Ebʼ Li Ralal Xkʼajol laj Jacob

KʼE REETAL naabʼalebʼ saʼ li junkabʼal aʼin. Kabʼlaju ralal laj Jacob ut moko kaʼaj tawiʼ jun xrabʼin kiwank. Ma nakaanaw anihebʼ xkʼabʼaʼ li ralal? Qatzolaq anihebʼ.

Ebʼ li xkokʼal li xLea aʼanebʼ: laj Ruben, laj Simeon, laj Levi ut laj Juda. Naq li xRaquel kixkʼe reetal naq inkʼaʼ naru nawank xkokʼal kirahoʼk saʼ xchʼool. Joʼkan naq kixkʼe li xmoos, xBilha xkʼabʼaʼ, re laj Jacob. Li xBilha kiwank wiibʼ xkokʼal ut aʼan laj Dan ut laj Neftali. Joʼkan ajwiʼ li xLea kixkʼe li xmoos, xZilpa, re laj Jacob. Li xZilpa kiwank wiibʼ xkokʼal ut aʼanebʼ: laj Gad ut laj Aser. Chirix chik aʼan, li xLea kiwank wiibʼ chik xkokʼal rikʼin laj Jacob ut aʼanebʼ: laj Isacar ut laj Zabulon.

Tojaʼ naq li xRaquel kiwank jun xkʼuulaʼal. Aj Jose kixkʼe choʼq xkʼabʼaʼ. Moqon chik tqatzol chanru kikʼeheʼk xwankil laj Jose. Chi joʼkan kiwank junlaju ralal laj Jacob naq wank chaq saʼ rochoch laj Laban, xyuwaʼ li xRaquel.

Saʼ li Santil Hu wank ajwiʼ xkʼabʼaʼ li xDina. Aʼan jun rehebʼ li xrabʼin laj Jacob.

Saʼ jun kutan laj Jacob kixkanabʼ laj Laban ut kisutqʼiik Canaan. Kixkʼam chirix li xjunkabʼal ut chixjunil li xketomq.

Kachʼin chik ma nekeʼwulak Efrat, xteepal Canaan, naq kiyoʼlaak li jun chik xkʼuulaʼal li xRaquel. Abʼan naq kiyoʼlaak li kʼuulaʼal, li xRaquel kikamk. Joʼkan naq laj Jacob kixkʼe choʼq aj Benjamin xkʼabʼaʼ li ralal.

Us naq tqajultika xkʼabʼaʼebʼ li ralal laj Jacob, xbʼaan naq saʼ xkʼabʼaʼebʼ kichalk li 12 xteepal li tenamit Israel. Lajeebʼ kichalk chirixebʼ li ralal laj Jacob ut wiibʼ chirixebʼ li ralal laj Jose. Toj yoʼyo laj Isaac naq keʼyoʼlaak chixjunilebʼ li ri ut kisahoʼk tana saʼ xchʼool chi rilbʼalebʼ. Abʼan, ma nakaanaw kʼaru kixkʼul xDina, li ri laj Isaac?