Li Yos naxyiibʼ li choxa ut li Ruuchichʼochʼ

Li Jehobʼa kiyobʼtesink qe. Aʼan kixyiibʼ chixjunil: li naʼilmank ut li inkʼaʼ naʼilmank ru. Naq toj maajiʼ naxyiibʼ li naqil ru, xbʼeenwa kixyobʼtesi naabʼalebʼ li anjel. Ma nakaanaw anihebʼ li anjel? Li Jehobʼa kixkʼehebʼ xyuʼam ut chanchanebʼ joʼ aʼan. Laaʼo inkʼaʼ nokooruuk rilbʼal li Jehobʼa chi moko ebʼ li anjel. Li xbʼeen anjel li kixyobʼtesi li Jehobʼa kiwank choʼq aj tenqʼahom re. Aʼan kitenqʼank re chi xyiibʼankil li chahim ut chixjunil li kʼaʼaq re ru. Jun rehebʼ li kʼaʼaq re ru aʼin aʼan li Ruuchichʼochʼ, li qanaʼaj.

Chirix chik aʼan li Jehobʼa kixkʼubʼ li Ruuchichʼochʼ re naq ebʼ li xul ut ebʼ li poyanam teʼruuq chi wank chisaʼ. Kixbʼaanu naq li Saqʼe tixkutanobʼresi li Ruuchichʼochʼ. Joʼkan ajwiʼ, kixbʼaanu ebʼ li kʼicheʼ, li palaw ut ebʼ li nimaʼ.

Ut kʼaru kikʼulmank moqon? Li Jehobʼa kixye: «Tinbʼaanu ebʼ li ichaj, ebʼ li cheʼkʼaam ut ebʼ li nimla cheʼ». Ut chi joʼkan kiʼok chi moq jalan jalanq xpaayil ebʼ li kiʼilqʼeen, ebʼ li xeʼpim ut ebʼ li uutzʼuʼuj. Li Jehobʼa kixyobʼtesi ajwiʼ naabʼal xpaayil li xul: li nekeʼrupupik, li nekeʼnumxik ut li nekeʼxjukuki ribʼ. Kixyobʼtesi ebʼ li kokʼ xul, joʼ li imul, ut ebʼ li nimla xul, joʼ ebʼ li elefante. Bʼar wank rehebʼ li xul nawulak chaawu?

Tojaʼ naq li Jehobʼa kixye re li xbʼeen anjel: «Qayobʼtesihaq li winq». Ebʼ li poyanam jalanaqebʼ chiruhebʼ li xul. Teʼruuq xyiibʼankil li nekeʼraj, aatinak, seʼek ut tijok chiru li Yos. Teʼril li Ruuchichʼochʼ ut ebʼ li xul. Ma nakaanaw ani li xbʼeen winq? Qilaq aʼin.