Li cheʼ yook xxamlel

Laj Moises kiwank 40 chihabʼ saʼ li naʼaj Madian. Chiruhebʼ li chihabʼ aʼin, kisumlaak ut kiwank xkokʼal. Saʼ jun kutan yook rilbʼalebʼ chaq li xkarneer chixkʼatq li tzuul Sinai ut kiril li maajunwa rilom. Jun li cheʼ yook xxamlel, abʼan inkʼaʼ nakʼatk! Naq laj Moises kinachʼok chi rilbʼal, kirabʼi jun xyaabʼ kuxej saʼ xyanq li cheʼ. Ut kixye re: «Moises! Matjilok chaq. Isi laaxaabʼ xbʼaan naq yookat xyeqʼbʼal li santil naʼaj». Aʼan li Jehobʼa, yook roksinkil jun li anjel re raatinankil laj Moises.

Laj Moises kixuwak, joʼkan naq kixtzʼap xnaqʼ ru. Li xyaabʼ kuxej kixye re: «Xwil naq kʼajoʼ li rahilal yookebʼ xkʼulbʼal ebʼ laj Israel. Tinkolebʼ saʼ ruqʼebʼ laj Egipcio ut tinkʼamebʼ saʼ jun li chaabʼil naʼaj. Ut nawaj naq laaʼat taawisi chaq lintenamit saʼ Egipto». Ma nakaaye naq laj Moises kisachk xchʼool chi rabʼinkil aʼin?

Laj Moises kixpatzʼ re: «Kʼaru tinye naq teʼraj xnawbʼal ani kitaqlank chaq we?». Li Yos kixye re: «Taaye rehebʼ naq li xYos laj Abrahan, li xYos laj Isaac ut li xYos laj Jacob kitaqlank aawe». Laj Moises kixye: «Ut wi li tenamit inkʼaʼ t-abʼinq chiwu?». Li Jehobʼa kixkʼe re jun li eetalil re xkʼutbʼal chiru naq tixtenqʼa. Kixye re, naq tixkut li xxuqʼ saʼ chʼochʼ ut, naq kixbʼaanu, li xxuqʼ kisutqʼiik choʼq kʼantiʼ! Chirix chik aʼan, laj Moises kixchap xye li kʼantiʼ ut kisutqʼiik wiʼ chik choʼq xuqʼ. Tojaʼ naq, li Jehobʼa kixye re: «Naq taabʼaanu li sachbʼachʼoolej aʼin, taakʼutbʼesi naq laaʼin xintaqlank aawe».

Abʼan laj Moises kixye: «Moko usin ta chi aatinak chiruhebʼ li poyanam». Li Jehobʼa kixye re: «Laaʼin tinye aawe li taaye ut, joʼkan ajwiʼ, tintaqla laj Aaron, laawiitzʼin, re naq tatxtenqʼa». Anaqwan, naq laj Moises naxnaw naq li Jehobʼa ttenqʼanq re, kisutqʼiik Egipto ut kixkʼam li rixaqil ut ebʼ li xkokʼal.