Li Nimaʼ Jordan

KʼARU yookebʼ xbʼaanunkil ebʼ laj Israel? Yookebʼ chi numeʼk saʼ xyi li nimaʼ Jordan. Abʼan bʼar xko li haʼ? Saʼebʼ li kutan aʼan, naxkʼe naabʼal li habʼ ut saʼ junpaat nabʼutʼunk li nimaʼ. Abʼan, anaqwan maakʼaʼ chik li haʼ! Ebʼ laj Israel yookebʼ chi numeʼk saʼ xyi, joʼ keʼxbʼaanu chaq saʼ li Kaqi Palaw. Qilaq bʼar xko chixjunil li haʼ.

Naq xwulak xkutankil naq ebʼ laj Israel teʼnumeʼq saʼ li nimaʼ, li Jehobʼa kixye re laj Josue naq tixye rehebʼ laj Israel: ‹Ebʼ laj tij teʼkʼamoq re xkaaxil li sumwank ut teʼkʼamoq bʼe chiqu. Ut naq teʼxkʼe li roq saʼ li nimaʼ li haʼ tchaqiq›.

Joʼkan naq ebʼ laj tij keʼxkʼam xkaaxil li sumwank ut keʼkʼamok bʼe chiruhebʼ laj Israel. Li nimaʼ kaw roq ut cham xsaʼ. Naq ebʼ laj tij keʼwulak saʼ li nimaʼ inkʼaʼ keʼxuwak naq keʼxchʼik ribʼ saʼ haʼ. Ut naq keʼxkʼe li roq saʼ li haʼ, kiʼok chi chaqik li nimaʼ! Li Jehobʼa kixtzʼap xbʼe li haʼ, aʼan jun chik li sachbʼachʼoolej.

Ebʼ laj tij keʼxkʼam xkaaxil li sumwank ut keʼkanaak saʼ xyi li nimaʼ. Chirix chik aʼan, keʼok chi numeʼk ebʼ laj Israel joʼ nakʼutunk saʼ li eetalil.

Naq keʼnumeʼk chixjunilebʼ laj Israel, li Jehobʼa kixye re laj Josue naq tixsikʼ 12 chi winq kawebʼ ribʼ ut tixye rehebʼ: ‹Ayuqex saʼ li nimaʼ bʼarwiʼ wankebʼ laj tij rikʼin xkaaxil li sumwank. Aran teerisi 12 chi pek ut teekʼe bʼarwiʼ teenumsi li qʼoqyink. Wi wulaj kabʼej leeralal leekʼajol teʼxpatzʼ eere, kʼaru xyaalal ebʼ li 12 chi pek aʼin? Teeye rehebʼ naq li nimaʼ Jordan kichaqik naq keʼxnumsi xkaaxil li sumwank saʼ xyi li nimaʼ. Ebʼ li pek tixjultika eere li sachbʼachʼoolej aʼin›. Laj Josue kixkʼe ajwiʼ 12 chi pek bʼarwiʼ keʼxaqli laj tij saʼ li nimaʼ.

Chirix chik aʼan laj Josue kixye rehebʼ laj tij: ‹Elenqex saʼ li nimaʼ Jordan!› Naq ebʼ laj tij keʼelk chisaʼ, li nimaʼ kiʼok wiʼ chik chi bʼutʼunk.