TZOLOM 29
Ma wank kʼaru nakanaak chi yoʼyo naq nokookamk?
Ma ak xkamk junaq laakomon malaj aawamiiw? Maare xbʼaan xrahil aachʼool nakaakʼoxla: «Ma wank kʼaru nakanaak chi yoʼyo naq nokookamk? Ma tooruuq wiʼ chik rilbʼalebʼ saʼ junaq kutan?». Saʼ li tzolom aʼin ut saʼ li jun chik tqatzʼil rix li naxye li Santil Hu chirix ebʼ li patzʼom aʼin.
1. Ma wank kʼaru nakanaak chi yoʼyo naq nokookamk?
Li Jesús kixjuntaqʼeeta li kamk rikʼin li wark. Chanru naq juntaqʼeet li kamk rikʼin li wark? Naq jun li qas qiitzʼin kamenaq chi wark inkʼaʼ naxnaw kʼaru yook chi kʼulmank. Naq nakamk junaq li qas qiitzʼin maakʼaʼ chik li rahilal naxkʼul. Li Santil Hu naxye: «Li kamenaqebʼ maakʼaʼ nekeʼxnaw» (yaabʼasi Eclesiastés 9:5).
2. Kʼaru rusilal naqataw naq naqanaw li yaal chirix li kamk?
Naabʼalebʼ li qas qiitzʼin nekeʼxxiwa li kamk ut ebʼ li kamenaq. Wi joʼkan nakaakʼul laaʼat li naxye li Santil Hu chirix aʼin naru naxkʼojobʼ aachʼool. Li Jesús kixye: «Li yaal taaʼachʼabʼanq eere» (Juan 8:32). Wankebʼ li paabʼal nekeʼxkʼut naq wank kʼaru nakanaak chi yoʼyo naq nakamk junaq li kristiʼaan, abʼan li Santil Hu moko naxkʼut ta aʼin. Maaʼani naxkʼul li rahilal naq ak kamenaq chik. Xbʼaan naq maakʼaʼ chik nekeʼxnaw inkʼaʼ nekeʼruuk qarahobʼtesinkil malaj qasebʼesinkil (qaxibʼenkil). Joʼkan naq moko aajel ta ru naq tootijoq chirixebʼ malaj tqabʼaanu junaq li naʼlebʼ re xloqʼoninkilebʼ re naq inkʼaʼ teʼpoʼq qikʼin.
Wankebʼ nekeʼxye naq naru nekeʼaatinak rikʼinebʼ li kamenaq, abʼan aʼin moko yaal ta. Joʼ xqatzol ebʼ li kamenaq «maakʼaʼ nekeʼxnaw». Li nekeʼxkʼoxla naq yookebʼ chi aatinak rikʼinebʼ li kamenaq, yookebʼ bʼan chi aatinak rikʼinebʼ li maaʼus aj musiqʼej li nekeʼxkʼut ribʼ joʼ li ak kamenaqebʼ chik. Joʼkan naq xnawbʼal li yaal chirix li kamenaq nokooxkol chiruhebʼ li maaʼus aj musiqʼej. Li Jehobʼa kixye qe naq inkʼaʼ tooʼaatinaq rikʼinebʼ li kamenaq xbʼaan naq naxnaw naq xiwxiw aatinak rikʼinebʼ li maaʼus aj musiqʼej (yaabʼasi Deuteronomio 18:10-12).
QASIKʼAQ XCHAMAL LI NAʼLEBʼ
Qatzolaq xkomon li naʼlebʼ li naxkʼe li Santil Hu chirix li kamk. Ut qilaq chanru xkʼojobʼankil aachʼool rikʼin li Yos li nokooxra ut inkʼaʼ naxrahobʼtesi ebʼ li kamenaq.
3. Li yaal chirix li kamk
Saʼ chixjunil li ruuchichʼochʼ wank jalan jalanq li naʼlebʼ chirix li kamk. Abʼan chʼolchʼo naq moko yaal ta chixjunil aʼin.
Kʼaru nekeʼxpaabʼ li kristiʼaan saʼ laateep chirixebʼ li kamenaq?
Re xnawbʼal kʼaru chik naxye li Santil Hu cheerilaq li BʼIDEO.
Cheeyaabʼasi Eclesiastés 3:20 ut chexʼaatinaq chirix ebʼ li patzʼom aʼin:
Joʼ ak xqayaabʼasi, kʼaru nekeʼxkʼul li kristiʼaan naq ak xeʼkamk?
Ma wank kʼaru nakanaak chi yoʼyo naq nakamk junaq li kristiʼaan?
