Li Xʼawabʼejilal li Yos tixkʼam chaq naabʼal li tuqtuukilal

Li Xʼawabʼejilal li Yos, li awabʼejilal aʼin tixjolomi chixjunil li ruuchichʼochʼ, tixbʼaanu naq chi seebʼ toowanq saʼ tuqtuukilal ut saʼ junajil. Li awabʼejilal aʼin junxil nokooʼok xtzʼaamankil. Joʼ naxye li Salmo 72:7 naq «kʼajoʼaq li tuqtuukilal» saʼ Ruuchichʼochʼ. Abʼan, joqʼe t-oq chi jolomink? Chanru tixbʼaanu? Ut, chanru taataw rusilal li awabʼejilal aʼin?

JOQʼE TCHALQ LI AWABʼEJILAL AʼIN?

Li Santil Hu kixye chaq naq twanq jalan jalanq li xninqal ru naʼlebʼ ut aʼanaq «reetalil» naq li Xʼawabʼejilal li Yos yook chaq chi nachʼok. Saʼ li eetalil aʼin wank ebʼ li yalok u, li weʼej, ebʼ li yajel, li ninqi hiik ut xkʼihalil li maaʼusilal (Mateo 24:3, 7, 12; Lucas 21:11; Apocalipsis 6:2-8).

Jun chik li naʼlebʼ li kixye chaq li Santil Hu: «Saʼ rosoʼjikebʼ li kutan wank honal qʼaxal chʼaʼajkaq xnumsinkil. Ebʼ li winq junes rehebʼ teʼraj, teʼxrahi ru li tumin, [...] aj qʼetolaqebʼ raatin xnaʼ xyuwaʼ, maakʼaʼ chik teʼxnaw xyoxinkil ut teʼxtzʼeqtaana li paabʼank. Inkʼaʼ chik teʼxrahatq ribʼ, maakʼaʼaq chik usilal rikʼinebʼ, aj yoobʼanelaqebʼ aatin, inkʼaʼ teʼxkuy ribʼ, qʼaxal josqʼaqebʼ, xikʼ teʼril li chaabʼilal [...]. Taanumtaaq li xqʼetqʼetilebʼ, aʼ chik li xsahilal li ruuchichʼochʼ teʼrataw chiru li xraabʼal li Yos» (2 Timoteo 3:1-4). Yaal naq ak wankebʼ chaq li qas qiitzʼin joʼebʼ aʼin, abʼan moko qʼaxal naabʼalebʼ ta joʼ anaqwan.

Li kixye chaq li Santil Hu kiʼok chi tzʼaqlok ru saʼ li chihabʼ 1914. Joʼkan naq, wankebʼ laj tzʼilonel ut ebʼ laj tzʼiibʼ li nekeʼxye naq li ruuchichʼochʼ kijalaak chalen chaq li chihabʼ aʼin. Jun eetalil, laj Peter Munch, jun laj tzʼilonel, kixtzʼiibʼa: «Naq kitiklaak chaq li nimla yalok u saʼ li chihabʼ 1914 aran kijalaak li xwanjikebʼ li qas qiitzʼin. Sa wanko chaq [...] abʼan moqon chik xooʼok saʼ rahilal, saʼ xiwxiwal ut saʼ xikʼ ilok, bʼarwiʼ maabʼar chik wank li tuqtuukilal».

Abʼan, wank ajwiʼ li chaabʼil esil. Naq ak xnumeʼk li chʼaʼajkilal nachalk li tuqtuukilal. Li eetalil aʼin naxkʼutbʼesi naq chi seebʼ li Xʼawabʼejilal li Yos tixjolomi chixjunil li Ruuchichʼochʼ. Li Jesus kixkʼe aʼin choʼq xkomon li eetalil: «Taapuktesimanq li chaabʼil esilal aʼin chirix li xnimajwal wankilal li choxa saʼ chixjunil li ruuchichʼochʼ re xchʼolobʼankil li yaal chiruhebʼ chixjunil li tenamit: tojaʼ naq taachalq li rosoʼjik» (Mateo 24:14).

Li chaabʼil esilal aʼin wank saʼ xyanq li xnimal ru li esil li naqapuktesi joʼ aj Testiiw re li Jehobʼa. Joʼkan naq, li qahu li nawbʼil ru chiʼus naxkʼabʼaʼi Laj Kʼaakʼalehom. Naxye resil li Xʼawabʼejilal li Jehobʼa. Chisaʼ naxye li tixbʼaanu li Xʼawabʼejilal li Yos choʼq re li Ruuchichʼochʼ ut ebʼ li qas qiitzʼin.

