Kʼaʼut Wank saʼ Chʼaʼajkilal xDina?

MA NAKAANAW rikʼin anihebʼ wank xDina? Wank rikʼinebʼ li ixqaʼal re Canaan. Ma sa saʼ xchʼool laj Jacob naq xDina nawulak Canaan? Re xnawbʼal aʼin, us naq tqajultika kʼaru kixkʼoxla laj Abrahan ut laj Isaac chirixebʼ laj Canaan.

Ma kiraj laj Abrahan naq li ralal tsumlaaq rikʼin junaq ixq aj Canaan? Ma kiraj laj Isaac ut li xRebeca naq laj Jacob tsumlaaq rikʼin junaq ixq aj Canaan? Inkʼaʼ keʼraj. Ma nakaanaw kʼaʼut?

Xbʼaan naq ebʼ laj Canaan nekeʼxloqʼoni li pechʼbʼil yos ut maaʼusebʼ xnaʼlebʼ. Moko us ta naq ebʼ laj Israel teʼsumlaaq rikʼinebʼ ut teʼwanq choʼq ramiiwebʼ. Joʼkan naq chʼolchʼo chiqu naq laj Jacob moko sa ta saʼ xchʼool naq li xrabʼin wank choʼq ramiiwebʼ laj Canaan.

Li xDina kixkʼe ribʼ saʼ chʼaʼajkilal. Ma nakaanaw ani li winq yook chi ilok re xDina? Aʼan laj Siquem. Naq li xDina kiwulak rilbʼal ebʼ li ixqaʼal saʼ li tenamit Canaan, laj Siquem kixchap ut kiyoklaak rikʼin. Moko us ta kixbʼaanu laj Siquem. Xbʼaan naq, jun li winq naru nayokla rikʼin jun li ixq, wi sumsu rikʼin. Naq laj Siquem kixchap li xDina, naabʼal li chʼaʼajkilal kichalk saʼ xbʼeenebʼ.

Naq ebʼ li ras li xDina keʼxnaw aʼin, kʼajoʼ naq keʼchalk xjosqʼil. Maakʼaʼ saʼ xchʼoolebʼ laj Canaan naq kiwulak laj Simeon, laj Levi ut ebʼ li riitzʼin chi xkamsinkil laj Siquem ut chixjunilebʼ li winq. Laj Jacob kichalk xjosqʼil naq kirabʼi li keʼxbʼaanu ebʼ li ralal.

Ma jultik aawe chanru kitikla li chʼaʼajkilal aʼin? Kitikla naq li xDina kiʼok rochbʼeeninkilebʼ li inkʼaʼ nekeʼxpaabʼ li xchaqʼrabʼ li Yos. Joʼkan naq laaʼo inkʼaʼ tqasikʼ wank rikʼinebʼ li inkʼaʼ nekeʼxpaabʼ li Jehobʼa.