Tzolom 12

Kʼaru naqakʼul naq nokookamk?

Li kamk moko juntaqʼeet ta rikʼin li yuʼam. Chanchan naq warenaqo (Juan 11:11-14). Ebʼ li kamenaq inkʼaʼ chik nekeʼabʼink, chi moko nekeʼilok, chi moko nekeʼaatinak, chi moko nekeʼkʼoxlak (Eclesiastés 9:5, 10). Li bʼalaqʼil paabʼal naxkʼut naq ebʼ li kamenaq nekeʼxik saʼ li xnaʼajebʼ li musiqʼej re naq teʼwanq rikʼinebʼ li xeʼtoon. Abʼan moko aʼan ta naxkʼut li Santil Hu.

Ebʼ li kamenaq moko nekeʼruhank ta chik qatenqʼankil chi moko qarahobʼtesinkil. Ebʼ li poyanam kʼaynaqʼebʼ chi xbʼaanunkil li najteril naʼlebʼ ut li mayejak xbʼaan naq nekeʼxkʼoxla naq ebʼ li kamenaq nekeʼwulak chiru aʼin. Abʼanan li najteril naʼlebʼ aʼin inkʼaʼ nawulak chiru li Yos xbʼaan naq wank rubʼel xwankil xtikʼtiʼ laj Tza. Inkʼaʼ ajwiʼ naru xsahobʼresinkilebʼ xchʼool li kamenaq xbʼaan naq maakʼaʼebʼ chik xyuʼam, joʼkan naq moko us ta naq tqaxuwahebʼ, chi moko tqaloqʼonihebʼ ta ru. Tento naq kaʼajwiʼ li Yos tqaloqʼoni ru (Mateo 4:10).

Ebʼ li kamenaq teʼwakliiq wiʼ chik chi yoʼyo. Saʼ li kutan chaalel li Jehobʼa trajsihebʼ li kamenaq re naq teʼwanq saʼ li sahilal naʼajej arin saʼ Ruuchichʼochʼ (Juan 5:28, 29; Hechos 24:15). Li Yos naru narajsihebʼ li kamenaq joʼ naq laaʼo naqajsihebʼ li yookebʼ chi wark (Marcos 5:22, 23, 41, 42).

Nayeemank naq inkʼaʼ nokookamk abʼan aʼan tikʼtiʼ; laj Tza naxbʼaanu naq naabʼalebʼ teʼxpaabʼ. Laj Tza ut ebʼ li maaʼus aj musiqʼej nekeʼxbʼaanu naq ebʼ li poyanam teʼxkʼoxla naq toj yoʼyookebʼ li xmusiqʼ ebʼ li kamenaq ut naq nekeʼkʼehok yajel ut chʼaʼajkilal. Laj Tza naxbʼalaqʼihebʼ li poyanam wank naq rikʼin matkʼ malaj rikʼin moy u. Joʼkan naq li Jehobʼa naxtzʼeqtaanahebʼ li nekeʼxyal aatinak rikʼinebʼ li kamenaq (Deuteronomio 18:10-12).