CHANRU T-OQ CHI JOLOMINK SAʼ RUUCHICHʼOCHʼ?

Re xsumenkil li patzʼom aʼin, qilaq kaahibʼ li xninqal ru eetalil:

1. Li Xʼawabʼejilal li Yos inkʼaʼ tixkanabʼ naq junaq li xʼawabʼej li ruuchichʼochʼ twanq saʼ li Xʼawabʼejilal li Yos.

2. Ebʼ li awabʼej re chixjunil li ruuchichʼochʼ inkʼaʼ teʼraj xkanabʼankil li xwankil ut teʼxmaajewa li Xʼawabʼejilal li Yos (Salmo 2:2-9).

3. Li Xʼawabʼejilal li Yos tixsach ebʼ li awabʼej xbʼaan naq inkʼaʼ teʼraj xkanabʼankil li xwankil (Daniel 2:44; Apocalipsis 19:17-21). Ut re xraqbʼal, tchalq jun nimla yalok u saʼ chixjunil li ruuchichʼochʼ, li Santil Hu naxkʼabʼaʼi choʼq Armagedon (Apocalipsis 16:14, 16).

4. Li teʼraj wank rubʼel li Xʼawabʼejilal li Yos teʼkoleʼq saʼ li Armagedon ut wanqebʼ saʼ tuqtuukilal saʼ li akʼ Ruuchichʼochʼ. Li Santil Hu naxye naq kʼajoʼaq «xkʼihalebʼ li tenamit», maare chi miyon (Apocalipsis 7:9, 10, 13, 14).

CHANRU TAATAW RUSILAL LI XʼAWABʼEJILAL LI YOS?

Jun rehebʼ li xbʼeen naʼlebʼ li naʼajmank re naq toowanq rubʼel li Xʼawabʼejilal li Yos aʼan xnawbʼal ru chiʼus li Yos. Saʼ jun rehebʼ li xtij, li Jesus kixye: «Aʼin li junelik yuʼam: naq teʼxnaw aawu laaʼat li junat chi tzʼaqal Yos ut li xataqla chaq, li Jesus aʼ li Kriist» (Juan 17:3).

Xnawbʼal ru li Yos nokooxtenqʼa saʼ jalan jalanq chi naʼlebʼ. Qilaq wiibʼ rehebʼ li naʼlebʼ aʼin. Li xbʼeen, nokooxtenqʼa chi xkawresinkil li qapaabʼal chirix li Yos. Li paabʼal aʼin, li wank xbʼaanuhom, nokooxtenqʼa chi rilbʼal naq moko tikʼtiʼ ta naq wank li Xʼawabʼejilal li Yos ut chi seebʼ tchalq (Hebreos 11:1). Li xkabʼ, naxbʼaanu naq inkʼaʼ tqakanabʼ xraabʼal li Yos ut ebʼ li qas qiitzʼin. Li qarahom chirix li Yos toorekʼasi chi xpaabʼankil chi anchal qachʼool, ut li qarahom chirixebʼ li qas qiitzʼin toorekʼasi chi xyuʼaminkil li kixkʼe li Jesus chirix chanru tqilebʼ li junchʼol: «Joʼ chanru teeraj teʼxbʼaanu eere ebʼ li poyanam, joʼkan ajwiʼ chebʼaanuhaq laaʼex rehebʼ aʼan» (Lucas 6:31).

Joʼ jun chaabʼil yuwaʼbʼej, li kiyobʼtesink qe naraj li us choʼq qe. Naraj naq tqataw li «tzʼaqal yuʼam» joʼ naxkʼabʼaʼi li Santil Hu (1 Timoteo 6:19). Saʼebʼ li qakutan, li yuʼam li naqayuʼami maawaʼ yuʼam. Chi miyon ebʼ li qas qiitzʼin yookebʼ xkʼebʼal xqʼe chirix aʼin. Chanruhaq li tzʼaqal yuʼam? Qilaq wiibʼ oxibʼ li xchaqʼal ru naʼlebʼ li tixkʼam chaq li Xʼawabʼejilal li Yos choʼq rehebʼ li qas qiitzʼin.