Li Santil Hu naʼaatinak chirix li xkamik laj Lázaro li ramiiw li Jesús. Naq kikamk laj Lázaro, kʼaru kixye li Jesús chirix? Cheeyaabʼasi Juan 11:11-14 ut chexʼaatinaq chirix ebʼ li patzʼom aʼin:
Rikʼin kʼaru kixjuntaqʼeeta li Jesús li kamk?
Kʼaru naxkʼut aʼin chiqu chirixebʼ li kamenaq?
Kʼaru nakaakʼoxla chirix li naxye li Santil Hu chirix li kamk?
4. Li yaal chirix li kamk nokooxkol
Naq naqatzol li yaal chirix li kamk inkʼaʼ chik naqaxiwa ebʼ li kamenaq. Cheeyaabʼasi Eclesiastés 9:10 ut chexʼaatinaq chirix li patzʼom aʼin:
Ma naru nokooʼeʼxrahobʼtesi ebʼ li kamenaq?
Wi naqapaabʼ li naxye li Santil Hu chirix li kamk inkʼaʼ tootʼaneʼq saʼ li tikʼtiʼ li naxye naq tento tqaloqʼoni ruhebʼ li kamenaq re naq inkʼaʼ teʼpoʼq qikʼin. Cheeyaabʼasi Isaías 8:19 ut Apocalipsis 4:11 ut chexʼaatinaq chirix li patzʼom aʼin:
Kʼaru nakaaye, kʼaru tawiʼ narekʼa li Jehobʼa naq ebʼ li qas qiitzʼin nekeʼxloqʼoni ut nekeʼxsikʼ xtenqʼ rikʼinebʼ li kamenaq?
Li yaal chirix li kamk nokooxkol chiruhebʼ li naʼlebʼ li inkʼaʼ nawulak chiru li Jehobʼa.
5. Li yaal chirix li kamk naxkʼojobʼ qachʼool
Wankebʼ li kristiʼaan nekeʼyeheʼk re naq teʼrahobʼtesiiq naq teʼkamq wi maaʼusebʼ xnaʼlebʼ. Us xnawbʼal naq maaʼani trahobʼtesiiq naq ak kamenaq chik, chi moko li yibʼebʼ ru xnaʼlebʼ teʼxkʼul aʼin. Cheeyaabʼasi Romanos 6:7 ut chexʼaatinaq chirix li patzʼom aʼin:
Joʼ naxye li Santil Hu, rikʼin li kamk naqatoj rix li qamaak, joʼkan naq ma nekeʼrahobʼtesiik li ak xeʼkamk saʼ xkʼabʼaʼ li xeʼxbʼaanu naq toj yoʼyokebʼ?
Naq naqanaw ru chiʼus li Jehobʼa naqakʼe reetal naq aʼan moko naxrahobʼtesihebʼ ta li kamenaq. Cheeyaabʼasi Deuteronomio 32:4 ut 1 Juan 4:8 ut chexʼaatinaq chirix ebʼ li patzʼom aʼin:
Wi li Yos aj rahonel ma tixkanabʼ raj naq teʼrahobʼtesiiq ebʼ li kamenaq?
Ma naxkʼojobʼ aachʼool xnawbʼal li yaal chirix li kamenaq? Kʼaʼut?
WIIBʼ OXIBʼ NEKEʼXYE: «Ninxiwa li tinkʼul naq ak xinkamk chik».
Kʼaru xraqal li Santil Hu twoksi re xkʼojobʼankil xchʼool?
LI AK XQATZOL
Naq nakamk junaq, naraqeʼk li xyuʼam. Ebʼ li kamenaq inkʼaʼ nekeʼrahobʼtesiik chi moko nokooʼeʼxsebʼesi.
Qajultikaq
Ma wank kʼaru nakanaak chi yoʼyo naq nokookamk?
Kʼaʼut nokooxkol xnawbʼal li yaal chirix li kamk?
Kʼaʼut naxkʼojobʼ qachʼool xnawbʼal li yaal chirix li kamk?
SIKʼ XKOMON LI NAʼLEBʼ
Kʼe reetal ma naxkʼut li Santil Hu ma wank kʼaru nakanaak chi yoʼyo naq nokookamk.
«Ma wank kʼaru nakanaak chi yoʼyo naq nokookamk?» (Li naʼlebʼ re jw.org)
Tzol wi li Yos naxrahobʼtesi ebʼ li qas qiitzʼin saʼ xaml.
Ma tqaxiwahebʼ ru li kamenaq?
Ebʼ li kamenaq... Ma nokooʼeʼxtenqʼa malaj nokooʼeʼxrahobʼtesi?
Kʼe reetal chanru jun li winq kikʼojobʼaak xchʼool naq kixnaw li yaal chirix li kamk.
«Sachso inchʼool xinkanaak naq xwil li naxye li Santil Hu» (Laj Kʼaakʼalehom, 1 re febrero 2015)