Ani li raatin li Yos?
Li naxsume li Santil Hu
Naq li Santil Hu naroksi «li raatin li Yos» yook chi aatinak chirix li esil li chalenaq rikʼin li Yos (Lucas 11:28). Naq naxye «li Raatin li Yos» ut «li Aatin» aʼan li kʼabʼaʼej li nakʼemank re li Jesukriist (Apocalipsis 19:13; Juan 1:14).
Li esil li chalenaq rikʼin li Yos. Ebʼ li propeet nekeʼxye naq li nekeʼxye chalenaq rikʼin li Yos. Jun eetalil, naq laj Jeremías naʼok xyeebʼal li esil li chalenaq rikʼin li Yos naxye: «Li Qaawaʼ kiʼaatinak wikʼin» (Jeremías 1:4, 11, Li Santil Hu, Sociedad Bíblica de Guatemala, SBG, 13; 2:1). Ut naq li propeet Samuel ok re raj xxaqabʼankil laj Saúl joʼ awabʼej kixye re: «Kanaaqat wan toj tinchʼolobʼ chawu li kʼaru yeebʼil xbʼaan li Yos» (1 Samuel 9:27, SBG).
Jun li kristiʼaan. Naq li Santil Hu naxye «li Aatin» yook chi aatinak chirix li Jesukriist, naq kiwank saʼ choxa ut saʼ Ruuchichʼochʼ. Chanru naqanaw aʼin? Qilaq wiibʼ oxibʼ li eetalil.
Li Aatin aʼan li xbʼeenwa li kiyobʼtesiik. Saʼ Juan 1:1, 2 naxye: «Saʼ xtiklajik ak wank chaq li Aatin [...]. Aʼan ak wank chaq saʼ xtiklajik rikʼin li Yos». Ut naq li Jesús «aʼan li xbʼeen alalbʼej chiru chixjunil li kiyobʼtesimank [...] naq toj maakʼaʼ chaq chixjunil» (Colosenses 1:13-15, 17).
Li Aatin kiwank saʼ Ruuchichʼochʼ. Saʼ Juan 1:14 naxye: «Li Aatin kitibʼeloʼk ut kiwank saʼ qayanq». Li Jesukriist «kixkanabʼ bʼan chixjunil, kixkʼulubʼa wank choʼq moos ut kisutqʼi choʼq winq» (Filipenses 2:5-7).
Li Aatin aʼan Ralal li Yos. Li apóstol Juan kixye saʼ Juan 1:14 naq «li Aatin kitibʼeloʼk» ut «xqil li xloqʼal, jun li loqʼal li naxkʼe li yuwaʼbʼej re li ralal li jun ajwiʼ chiru». Kixye ajwiʼ «naq li Jesús aʼan Ralal li Yos» (1 Juan 4:15).
Li Aatin nanaʼlebʼak joʼ jun yos. Saʼ Juan 1:1 naxye naq «li Aatin aʼan chaq jun yos». Ut li Jesús «aʼan xlemtzʼunil li xloqʼal li Yos ut aʼan xjalam u li naxkʼut chi tzʼaqal re ru chanru xnaʼlebʼ» (Hebreos 1:2, 3).
Li Aatin aʼan awabʼej. Li Santil Hu naxye naq saʼ xjolom li Raatin li Yos «wank naabʼal li koroon» (Apocalipsis 19:12, 13). Ut aʼan «Awabʼej saʼ xbʼeenebʼ li awabʼej ut Qaawaʼ saʼ xbʼeenebʼ li qaawaʼ» (Apocalipsis 19:16). Ut re li Jesús nayeemank naq «aʼan Awabʼej saʼ xbʼeenebʼ li nekeʼjolomink joʼ awabʼej ut aʼan Qaawaʼ saʼ xbʼeenebʼ li nekeʼjolomink joʼ qaawaʼ» (1 Timoteo 6:14, 15).
Li Aatin aʼan aj yeehol esil. Li nakʼabʼaʼiik chi joʼkaʼin naraj xyeebʼal naq naxye li esil li kikʼeheʼk re xbʼaan li Yos ut joʼkan kixbʼaanu li Jesús. Joʼkan naq kixye: «Li Yuwaʼbʼej li kitaqlank chaq we nayeehok we li tento tinye ut li tento tinkʼut [...]. Joʼkan naq chixjunil li ninye, ninye joʼ kixye chaq we li Yuwaʼbʼej» (Juan 12:49, 50).