TZOLOM 13
Laj Jacob ut laj Esau nekeʼxkʼe ribʼ saʼ usilal
Li Jehobʼa ak kixye re laj Jacob naq tixkol joʼ chanru kixkol chaq laj Abrahan ut laj Isaac. Laj Jacob kikanaak saʼ jun li naʼaj li naxkʼabʼaʼi Haran. Aran kisumlaak, kiwank naabʼal xkokʼal ut jwal kibʼihomoʼk.
Saʼ xnumik ru li chihabʼ, li Jehobʼa kixye re laj Jacob: «Sutqʼin bʼarwiʼ wank chaq laanaʼ laayuwaʼ». Joʼkan naq, laj Jacob ut li xjunkabʼal keʼxchap xbʼe ut xkohebʼ. Wiibʼ oxibʼ rehebʼ li xmoos keʼchalk chi xtawbʼal ut keʼxye re: «Laj Esau laawas xchalk qatawbʼal rikʼin 400 chi winq». Laj Jacob kʼajoʼ naq kixuwak xbʼaan naq kixkʼoxla naq laj Esau xchalk xrahobʼtesinkil aʼan ut li xjunkabʼal. Joʼkan naq, kitijok chiru li Jehobʼa: «Kolin chiru li was bʼaanu usilal». Wulajaq chik, laj Jacob kixtaqla xmaatan laj Esau: naabʼal ebʼ li karneer, ebʼ li chibʼaat, ebʼ li wakax, ebʼ li kameey ut ebʼ li bʼuur.
Saʼ li qʼoqyink ajwiʼ aʼan, laj Jacob kikanaak xjunes, ut kiril jun li anjel. Li anjel aʼin kiʼok chi yalok rikʼin. Keʼyalok toj reetal kisaqewink. Usta kitochʼeʼk laj Jacob, inkʼaʼ kirachʼabʼ li anjel. Li anjel kixye re: «Kanabʼin chi xik». Abʼan laj Jacob kixye re: «Inkʼaʼ, inkʼa toj tinʼaawosobʼtesi».
Tojaʼ naq, li anjel kirosobʼtesi laj Jacob. Anaqwan chʼolchʼo chik chiru laj Jacob naq li Jehobʼa inkʼaʼ tixkanabʼ naq laj Esau trahobʼtesinq re.
Saʼ li eqʼla aʼan, laj Jacob kiril chi najt laj Esau ut 400 chi winq. Laj Jacob xkoho xbʼeenwa chiru li xjunkabʼal chi xtawbʼal chaq laj Esau ut, naq kiwulak, kixwiqʼibʼ ribʼ wuqubʼ sut chiru li ras. Laj Esau kiʼaanilak chi xtawbʼal chaq laj Jacob ut kixqʼalu. Keʼok chi yaabʼak saʼ wiibʼal ut keʼxkʼe ribʼ saʼ usilal. Ma nakaakʼoxla naq kiwulak chiru li Jehobʼa li kixbʼaanu laj Jacob?
Chirix chik aʼan, laj Esau kisutqʼiik saʼ rochoch, ut laj Jacob kixtiika xbʼe. Laj Jacob 12 ralal: laj Ruben, laj Simeon, laj Levi, laj Juda, laj Dan, laj Neftali, laj Gad, laj Aser, laj Isacar, laj Zabulon, laj Jose ut laj Benjamin. Moqon chik, saʼ xkʼabʼaʼ laj Jose, jun rehebʼ li ralal laj Jacob, li Jehobʼa tixkol li xtenamit. Ma taawaj xnawbʼal chanru? Toj tqil.
«Rahomaq ebʼ li xikʼ nekeʼilok eere ut tijonqex chirixebʼ li nekeʼrahobʼtesink eere. Chi joʼkan teekʼutbʼesi naq ralal xkʼajolex Leeyuwaʼ li wank saʼ choxa» (Mateo 5:44, 45).