Kʼaru yook chi kʼulmank rikʼin roxloqʼinkil li junkabʼal?
KʼAʼUT WANK XWANKIL ROXLOQʼINKIL LI JUNKABʼAL
Naq li bʼeelomej, li ixaqilbʼej ut ebʼ li kokʼal nekeʼroxloqʼi ribʼ, wank li tuqtuukilal ut chixjunilebʼ saʼebʼ saʼ xchʼool.
Li tasal hu Siete reglas de oro para vivir en pareja naʼaatinak chirixebʼ li sumsu ut naxye naq ebʼ li bʼeelomej ut ebʼ li ixaqilbʼej li nekeʼroxloqʼi ribʼ, junelik nekeʼxkʼutbʼesi naq nekeʼxra li xsumʼaatin «rikʼin nimla naʼlebʼ ut nekeʼxkʼutbʼesi ajwiʼ aʼin wulaj wulaj rikʼin kokʼ naʼlebʼ» (traducción de Sonia Tapia Sánchez).
Naq xtzʼilmank rix chanru nekeʼnaʼlebʼak ebʼ li kokʼal li nekeʼroxloqʼi li junchʼol, kitawmank naq ebʼ li kokʼal aʼin sa nekeʼrekʼa ribʼ, us nekeʼxkʼam ribʼ rikʼinebʼ li xnaʼ xyuwaʼ ut moko qʼaxal yook ta xkʼaʼuxebʼ ut xrahilebʼ xchʼool.
LI TATRUUQ XBʼAANUNKIL
Aatinan rikʼin laajunkabʼal chirix li naʼlebʼ aʼin. Xbʼeen, kʼehomaq reetal ma chʼolchʼo cheeru kʼaru naraj xyeebʼal li oxloqʼink. Xkabʼ, tzʼiibʼamaq li naʼlebʼ li teebʼaanu cheejunqal joʼ junkabʼal joʼ ajwiʼ li naʼlebʼ li moko us ta. Ut rox, aatinanqex chirix li naʼlebʼ aʼin re naq cheejunilex teenaw kʼaru tento teebʼaanu re naq teeroxloqʼi eeribʼ.
Kʼamon bʼe chiruhebʼ. Maare raj us naq taakʼoxla rix li patzʼom aʼin: «Ma kʼaynaqin xwechʼbʼal rix linjunkabʼal naq napaltoʼk? Ma ninseʼebʼ naq nekeʼxye li xkʼaʼuxebʼ? Ma inkʼaʼ ninkʼe saʼ ajl li nekeʼxye we? Ma ninchʼik wibʼ naq yookebʼ waatinankil?». Jultikoʼq aawe naq laaʼat tatkʼamoq bʼe chi roxloqʼinkilebʼ li junchʼol.
Naʼlebʼ: Kʼe aachʼool chi roxloqʼinkil laajunkabʼal aʼ yaal ma xkʼulubʼ malaj inkʼaʼ.
Usta inkʼaʼ xeekʼe eeribʼ saʼ aatin, maakanabʼ roxloqʼinkil. Maaye ebʼ li aatin «Laaʼat junelik…» malaj «Laaʼat maajunwa…». Li kawil aatin joʼ aʼin naxtochʼ xchʼool laajunkabʼal ut naru naxnima ru li chʼaʼajkilal usta kachʼin naq xtiklaak.
LI NAQABʼAANU JOʼ AJ TESTIIW RE LI JEHOBʼA
Joʼ aj testiiw re li Jehobʼa naqakʼut chiruhebʼ li junkabʼal naq tento teʼroxloqʼi ribʼ chiribʼilebʼ ribʼ. Li naʼlebʼ aʼin natawmank saʼebʼ li hu, saʼebʼ li tasal hu, saʼebʼ li folleto joʼ ajwiʼ saʼebʼ li bʼideo li naqakʼe chi naweʼk. Ut sibʼil chixjunil aʼin.
CHOʼQ REHEBʼ LI SUMSU: Saʼ li tasal «Li sumlaak ut li junkabʼal» wank jalan jalanq li naʼlebʼ choʼq rehebʼ li bʼeelomej ut ebʼ li ixaqilbʼej re naq…
. . . teʼxtzol rabʼinkilebʼ ribʼ.
. . . inkʼaʼ teʼxkanabʼ raatinankilebʼ ribʼ.
. . . teʼxkanabʼ xchoqinkilebʼ ribʼ.
(Taawil www.pr418.com/kek ut bʼarwiʼ naxye «sikʼ» taatzʼiibʼa «Li sumlaak ut li junkabʼal» malaj «Li sumlaak»).
CHOʼQ REHEBʼ LI NAʼBʼEJ YUWAʼBʼEJ: Saʼ li tasal «Li sumlaak ut li junkabʼal» wank jalan jalanq li naʼlebʼ choʼq rehebʼ li naʼbʼej yuwaʼbʼej re naq ebʼ li ralal xkʼajol…
. . . teʼabʼinq.
. . . teʼtenqʼanq saʼ ochoch.
. . . teʼxye «bʼaanu usilal» ut «bʼanyox aawe».
(Taawil www.pr418.com/kek ut bʼarwiʼ naxye «sikʼ» taatzʼiibʼa «Li sumlaak ut li junkabʼal» malaj «Xtijbʼal ebʼ li alalbʼej»).
(Taawil www.pr418.com/kek ut bʼarwiʼ naxye «sikʼ» taatzʼiibʼa «Qayiibʼaq jun li ochoch li tixkuy. Qakʼutaq chiruhebʼ li qakokʼal li bʼe li tento teʼxkʼam»).
CHOʼQ REHEBʼ LI SAAJ: Saʼ li tasal «Ebʼ li saaj» re www.pr418.com/kek wank ebʼ li naʼlebʼ, ebʼ li bʼideo ut jalan chik li tenqʼ choʼq rehebʼ li saaj re naq. . .
. . . teʼxkʼam ribʼ chiʼus rikʼinebʼ li xnaʼ xyuwaʼ ut rikʼinebʼ li ras ut ebʼ li riitzʼin.
. . . teʼroxloqʼi li xnaʼ xyuwaʼ naq teʼaatinaq rikʼinebʼ chirix chanru nekeʼtijeʼk.
. . . teʼxtzol naʼlebʼak chiʼus ut chi joʼkan teʼkʼeheʼq xleseens xbʼaan li xnaʼ xyuwaʼ.
(Taawil www.pr418.com/kek ut bʼarwiʼ naxye «sikʼ» taatzʼiibʼa «Ebʼ li saaj»).
Li naʼaj jw.org sibʼil. Maakʼaʼ taatoj re roksinkil chi moko ttzʼiibʼa ta aawibʼ. Inkʼaʼ teʼxpatzʼ laakʼabʼaʼ chi moko xjayalil laawochoch.