Oksi li eetalil re kʼutuk

Mateo 13:34, 35

WIIBʼ OXIBʼ LI AATIN: Re xkʼebʼal xsahobʼ ru li yookat xkʼutbʼal, oksi ebʼ li eetalil li teʼxtaw ru, teʼraj rabʼinkil ut tixkʼut li naʼlebʼ li wank xwankil.

CHANRU XBʼAANUNKIL

• Oksi li eetalil li inkʼaʼ chʼaʼaj xtawbʼal ru. Kʼam aawe rikʼin li Jesus: oksi li kokʼ eetalil re xchʼolobʼankil junaq li nimla naʼlebʼ ut oksi li eetalil li inkʼaʼ chʼaʼaj xtawbʼal ru re xchʼolobʼankil junaq li naʼlebʼ li jwal chʼaʼaj. Maaye li inkʼaʼ naʼajmank re naq inkʼaʼ chʼaʼajkaq xtawbʼal ru li eetalil. Kʼe reetal naq li eetalil tixchap ribʼ rikʼin li naʼlebʼ li taawaj xkʼutbʼal re naq inkʼaʼ teʼxkʼoxla jalan chik li naʼlebʼ.

• Kʼoxla li nekeʼraj. Oksi ebʼ li eetalil li tixchap ribʼ rikʼin li kʼanjel li nekeʼxbʼaanu malaj li naʼlebʼ li teʼraj rabʼinkil. Maaʼani taakʼe saʼ xutaan chi moko taatochʼebʼ xchʼool.

• Chʼolobʼ li naʼlebʼ li taawaj xkʼutbʼal. Ebʼ li eetalil li taawoksi tento tkʼanjelaq re xchʼolobʼankil li xnimal ru naʼlebʼ ut inkʼaʼ yal re xchʼolobʼankil li xtzʼaqobʼ li naʼlebʼ. Tento taakʼe reetal naq teʼxjultika li naʼlebʼ li taawaj xkʼutbʼal ut maawaʼ kaʼajwiʼ li eetalil.