Li Cheʼ Yook Xxamlel

LAJ Moises kiwulak saʼ li tzuul Horeb, xbʼaan naq yook xsikʼbʼal richajebʼ li xkarneer. Aran kiril jun li cheʼ yook xxamlel ut inkʼaʼ nakʼatk!

Laj Moises kixye: ‹Xik we chi rilbʼal kʼaru aʼan›. Naq kijilok, kiyeheʼk re: ‹Matjilok chaq, isi laaxaabʼ, xbʼaan naq sant li naʼaj li xaqxookat wiʼ›. Li Yos kiʼaatinank re laj Moises, abʼan kiroksi jun li anjel re xbʼaanunkil aʼin. Naq laj Moises kirabʼi xyaabʼ xkux li Jehobʼa kixtzʼap xnaqʼ ru.

Tojaʼ naq li Yos kixye re laj Moises: ‹Yookin chi rilbʼal naq ra wank lintenamit. Joʼkan naq nawaj xkolbʼalebʼ ut tattintaqla Egipto chi risinkilebʼ›. Li Jehobʼa naraj naq ebʼ laj Israel teʼxik saʼ li chʼinaʼusil naʼajej Canaan.

Laj Moises kixye re li Yos: ‹Anihin laaʼin? Chanru twisihebʼ chaq laatenamit? Wi teʼxpatzʼ we: Ani kitaqlank chaq aawe? Kʼaru tinye rehebʼ?›

Li Yos kixye re laj Moises: ‹Aʼin taaye: Li JEHOBʼA li xYos laj Abrahan, li xYos laj Isaac ut li xYos laj Jacob kitaqlank chaq we eerikʼin›. Li Jehobʼa kixye ajwiʼ re laj Moises: ‹Aʼinaq linkʼabʼaʼ chi junelik!›

Kichaqʼok laj Moises: ‹Ut wi inkʼaʼ teʼxpaabʼ we naq tinye rehebʼ naq laaʼat xattaqlank chaq we?›

Joʼkan naq li Yos kixye re: ‹Kʼaru wank saʼ laawuqʼ?›

Laj Moises kixye: ‹Jun li cheʼ›.

Li Yos kixye re laj Moises: ‹Kut li cheʼ saʼ chʼochʼ›. Naq kixkut saʼ chʼochʼ, li cheʼ kisutqʼiik choʼq kʼantiʼ. Li Jehobʼa kixkʼut jun chik li eetalil chiru laj Moises. Ut kixye re: ‹Chʼik laawuqʼ saʼ laawaqʼ›. Naq laj Moises kirisi li ruqʼ, kiril naq wank saqlep chiru li ruqʼ! Li Jehobʼa toj kixkʼut chiru laj Moises jun chik li eetalil. Chirix chik aʼan li Yos kixye: ‹Rikʼin ebʼ li eetalil aʼin, ebʼ laj Israel teʼxpaabʼ naq laaʼin xintaqlank aawe rikʼinebʼ›.

Naq laj Moises kiwulak saʼ rochoch kixye re laj Jetro: ‹Bʼaanu usilal, kanabʼin chi xik Egipto, re naq tinnaw chanru wankebʼ linkomon›. Joʼkan naq laj Moises kisutqʼiik Egipto.