Ma ak xaqabʼanbʼil xbʼaan li Yos chanruhaq li qayuʼam, malaj nokooxkanabʼ chi xsikʼbʼal li naqaj?
Li naxsume li Santil Hu
Li Yos naxkʼe qakʼulubʼ naq nokooxkanabʼ chi xsikʼbʼal li naqaj saʼ li qayuʼam. Moko ak xaqabʼanbʼil ta xbʼaan li Yos chanruhaq li qayuʼam chi moko nokooxmin ta chi xbʼaanunkil li naraj. Qatzʼilaq rix li naxye li Santil Hu chirix aʼin.
Li Yos kixyobʼtesi li winq joʼ xjalam u (Génesis 1:26). Abʼan moko joʼkan ta kixyobʼtesihebʼ li xul, ebʼ aʼan inkʼaʼ nekeʼkʼoxlak. Abʼan, laaʼo kamaʼo bʼayaq laj Yobʼtesinel. Chanru aʼin? Nokooruuk xkʼutbʼesinkil li xnaʼlebʼ joʼ li rahok ut li tiikilal. Ut joʼ li Yos, nokooruuk xsikʼbʼal li naqaj saʼ li qayuʼam.
Joʼkan naq saʼ quqʼ wank li qayuʼam. Li Yos naxye qe: «Sikʼ ru li yuʼam [...], chawabʼi li xyaabʼ [in]kux», aʼin naraj xyeebʼal naq tqapaabʼ li xchaqʼrabʼ (Deuteronomio 30:19, 20, Li Santil Hu, Sociedad Bíblica de Guatemala, SBG ). Maakʼaʼ raj xyaalal ut kaw raj choʼq qe li naxye qe li Yos wi inkʼaʼ raj nokooxkanabʼ chi xsikʼbʼal li naqaj saʼ li qayuʼam. Li Yos inkʼaʼ nokooxmin chi xpaabʼankil. Naxye bʼan qe rikʼin rahok: «Jwal us raj naq xapaabʼ linchaqʼrabʼ! Li xsahil aachʼool qʼaxal yo raj chi kʼiik joʼ junaq nimaʼ» (Isaías 48:18, SBG).
Moko ak xaqabʼanbʼil ta xbʼaan li Yos ma us malaj inkʼaʼ us tooʼelq saʼ li qayuʼam. Wi naqaj naq us t-elq li xqakʼubʼ, aajel ru naq kaw tookʼanjelaq. Li Santil Hu naxye: «Joʼchʼinal joʼnimal tatruuq xbʼaanunkil, bʼaanu chi anchal aachʼool» (Eclesiastés 9:10, SBG). Naxye ajwiʼ naq «li ani nekeʼxkʼoxla [malaj nekeʼxkʼubʼ] chi us li kʼaru nekeʼxbʼaanu, us nekeʼelk» (Proverbios 21:5, Li Santil Hu, Wycliffe Bible Translators. Akʼ tzʼiibʼ).
Li Yos nokooxmaatani naq nokooxkanabʼ chi xsikʼbʼal li naqaj saʼ li qayuʼam. Joʼkan naq, naqara chi anchal qachʼool xbʼaan naq naʼalaak saʼ li qaanm xbʼaanunkil (Mateo 22:37).
Ma inkʼaʼ tabʼiʼ li Yos nataqlank saʼ xbʼeen chixjunil?
Li Santil Hu naxkʼut naq li Yos aʼan li Nimajwal ut naru tixkʼe li xwankil rehebʼ li poyanam, maaʼani naru naramok chiru (Job 37:23; Isaías 40:26). Abʼanan, li Yos inkʼaʼ naroksi li xwankil re taqlank saʼ xbʼeen chixjunil. Li Santil Hu naxkʼut naq li Yos kixkuy li xjosqʼil saʼ xbʼeenebʼ laj Babilonia li keʼwank chaq junxil li xikʼ keʼilok chaq re li xtenamit (Isaías 42:14). Joʼkan ajwiʼ toj yook xkuybʼal xmaakebʼ li nekeʼroksi li maatan aʼin re xrahobʼtesinkilebʼ li junchʼol. Abʼan nasahoʼk qachʼool xnawbʼal naq moko junelik ta tixkuyebʼ xmaak (Salmo 37:10, 11).