Ebʼ laj Israel Keʼelk Chaq Babilonia

AK XNUMEʼK tana wiibʼ chihabʼ naq ebʼ laj Medos ut ebʼ laj Persa keʼreechani li tenamit Babilonia. Anaqwan ebʼ laj Israel yookebʼ chi elk Babilonia. Ani kiʼachʼabʼank chaq rehebʼ?

Laj Ciro, li awabʼej re Persia, kirisihebʼ chaq ebʼ laj Israel saʼ li tenamit Babilonia. Toj maajiʼ nayoʼlaak laj Ciro naq li Jehobʼa kixye re laj Isaias, laj kʼanjel chiru, naq tixtzʼiibʼa li tixbʼaanu laj Ciro: ‹Taabʼaanu li tinye aawe. Teʼkanaaq chi teeto ebʼ li rokebʼaal li tenamit Babilonia re naq tatruuq reechaninkil li tenamit›. Laj Ciro kijolomink rehebʼ laj Medos ut ebʼ laj Persa naq keʼreechani li tenamit Babilonia. Chi joʼkan kitzʼaqlok ru li kixye li Jehobʼa.

Laj Isaias kixye ajwiʼ naq laj Ciro ttaqlanq chi xyiibʼankil wiʼ chik li tenamit Jerusalen ut chi xyiibʼankil li Rochoch li Yos. Joʼkan naq laj Ciro kixkʼe jun li chaqʼrabʼ rehebʼ laj Israel: ‹Ayuqex saʼ li tenamit Jerusalen ut yiibʼamaq aran li Rochoch li Jehobʼa, leeYos›. Ebʼ laj Israel kohebʼ chi xbʼaanunkil li kixye li awabʼej.

Moko chixjunilebʼ ta laj Israel keʼru chi elk saʼ li tenamit Babilonia. Xbʼaan naq wank cheekebʼ ut yajebʼ ut kaahibʼ po kiʼajmank re naq teʼruuq chi wulak saʼ li tenamit Jerusalen. Laj Ciro kixye rehebʼ li inkʼaʼ keʼru chi xik: ‹Kʼemaq oor, plaat ut li maatan rehebʼ li teʼxik xyiibʼankil li Rochoch li Yos li wank Jerusalen›.

Naq ebʼ laj Israel kohebʼ saʼ li tenamit Jerusalen keʼxkʼam naabʼal li maatan. Ut laj Ciro kixkʼe rehebʼ li sekʼ re oor ut plaat li kirisi chaq laj Nabucodonosor saʼ li Rochoch li Jehobʼa. Joʼkan naq, naabʼal li kʼaʼaq re ru keʼxkʼam chirixebʼ.

Kaahibʼ po tana kinumeʼk naq keʼwulak ebʼ laj Israel saʼ li tenamit Jerusalen. Aran kitzʼaqlok li 70 chihabʼ naq kikʼatmank li tenamit Jerusalen ut naq keʼkʼameʼk choʼq moos ebʼ laj Israel. Usta keʼsutqʼiik saʼ li xtenamitebʼ toj keʼxkʼul naabʼal li rahilal.