Laj Jacob naxkʼul li herensia

Laj Isaac wank 40 chihabʼ re, naq kisumlaak rikʼin li xRebeca. Kʼajoʼ naq kixra chaq li xRebeca. Saʼ xnumik ru li kutan, keʼwank xlut, wiibʼ kokʼ chʼinaʼal.

Li asbʼej naxkʼabʼaʼi Esau ut li iitzʼinbʼej, Jacob. Laj Esau kʼajoʼ nawulak chiru xik saʼ kʼal, ut naxnaw yohok. Abʼan laj Jacob nawulak chiru wank saʼ ochoch.

Saʼebʼ li kutan aʼan, naq nakamk li yuwaʼbʼej, li xbʼeen alalbʼej naxkʼul naabʼal li chʼochʼ ut li tumin chiruhebʼ li riitzʼin. Aʼin nayeemank re herensia. Saʼ li xjunkabʼal laj Isaac, saʼ xyanq li herensia wank ajwiʼ chixjunil li kixyeechiʼi chaq li Jehobʼa re laj Abrahan. Laj Esau maakʼaʼ naraj re li yeechiʼom. Abʼan laj Jacob naxnaw naq wank xwankil li yeechiʼom aʼin.

Saʼ jun kutan, laj Esau lubʼlu kiwulak saʼ rochoch xbʼaan naq xyohok chixjunil li kutan. Naq rutzʼ xbʼook li tzakahemq li yook xkʼubʼankil laj Jacob, kixye: «Inkʼaʼ chik ninkuy intzʼokajik! Kʼe bʼayaq we laakaqi yu!». Laj Jacob kixye re: «Us, abʼan xbʼeenwa ye we ma naru tinkanaaq rikʼin laaherensia?». Laj Esau kixye re: «Maakʼaʼ nawaj re! Kanaqat rikʼin. Waʼak nawaj laaʼin». Ma nakaakʼoxla naq wank xnaʼlebʼ laj Esau naq kixbʼaanu aʼin? Inkʼaʼ, moko joʼkan ta. Kixtzʼeqtaana li jwal loqʼ yal saʼ xkʼabʼaʼ jun sekʼ chi wa.

Naq laj Isaac kitiixoʼk, kiwulak xhoonalil re rosobʼtesinkil li ralal, li asbʼej. Abʼan li xRebeca kixtenqʼa laj Jacob, li iitzʼinbʼej, re naq aʼan t-osobʼtesiiq xbʼaan li yuwaʼbʼej. Naq laj Esau kixnaw, kʼajoʼ kichalk xjosqʼil ut kixkʼubʼ xkamsinkil li riitzʼin li rechlutil. Laj Isaac ut li xRebeca keʼraj xkolbʼal laj Jacob, joʼkan naq keʼxye re: «Ayu ut kanaqat rikʼin laj Laban, laawikan, li ras laanaʼ ut tatsutqʼiiq naq tkubʼeeq xjosqʼil laj Esau». Laj Jacob kiʼabʼink chiru li xnaʼ xyuwaʼ ut kiʼelelik re naq inkʼaʼ tkamsiiq xbʼaan li ras.