Tchʼinaʼusoʼq laayuʼam saʼ li kutan chalk re

Laj Tza ut ebʼ li maaʼus aj musiqʼej moko junelik ta teʼxbʼalaqʼi ebʼ li kristiʼaan. Li Jehobʼa ak xrisihebʼ chaq saʼ choxa (Apocalipsis 12:9). Chi seebʼ li Yos tixchap wiʼ chik laj Tza ut ebʼ li maaʼus aj musiqʼej. Saʼ jun li moy u li chalenaq rikʼin li Yos, laj Juan kixye: «Chirix chik aʼan kiwil jun li ánjel yo chaq chi kubʼeek saʼ choxa: wan chaq saʼ ruqʼ li xlaawil li Siwan joʼwiʼ jun li nimla kareen. Kixchap li nimla xul, li najter kʼantiʼ (aʼan laj tza, li maaʼus) ut kixbʼakʼ chi kareen chiru jun mil chihabʼ. Ut kixkut saʼ li Siwan, kixmuq chisaʼ ut kixtzʼap xbʼeen li okebʼaal rikʼin tzʼaplebʼ re naq inkʼaʼ chik tixbʼalaqʼihebʼ li tenamit, toj taatzʼaqloq jun mil chihabʼ» (Apocalipsis 20:1-3). Moqon laj Tza ut ebʼ li maaʼus aj musiqʼej teʼsacheʼq chi junajwa (Apocalipsis 20:10).

Teʼsacheʼq ajwiʼ ebʼ li kristiʼaan li maaʼusebʼ xnaʼlebʼ li wankebʼ saʼ Ruuchichʼochʼ (Salmo 37:9, 10; Lucas 13:5).

Ebʼ li kamenaq teʼwakliiq wiʼ chik chi yoʼyo!

Naq ak xsach laj Tza ut ebʼ li maaʼus aj musiqʼej, li Yos tixkʼam chaq naabʼal li osobʼtesihom saʼ xbʼeenebʼ li kristiʼaan. Jultika naq ebʼ li kamenaq maakʼaʼ chik nekeʼrekʼa. Li Jesús kixjuntaqʼeeta li kamk rikʼin li wark... naq junaq kamenaq chi wark maakʼaʼ chik narekʼa (Juan 11:11-14). Kixye aʼin xbʼaan naq twulaq li qʼehil naq li yookebʼ chi wark saʼ li kamk teʼajsiiq ru, re naq teʼwanq wiʼ chik xyuʼam. Kixye: «Misachk eechʼool rikʼin aʼin, xbʼaan naq twulaq xqʼehil naq chixjunilebʼ li wanqebʼ saʼ muqlebʼaal kamenaq [...] teʼelq chaq» (Juan 5:28, 29; juntaqʼeeta rikʼin Hechos 24:15).

Teʼwakliiq wiʼ chik chi yoʼyo arin saʼ Ruuchichʼochʼ. Inkʼaʼ chik t-abʼimanq ebʼ li esil chirixebʼ li kristiʼaan li xeʼkamk, t-abʼimanq bʼan li chaabʼil esil chirixebʼ li kristiʼaan li teʼwakliiq wiʼ chik chi yoʼyo! Kʼajoʼaq xsahil qachʼool chi xkʼulbʼalebʼ li qakomon li teʼwakliiq wiʼ chik chi yoʼyo!