Keʼxyiibʼ Wiʼ Chik li Rochoch li Yos

NAABʼALEBʼ laj Israel keʼelk chaq Babilonia. Ut naq keʼwulak saʼ li tenamit Jerusalen maaʼani keʼxtaw aran. Joʼkan naq ebʼ laj Israel keʼok xyiibʼankil wiʼ chik li tenamit Jerusalen.

Ebʼ laj Israel keʼxyiibʼ xbʼeenwa xnaʼaj bʼarwiʼ teʼxbʼaanu li mayej chiru li Jehobʼa. Naq keʼnumeʼk li po, keʼok xyiibʼankil li Rochoch li Jehobʼa. Ebʼ li xikʼ nekeʼilok, keʼok xsebʼesinkilebʼ laj Israel re naq teʼxkanabʼ xyiibʼankil li Rochoch li Yos. Naq laj Ciro kikamk, keʼxkʼe jun chik li awabʼej saʼ li tenamit Persia. Ebʼ li xikʼ nekeʼilok keʼxbʼaanu naq li awabʼej aʼin, tixkʼe jun li chaqʼrabʼ re naq inkʼaʼ teʼxchoy xyiibʼankil li Rochoch li Yos.

Ak 17 chihabʼ relikebʼ laj Israel saʼ li tenamit Babilonia naq li Yos kixtaqla laj Ageo ut laj Zacarias, chi xyeebʼal rehebʼ laj Israel naq teʼoq xyiibʼankil wiʼ chik li Rochoch li Yos. Ebʼ laj Israel nekeʼxnaw naq li Yos ttenqʼanq rehebʼ, joʼkan keʼok chi kʼanjelak chirix li ochoch, usta li chaqʼrabʼ naxye naq inkʼaʼ teʼkabʼlaq.

Joʼkan naq laj Tatenai, jun rehebʼ laj puubʼ re Persia, kixye rehebʼ laj Israel naq kʼaru xwankilebʼ naq yookebʼ xyiibʼankil li Rochoch li Yos. Ebʼ laj Israel keʼxye re laj puubʼ naq laj Ciro, li awabʼej re Babilonia, kixye rehebʼ: ‹Ayuqex saʼ li tenamit Jerusalen ut yiibʼamaq aran li Rochoch li Jehobʼa, leeYos›.

Laj Ciro ak kamenaq, joʼkan naq laj Tatenai kixtaqla jun li hu saʼ li tenamit Babilonia re xnawbʼal ma laj Ciro kitaqlank rehebʼ laj Israel chi xyiibʼankil li Rochoch li xYosebʼ. Tojaʼ naq laj Dario, li awabʼej re Persia, kixye naq aʼan xtaqlahom laj Ciro. Laj Dario kixtaqla xyeebʼal re laj Tatenai: ‹Kanabʼomaq naq ebʼ laj Israel teʼxbʼaanu wiʼ chik li Rochoch li xYosebʼ ut tenqʼamaqebʼ chi xbʼaanunkil›. Chiru kaahibʼ chihabʼ tana keʼxchoy xyiibʼankil li Rochoch li Yos, joʼkan naq sahebʼ saʼ xchʼool.

Anaqwan, 48 chihabʼ tana xyiibʼankil li Rochoch li Jehobʼa. Ebʼ laj Israel li wankebʼ Jerusalen nebʼaʼebʼ. Li tenamit ut li Rochoch li Yos moko chʼinaʼus ta nekeʼkʼutunk. Laj Esdras wank chaq Babilonia naq keʼxye naq aajel ru xyiibʼankil li Rochoch li Yos. Ma nakaanaw kʼaru kixbʼaanu laj Esdras naq kixnaw aʼin?

Laj Esdras kiwulak sikʼbʼal laj Artajerjes, li awabʼej re Persia. Laj Artajerjes chaabʼil awabʼej. Kixkʼe re laj Esdras naabʼal li maatan re naq tixkʼam Jerusalen. Laj Esdras kixye rehebʼ laj Israel li wankebʼ Babilonia naq ttenqʼaaq chi xkʼambʼal li maatan. Kohebʼ tana 6.000 chi winq chirix ut keʼxkʼam naabʼal li plaat, li oor ut ebʼ li kʼaʼaq re ru.

Laj Esdras yook xkʼaʼuxl xbʼaan naq naabʼalebʼ laj elqʼ saʼ bʼe ut naru teʼkamsiiq xbʼaan li kʼaʼaq re ru. Joʼkan naq laj Esdras kixchʼutubʼebʼ laj Israel joʼ nakʼutunk saʼ li eetalil. Chirix chik aʼan laj Esdras kiʼok chi tijok chiru li Jehobʼa re naq maakʼaʼ teʼxkʼul naq teʼsutqʼiiq saʼ li tenamit Jerusalen.

Li Jehobʼa kixtenqʼahebʼ chiru li kaahibʼ po naq yookebʼ chi xik saʼ li tenamit Jerusalen. Li tzolom aʼin naxkʼut chiqu naq li Jehobʼa naru tooxkol wi kʼojkʼo qachʼool rikʼin.