Laj Job Tiik Xchʼool Chiru li Yos

TOQʼOBʼ ru li winq nujenaq saʼ xox! Aʼan laj Job. Li ixq li wank chiru laj Job aʼan li rixaqil. Li rixaqil laj Job yook xyeebʼal re: ‹Maajewa li Yos ut tatkamq›. Kʼaʼut naq li rixaqil laj Job kixye aʼin? Ut kʼaʼut kichalk li rahilal saʼ xbʼeen laj Job?

Laj Job tiik xchʼool chiru li Jehobʼa. Laj Job kiwank saʼ li tenamit Uz. Li tenamit aʼin, moko najt ta wank chiru Canaan. Li Jehobʼa naxra laj Job. Abʼan, ma nakaanaw ani xikʼ naʼilok re laj Job?

Laj Tza aʼan li musiqʼej li xikʼ naʼilok re li Jehobʼa. Aʼan kixbʼaanu naq laj Adan ut xʼEva teʼxqʼet Raatin li Yos. Laj Tza kixkʼoxla ajwiʼ naq truuq xbʼaanunkil naq chixjunilebʼ teʼxqʼet Raatin li Yos. Abʼan, ma kiru laj Tza xbʼaanunkil aʼin? Inkʼaʼ kiru xbʼaanunkil. Qajultikaq naq keʼwank winq ut ixq tiikebʼ xchʼool chiru li Yos. Ma jultik aawe anihebʼ xkʼabʼaʼ?

Laj Job chik kikanaak naq kikamk laj Jacob ut laj Jose. Laj Job jwal tiik xchʼool chiru li Jehobʼa saʼ chixjunil li Ruuchichʼochʼ. Li Jehobʼa kiraj xkʼutbʼal chiru laj Tza naq moko truuq ta xbʼaanunkil naq chixjunilebʼ yiibʼaqebʼ ru xnaʼlebʼ. Joʼkan naq kixye re laj Tza: ‹Chaawil laj Job. Tiik xchʼool chiwu›.

Laj Tza kixye re li Yos: ‹Laj Job tiik xchʼool chaawu, xbʼaan naq nakaawosobʼtesi. Abʼan wi taamaqʼ chixjunil chiru, tatxmaajewa›.

Joʼkan naq li Jehobʼa kixye re laj Tza: ‹Maqʼ chixjunil chiru ut rahobʼtesi abʼan maakamsi. Ut aran tqil ma tinxmaajewa›.

Joʼkan naq laj Tza kixbʼaanu naq teʼrelqʼa li xketomq, ebʼ li xkameey ut teʼkamq ebʼ li xkarneer. Kixbʼaanu naq teʼkamq li 10 chi ralal xkʼajol saʼ jun kaqsut-iqʼ. Chirix chik aʼan kixkʼe li yajel aʼin chirix laj Job. Nim li xrahilal laj Job, joʼkan naq li rixaqil kixye: ‹Maajewa li Yos ut tatkamq›. Abʼan laj Job moko kixbʼaanu ta li kixye li rixaqil. Ut oxibʼebʼ li nekeʼxye naq ramiiw, keʼxye re laj Job naq yook xtojbʼal rix li maaʼusilal li kixbʼaanu chaq. Abʼan laj Job moko kixkanabʼ ta wank saʼ tiikilal chiru li Yos.

Laj Job kixsahobʼresi xchʼool li Jehobʼa. Li Yos kirosobʼtesi laj Job kixkʼirtesi ut kixkʼe 10 chik ralal xkʼajol. Joʼkan ajwiʼ kixkʼe kaʼsut xkʼihal li xketomq, li xkarneer ut li xkameey chiru li kiwank chaq najter. Joʼ li nakaawil saʼ li eetalil.

Wi tiikaq aachʼool chi junelik chiru li Jehobʼa, joʼ kixbʼaanu chaq laj Job. Li Yos tatrosobʼtesi ajwiʼ ut tixkʼe aayuʼam chi junelik naq li Ruuchichʼochʼ twulaq joʼ li naʼajej Eden.