Li yaal chirix li Xʼawabʼejilal li Yos
Li Jesus kixkʼut tijok chiruhebʼ li xtzolom: «At qaYuwaʼ li wankat saʼ choxa, santobʼresinbʼil taxaq laakʼabʼaʼ, chichalq ta laanimajwal awabʼejihom, chiʼuxq ta laawajom arin saʼ ruuchichʼochʼ joʼ saʼ choxa» (Mateo 6:9, 10). Kʼaru li Xʼawabʼejilal li Yos? Kʼaru yook xbʼaanunkil? Kʼaʼut tento tqapatzʼ aʼin saʼ li qatij?
Li Jesus aʼan li Awabʼej re li Xʼawabʼejilal li Yos
Lucas 1:31-33: «Jesus taakʼe choʼq xkʼabʼaʼ. Aʼan nimaq xwankil ut ralal li Nimajwal tixkʼabʼaʼin. Li Qaawaʼ Yos tixkʼe re li xkʼojaribʼaal laj David li xyuwaʼ. Taaʼawabʼejinq saʼ xbʼeen li rochoch laj Jakob chi junelik, ut li xnimal awabʼejihom inkʼaʼ taalajq taaʼosoʼq».
Li Xʼawabʼejilal li Yos aʼan li xnimal ru naʼlebʼ li kixpuktesi li Jesus
Mateo 9:35: «Li Jesus kixbʼeeni chixjunilebʼ li tenamit ut kʼalebʼaal, yo chi xtzolbʼalebʼ saʼebʼ li xchʼutlebʼaal kabʼl. Kixpuktesi li xchaabʼil esil li xnimajwal awabʼejihom li Yos ut kixkʼirtasi chixjunil li rahilal ut chixjunil li yajel».
Li Jesus kixkʼe rehebʼ li xtzolom jun li eetalil li tixkʼutbʼesi naq li Xʼawabʼejilal li Yos ak chalk re
Mateo 24:7: «Teʼwaklijeʼq chi xkamsinkil ribʼebʼ tenamit rikʼin jalan chik tenamit, li awabʼej rikʼin jalan chik awabʼej, ut taawanjeʼq weʼej ut hiik saʼ naabʼal chi naʼajej».
Li xtzolom li Jesus nekeʼxpuktesi li Xʼawabʼejilal li Yos saʼ chixjunil li Ruuchichʼochʼ
Mateo 24:14: «Taapuktesimanq li chaabʼil esilal aʼin chirix li xnimajwal wankilal li choxa saʼ chixjunil li ruuchichʼochʼ re xchʼolobʼankil li yaal chiruhebʼ chixjunil li tenamit: tojaʼ naq taachalq li rosoʼjik».