Kʼanjelan chiru li Jehobʼa ut inkʼaʼ chiru laj Tza

Chiqajunilo tqasikʼ kʼaru xbʼaanunkil. Kʼanjelak chiru li Jehobʼa malaj chiru laj Tza ut ebʼ li maaʼus aj musiqʼej. Inkʼaʼ naru tqabʼaanu saʼ wiibʼ li naʼlebʼ aʼin. Qʼaxal chaabʼil kʼanjelak chiru li Jehobʼa!

Qʼaxal chaabʼil li Jehobʼa

Ebʼ li maaʼus aj musiqʼej nekeʼwulak chiru xbʼalaqʼinkil ut xrahobʼtesinkil ebʼ li qas qiitzʼin. Li Jehobʼa moko joʼkan ta xnaʼlebʼ. Aʼan naxrahebʼ li qas qiitzʼin joʼ jun yuwaʼbʼej naxrahebʼ li ralal xkʼajol. Rikʼin aʼan chalenaq «chixjunil li usilal kʼeebʼil qe ut chixjunil li qamaatan li tzʼaqal re ru» (Santiago 1:​17). Aʼan kixkʼe qe chixjunil li chaabʼil ut re xbʼaanunkil aʼin kixmayeja li Ralal saʼ qakʼabʼaʼ (Efesios 2:4-7).

Kʼoxla li kixbʼaanu li Jesús arin saʼ Ruuchichʼochʼ. Kixkʼe chi ilok ebʼ li mutzʼ, kixkʼe chi aatinak ebʼ li mem, kixkʼirtasihebʼ li saqlep rix ut ebʼ li yeq roq. Kirisihebʼ li maaʼus aj musiqʼej ut kirisi yalaq kʼaru chi yajel. Saʼ xkʼabʼaʼ li xwankilal li Yos, kixwaklesihebʼ wiʼ chik chi yoʼyo ebʼ li kamenaq (Mateo 9:32-35; 15:30, 31; Lucas 7:11-15).

Li Yos maajunwa nokooxtikʼtiʼi, junelik naxye li yaal (Números 23:19).

Tzʼeqtaana ebʼ li yibʼ aj naʼlebʼ

Joʼ naq jun li raxyaat, natʼaneʼk saʼ li xkemom aj am, joʼkan ajwiʼ nekeʼxkʼul ebʼ li qas qiitzʼin li nekeʼxpaabʼ yalaq kʼaru chi naʼlebʼ ut tikʼtiʼ. Nekeʼxxuwa ruhebʼ li kamenaq ut ebʼ li maaʼus aj musiqʼej. Nekeʼok xkʼaʼuxl xbʼaan li maajewank li truuq kʼemank saʼ xbʼeenebʼ, joʼkan naq nekeʼxsikʼ ebʼ li kʼaʼaq re ru re xkolbʼalebʼ ribʼ. Li tikʼtiʼ li naxkʼut laj Tza ut ebʼ li maaʼus aj musiqʼej aʼan chik li nataqlank saʼebʼ li xyuʼam. Abʼan ebʼ laj kʼanjel chiru li Yos inkʼaʼ nekeʼtʼaneʼk saʼebʼ li naʼlebʼ aʼin.

Li Jehobʼa qʼaxal nim xwankil chiru laj Tza. Wi tatkʼanjelaq chiru, naru tatxkol chiruhebʼ li maaʼus aj musiqʼej (Santiago 4:7). Wi ebʼ laj tuul teʼraj xbʼaanunkil junaq li maaʼusilal aawe moko teʼruuq ta. Jun eetalil, aran Nigeria wankebʼ oxibʼ laj tuul li keʼxtuula jun li hermaan re xkamsinkil xbʼaan naq inkʼaʼ kiraj elk saʼ li xkʼalebʼaal. Naq li hermaan inkʼaʼ kikamk, jun rehebʼ xbʼaan xxiw xkoho xpatzʼbʼal xkuybʼal xmaak chiru li hermaan.

Wi ebʼ li maaʼus aj musiqʼej tateʼxchʼiʼchʼiʼi, chayaabʼa li xkʼabʼaʼ li Jehobʼa ut aʼan tkoloq aawe (Proverbios 18:10). Abʼan re naq li Jehobʼa tatxkol tento naq taatzʼeqtaana chixjunil li naʼlebʼ li naʼok saʼ li tuulak ut xloqʼoninkil ruhebʼ li maaʼus aj musiqʼej. Joʼkan keʼxbʼaanu ebʼ laj paabʼanel re Éfeso. Keʼxchʼutubʼ chixjunil li xhuhebʼ re tuulak ut keʼxkʼat (Hechos 19:​19, 20). Joʼkan ajwiʼ nekeʼxbʼaanu ebʼ laj paabʼanel saʼebʼ li qakutan. Inkʼaʼ nekeʼroksi ebʼ li kʼaʼaq re ru li nekeʼxkʼoxla naq tkoloq rehebʼ, ebʼ li tasal hu ut chixjunil li naʼlebʼ li naʼok saʼ li tuulak.

Yuʼami li tzʼaqal paabʼal

Wi nakaawaj xsahobʼresinkil xchʼool li Yos, moko kaʼaj tawiʼ taatzʼeqtaana li bʼalaqʼil paabʼal ut li yibʼ aj naʼlebʼ. Tento naq junelik yooqat xyuʼaminkil li tzʼaqal loqʼonink. Li Santil Hu naxye li naʼajmank:

Loqʼoni li Yos rikʼinebʼ laj testiiw re li Jehobʼa

Saʼ Ruuchichʼochʼ wankebʼ qas qiitzʼin li nekeʼxkʼut li yibʼ aj naʼlebʼ li nachalk rikʼin laj Tza ut ebʼ li maaʼus aj musiqʼej. Abʼan wank ajwiʼ jun chʼuut li qas qiitzʼin li nekeʼxyuʼami ut nekeʼxkʼut li chaabʼil naʼlebʼ li nachalk rikʼin li Jehobʼa. Aʼanebʼ laj testiiw re li Jehobʼa (Isaías 43:10). Saʼ chixjunil li Ruuchichʼochʼ wank numenaq 8 miyon ebʼ laj testiiw re li Jehobʼa. Chixjunilebʼ nekeʼxkʼe xchʼool chi tenqʼank ut xkʼutbʼal li yaal chiruhebʼ li junchʼol. Saʼ jalan jalanq li tenamit naru taatawebʼ saʼebʼ li Chʼutlebʼaal Kabʼl, bʼarwiʼ tateʼxkʼul chi sahebʼ saʼ xchʼool.

Li xkʼanjelebʼ aʼan xtenqʼankil ebʼ li junchʼol re naq teʼoq chi kʼanjelak chiru li Yos. Ebʼ aʼan, teʼxkʼe aatzolbʼal chirix li Santil Hu saʼ laawochoch ut teʼxkʼut chaawu chanru xloqʼoninkil li Yos chi tzʼaqal re ru. Ma joʼnimal taatoj naq taatzol li Santil Hu. Ebʼ laj testiiw re li Jehobʼa sahebʼ saʼ xchʼool chi xkʼutbʼal li yaal xbʼaan naq nekeʼxra li Jehobʼa ut ebʼ li qas qiitzʼin.