5 Ma tqakanabʼ xkʼulbʼal li rahilal saʼ jun kutan?
Kʼaʼut wank xwankil xnawbʼal li xsumenkil?
Xpaabʼankil naq saʼ jun kutan tqakanabʼ xkʼulbʼal li rahilal naru nokooxtenqʼa chi xtawbʼal rusilal li yuʼam ut xchaabʼilobʼresinkil li naqakʼoxla chirix li Yos.
Kʼoxla aʼin
Naabʼalebʼ li qas qiitzʼin teʼwulaq raj chiruhebʼ risinkil li rahilal, abʼan moko naabʼal ta nekeʼruuk xbʼaanunkil. Kʼe reetal aʼin:
Usta naabʼal li bʼan...,
... li yajel chirix li aanmej aʼan li xbʼeen xbʼeen xyaalal naq wank li kamk saʼ Ruuchichʼochʼ.
... li kanser chi miyon li poyanam naxkamsi rajlal chihabʼ.
... «li ruuchichʼochʼ inkʼaʼ naxkanabʼ xkʼulbʼal li letzbʼil yajel li inkʼaʼ chik naxpaabʼ li bʼan. Yookebʼ chi chalk li akʼ letzbʼil yajel malaj ebʼ li letzbʼil yajel li xkʼoxlamank naq ak xeʼsach», naxtzʼiibʼa laj David Bloom saʼ li hu chirix li yajel (Frontiers in Immunology).
Usta wank xtumin wiibʼ oxibʼ li tenamit...,
... rajlal chihabʼ chi miyon ebʼ li kokʼal nekeʼkamk, ut qʼaxal nakʼulmank aʼin saʼebʼ li teep li jwal nebʼaʼebʼ saʼ xbʼeen li Ruuchichʼochʼ.
... chi mil miyon li qas qiitzʼin wankebʼ rochoch saʼebʼ li naʼaj bʼarwiʼ numtajenaq li tzʼaj ut li yajel.
... chi siʼeent miyon ebʼ li qas qiitzʼin maakʼaʼ xhaʼ saʼ rochoch.
Usta naabʼal chik nanawmank chirix li kʼulubʼej...,
... saʼ naabʼal li naʼaj re li Ruuchichʼochʼ, yookebʼ xkʼayinkil ut xloqʼbʼal ebʼ li qas qiitzʼin li nekeʼxmin ru chi kʼanjelak. Joʼ naxye jun li hu li tzʼiibʼanbʼil xbʼaan li molam Naciones Unidas, maare ebʼ li tenamit li yal nekeʼril li nimla chʼaʼajkilal aʼin «mutzʼebʼ malaj inkʼaʼ kawresinbʼilebʼ re xjitbʼal li chʼaʼajkilal aʼin».
RE XNAWBʼAL XKOMON
Sikʼ jw.org ut il li bʼideo Kʼaru tzʼaqal Xnimajwal Awabʼejilal li Yos?
Li naxye li Santil Hu
Li Yos naxkʼe xchʼool chiqix
Narahoʼk xchʼool li Yos naq naril li qarahilal.
Li Yos «inkʼaʼ xtzʼeqtaana li nebʼaʼ chi [...] moko xmuq ta li rilobʼaal chiru, xkʼe bʼan xchʼool chi rabʼinkil naq aʼan xyaabʼa xkʼabʼaʼ» (SALMO 22:25, EBʼ LI SALMO, DIOCESIS DE VERAPAZ).
«Cheekanabʼaq saʼ ruqʼ li Dios chixjunil li kʼaʼaq re ru yook eekʼaʼuxl chirix xbʼaan naq li Dios naxkʼe xchʼool cheerix» (1 PEDRO 5:7, Wy. AKʼ TZʼIIBʼ).
Moko junelik ta tqakʼul li rahilal
Li Santil Hu naxye naq li Yos trisi li rahilal.
Li Yos «tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal» (APOCALIPSIS 21:3, 4).
Li Yos trisi chixjunil li nokooxkʼe saʼ rahilal
Re xbʼaanunkil troksi li Xʼawabʼejilal, aʼin jun tzʼaqal awabʼejilal, joʼ naxye li Santil Hu.
«Li xYos li choxa tixwaklesi chaq jun awabʼejihom li maajun wa taajukʼmanq, chi moko taakanaaq rubʼel xwankil jalan chik tenamit. [...] Ut aʼan wanq xwankil chi junelik» (DANIEL 2:44).