Li Yos naxkʼe xchʼool chirixebʼ li tzʼap xik
Saʼebʼ li qakutan maare wank 70 miyon li tzʼap xik sa’ chixjunil li ruuchichʼochʼ ut naabʼal nekeʼaatinak saʼ jun rehebʼ li 200 chi aatinobʼaal rehebʼ li inkʼaʼ nekeʼruuk chi aatinak ut abʼink. . Abʼan moko sa ta ilbʼilebʼ, qilaq li nekeʼxye wiibʼ oxibʼ:
«Saʼ chixjunil li ruuchichʼochʼ moko kʼebʼilebʼ ta xkʼulubʼ li tzʼap xik ut li nachʼaʼajkoʼk chiruhebʼ abʼink» (Asociación Nacional de Sordos de Estados Unidos).
«Ebʼ li tzʼap xik li wankebʼ saʼ li tenamit li yookebʼ chi elk chiʼubʼej qʼaxal nebʼaʼebʼ ut inkʼaʼ mas nekeʼruuk chi xik saʼ li eskuʼeel ut xtawbʼal xkʼanjelebʼ» (Federación Mundial de Sordos).
Ma naxkʼe xchʼool li Yos chirixebʼ li tzʼap xik? Kʼaru naxye li Santil Hu chirixebʼ? Ut kʼaru nekeʼxbʼaanu laj testiiw re li Jehobʼa re xtenqʼankilebʼ?
Chanru narilebʼ li Yos li tzʼap xik?
Li Santil Hu naxye naq li Jehobʼaa naxkʼe xchʼool chirixebʼ. Naraj naq us tqilebʼ ut naq teʼxtaw rusilal li naxyeechiʼi.
Li xraqal li Santil Hu: «Meehobʼ li tzʼaptzʼookebʼ xik» (Levítico 19:14, Li Santil Hu, Wycliffe Bible Translators. Akʼ tzʼiibʼ).
Li naraj xyeebʼal: Li chaqʼrabʼ li kixkʼe li Jehobʼa rehebʼ laj Israel naxkolebʼ li tzʼap xik.
Li xraqal li Santil Hu: «Li Yos inkʼaʼ nasikʼok u» (Hechos 10:34).
Li naraj xyeebʼal: Li Jehobʼa naxkʼe xchʼool chirix chixjunil li kristiʼaan.
Li xraqal li Santil Hu: «Li Jesús kiʼok xbʼeeninkil chixjunil li tenamit ut ebʼ li kʼalebʼaal [...] yook xyeebʼal resil li chaabʼil esil chirix li Xʼawabʼejilal li Yos» (Mateo 9:35).
Li naraj xyeebʼal: Naq li Jesús kiwank saʼ Ruuchichʼochʼ kiʼaatinak chirix li Xʼawabʼejilal li Yos ut li tixbʼaanu choʼq rehebʼ chixjunil li kristiʼaan (Mateo 6:10).
Li xraqal li Santil Hu: Li Jesús «naxkʼehebʼ ajwiʼ chi abʼink ebʼ li tzʼapxik ut naxkʼehebʼ chi aatinak ebʼ li mem» (Marcos 7:37).
Li naraj xyeebʼal: Li Jesús kixkʼutbʼesi naq li Xʼawabʼejilal li Yos tixbʼaanu naq ebʼ li tzʼap xik teʼabʼinq ut teʼaatinaq chi chaabʼil. Kixbʼaanu aʼin naq kixkʼirtasi jun li tzʼap xik (Marcos 7:31-35).
Li xraqal li Santil Hu: «Ebʼ li tzʼapxikebʼ teʼabʼinq chik» (Isaías 35:5, Li Santil Hu, Sociedad Bíblica de Guatemala).
Li naraj xyeebʼal: Li Jehobʼa naxye naq ebʼ li tzʼap xik teʼabʼinq chik (Isaías 29:18).
Kʼaru nekeʼxbʼaanu laj testiiw re li Jehobʼa re xtenqʼankilebʼ?
Ebʼ laj Testiiw nekeʼxye li esil choʼq rehebʼ li tzʼap xik. Chanru naqabʼaanu? Nayiibʼamank li Santil Hu ut ebʼ li bʼideo saʼ numenaq 100 chi aatinobʼaal choʼq rehebʼ li inkʼaʼ nekeʼruuk chi aatinak ut abʼink. Naqayeechiʼi ajwiʼ xtzolbʼalebʼ rikʼin li Santil Hu ut xik saʼebʼ li chʼutam choʼq rehebʼ li inkʼaʼ nekeʼruuk chi aatinak ut abʼink, ut chixjunil aʼin chi sibʼil. Kʼaʼut? Xbʼaan naq li Jesús kixye saʼ Mateo 10:8: «Chi maatan xeekʼul, chi maatan ajwiʼ teekʼe».
