ li rechpaabʼanel. Qilaq wiibʼ li eetalil:

Li xNatalia ut laj Aslán, li xyum, li wank 9 chihab’ re wankeb’ chaq sa’ jun li tzoleb’aal aran Beslán (Rusia) naq jun ch’uut aj kamsinel ke’xchik’ rib’ ut ke’xchap 1,000 chi kristi’aan. Ra xyeeb’al ab’an naab’al ke’kamsiik ut xk’ihalil a’an ebʼ li kok’al. Usta li xNatalia ut laj Aslán xe’xkol rib’, ab’an moko sa ta chik neke’rek’a rib’eb’. Chaawil li kitenq’ank reheb’.
Laj Pablo ut li xSophie xeʼxkʼul li rahilal naq kikamk li xyum naq ke’xt’an eb’ li Torres Gemelas aran Nueva York. Sa’ li b’ideo a’in taawil k’aru kitenq’ank reheb’ ut jalaneb’ chik li kristi’aan li ke’xk’ul li rahilal a’in chirix li nimla kamsink.