Bʼar taataw aʼin?
jw.org. Naq tat-oq saʼ li qanaʼaj saʼ internet, pitzʼ bʼarwiʼ naxye «Aatinobʼaal» ut sikʼ jun li aatinobʼaal choʼq rehebʼ li inkʼaʼ nekeʼruuk chi aatinak ut abʼink. Moqon chik sikʼ li naʼlebʼ li taawaj.
Naru taakubʼsi JW Library Sign Language ut taawil ebʼ li bʼideo li wank aran li naʼoksimank re xkʼebʼalebʼ xtzolbʼal li kristiʼaan chirix li Santil Hu.
Kʼaru li naʼlebʼ li naqoksi?
Li Santil Hu saʼebʼ li raatinobʼaal li inkʼaʼ nekeʼruuk chi aatinak ut abʼink. Li xbʼeen Santil Hu li kiʼelk saʼ li aatinobʼaal aʼin, aʼan re Estados Unidos. Li Santil Hu choʼq rehebʼ li Teʼwanq saʼ li Akʼ Ruuchichʼochʼ, wank chixjunil malaj chi tasal saʼ li aatinobʼaal aʼin ut rajlal chihabʼ najalmank saʼ jalan chik aatinobʼaal. (Re rilbʼal ebʼ li aatinobʼaal malaj rilbʼal li Santil Hu saʼ internet, chaawil li kaaxukuut «Li Santil Hu choʼq rehebʼ li Teʼwanq saʼ li Akʼ Ruuchichʼochʼ saʼebʼ li raatinobʼaal li inkʼaʼ nekeʼruuk chi aatinak ut abʼink»).
Chaawil li bʼideo La Traducción del Nuevo Mundo completa en lenguaje de señas americano ya está disponible, re rilbʼal kʼaru nabʼaanumank re xyiibʼankil li Santil Hu saʼ li aatinobʼaal aʼin.
Re xtawbʼal rusilal xyaabʼasinkil li Santil Hu, kubʼsi JW Library Sign Language. Aʼin tatxtenqʼa xsikʼbʼal junaq li raqal saʼ li Santil Hu re li aatinobʼaal aʼin.
Laj Dmytro ut li xVita tzʼapxikebʼ, abʼan ebʼ li ralal xkʼajol inkʼaʼ. Kʼe reetal chanru li junkabʼal aʼin naxtaw rusilal li Santil Hu wulaj wulaj.
Naʼoksimank ebʼ li bʼideo re xchʼolobʼankil li Santil Hu. Ebʼ laj Testiiw nekeʼxyiibʼ ebʼ li bʼideo saʼebʼ li raatinobʼaal li inkʼaʼ nekeʼruuk chi aatinak ut abʼink re xtenqʼankilebʼ li kristiʼaan chi xtawbʼal ru ut xyuʼaminkil li naxye li Santil Hu. Ani aj e ebʼ li naʼlebʼ aʼin?
Xtzolbʼal li Santil Hu. Taatzol li Santil Hu saʼebʼ li raatinobʼaal li inkʼaʼ nekeʼruuk chi aatinak ut abʼink ut jun aj Testiiw tatxtenqʼa. Patzʼ naq tateʼrulaʼani.
Il chanru xtzolbʼal li Santil Hu kixtenqʼa laj Jeson Senajonon li wank Filipinas.
Kʼe reetal chanru kitenqʼaak laj Mario Antúnez li kiwank joʼ pastor saʼ Honduras xbʼaan li Santil Hu saʼ li resil xyuʼam li naxkʼabʼaʼi «Tenía muchas preguntas y pocas respuestas».
Ebʼ li chʼutam ut li nimla chʼutam. Wank ebʼ li chʼuut choʼq rehebʼ li inkʼaʼ nekeʼruuk chi aatinak ut abʼink, bʼarwiʼ teʼruuq xloqʼoninkil ru li Jehobʼa. Ut rajlal chihabʼ nawank ebʼ li nimla chʼutam re xkʼutbʼal li naxye li Santil Hu. Ebʼ li qachʼutam ut nimla chʼutam najalmank saʼ li raatinobʼaalebʼ li tzʼap xik ut ebʼ li mutzʼ. Naqayeechiʼi ajwiʼ ebʼ li qatasal hu saʼ braille.
Chatwulaq saʼebʼ li chʼutam.
Ebʼ li nimla chʼutam re oxibʼ kutan rehebʼ laj testiiw re li Jehobʼa.
Kʼe reetal chanru laj José Luis Ayala li wank México, kixtzol xkʼutbʼal chiʼus li Santil Hu usta tzʼap xik naq kiyoʼlaak ut moqon kimutzʼoʼk ajwiʼ.
a Li xkʼabʼaʼ li Yos aʼan Jehobʼa (Lucas 4:8). Chaawil li naʼlebʼ «Ani tzʼaqal li Jehobʼa?».