Kʼaru naʼajmank re naq li Yos tixkʼulubʼa li qapaabʼal?

Joʼ xqatzol saʼ li tzolom 13 li Yos moko naxkʼulubʼa ta chixjunilebʼ li paabʼal. Abʼan, naru naqaloqʼoni ru li Yos joʼ nawulak chiru re xsahobʼresinkil li xchʼool. Bʼar wank «li tzʼaqal paabʼank» li naxkʼulubʼa li Yos? (Santiago 1:27). Qilaq li naxkʼut li Santil Hu.

1. Bʼar naxye chanru tqaloqʼoni ru li Yos?

Saʼ li Santil Hu naqataw chanru xloqʼoninkil ru li Yos. Li Jesús kixye re li Yos: «Laawatin aʼan li yaal» (Juan 17:17). Wankebʼ li paabʼal inkʼaʼ nekeʼxkʼe saʼ ajl li naxye li Santil Hu nekeʼxkʼe bʼan xwankil li xnaʼlebʼebʼ ut xbʼaanuhomebʼ li winq. Abʼan li Jehobʼa inkʼaʼ nasahoʼk saʼ xchʼool rikʼinebʼ li nekeʼtzʼeqtaanank re «li xchaqʼrabʼ» (yaabʼasi Marcos 7:9). Naqasahobʼresi bʼan xchʼool naq naqaloqʼoni ru joʼ naxye li Santil Hu ut naqayuʼami li xchaqʼrabʼ.

2. Chanru tqaloqʼoni ru li Jehobʼa?

Kaʼajwiʼ li Jehobʼa tqaloqʼoni ru xbʼaan naq aʼan kiyobʼtesink qe (Apocalipsis 4:11). Aʼin naraj xyeebʼal naq kaʼajwiʼ aʼan tqara ut tqaloqʼoni ru joʼkan naq inkʼaʼ tqoksi junaq chik eetalil chi moko junaq li pechʼbʼil yos re xloqʼoninkil ru (yaabʼasi Isaías 42:8).

Li loqʼonink li tqakʼe re li Jehobʼa tento naq saantaqaq ut naq twulaq chiru (Romanos 12:1). Aʼin naraj xyeebʼal naq tento tqayuʼami li chaabʼil naʼlebʼ li naqataw saʼ li Santil Hu. Jun eetalil, li nekeʼxra li Jehobʼa nekeʼroxloqʼi li naxye chirix li sumlaak. Nekeʼxtzʼeqtaana ajwiʼ li yibʼru aj naʼlebʼ joʼ li mayibʼk ut li bʼan li nakanobʼresink u malaj li kalaak.a

3. Kʼaʼut tento tqaloqʼoni ru li Jehobʼa rikʼinebʼ li qech aj paabʼanel?

Rajlal xamaan naru naqanima ru «li Qaawaʼ [...] saʼ li loqʼlaj chʼutam» (Salmo 111:1, 2). Naru naqabʼaanu aʼin naq nokoobʼichank chiru (yaabʼasi Salmo 104:33). Li Jehobʼa naraj naq tooxik saʼebʼ li chʼutam xbʼaan naq nokooxra ut naxnaw naq aʼin tooxtenqʼa re xtawbʼal li junelik yuʼam. Ut naq naqachʼutubʼ qibʼ naqawaklesi qachʼool chiqibʼil qibʼ.

QASIKʼAQ XCHAMAL LI NAʼLEBʼ

4. Moko us ta roksinkil ebʼ li pechʼbʼil yos re xloqʼoninkil ru li Jehobʼa

BʼIDEO: Ma naraj li Yos naq tqoksi ebʼ li pechʼbʼil yos re xloqʼoninkil ru? (3:26)

• Kʼaru keʼxkʼul ebʼ laj Israel naq keʼroksi jun li pechʼbʼil yos re xloqʼoninkil ru li Jehobʼa?

Wankebʼ kristiʼaan li nekeʼrekʼa naq nekeʼjilok chixkʼatq li Yos naq nekeʼroksi jun li pechʼbʼil yos. Ma inkʼaʼ tawiʼ yookebʼ xtzʼeqtaanankil li Yos naq nekeʼxbʼaanu aʼin? Cheeyaabʼasi Éxodo 20:4-6 ut Salmo 106:35, 36 ut chexʼaatinaq chirix ebʼ li patzʼom aʼin:

• Kʼaru ebʼ li pechʼbʼil yos malaj ebʼ li eetalil nekeʼroksi li kristiʼaan re xloqʼoninkil ru li Yos?

• Kʼaru naxkʼoxla li Jehobʼa naq naʼoksimank ebʼ li pechʼbʼil yos?

• Kʼaru nakaakʼoxla laaʼat chirix roksinkil ebʼ li pechʼbʼil yos?

5. Wi kaʼajwiʼ li Jehobʼa tqaloqʼoni ru tqakol qibʼ chiru li bʼalaqʼil naʼlebʼ

BʼIDEO: Li yaal kikolok we (5:16)

Cheeyaabʼasi Salmo 91:14 ut chexʼaatinaq chirix li patzʼom aʼin:

• Wi naqakʼutbʼesi re li Jehobʼa naq naqara ut naq kaʼajwiʼ aʼan tqaloqʼoni ru, kʼaru naxyeechiʼi qe?

6. Saʼebʼ li qachʼutam naqaloqʼoni ru li Jehobʼa

Naq nokootzʼaqonk saʼebʼ li chʼutam ut nokoobʼichank naqaloqʼoni ru li Jehobʼa ut naqawaklesi qachʼool chiqibʼil qibʼ. Cheeyaabʼasi Salmo 22:23 ut chexʼaatinaq chirix ebʼ li patzʼom aʼin:

• Ma nawulak chaawu rabʼinkil naq nekeʼsumenk saʼebʼ li chʼutam?

• Ma twulaq raj chaawu sumenk saʼebʼ li chʼutam?

7. Kʼajoʼ nawulak chiru li Jehobʼa naq naqaye rehebʼ li junchʼol li yooko xtzolbʼal

Wank jalan jalanq li naʼlebʼ re xseeraqʼinkil rehebʼ li junchʼol li yaal li naxye li Santil Hu. Cheeyaabʼasi Salmo 9:2 ut 34:2 ut chexʼaatinaq chirix li patzʼom aʼin:

• Chirix li ak xaatzol, kʼaru twulaq raj chaawu xseeraqʼinkil rehebʼ li junchʼol?

LI AK XQATZOL

Naqasahobʼresi xchʼool laj Yobʼtesinel naq naqaloqʼoni ru joʼ nawulak chiru, naq naqanima ru saʼebʼ li chʼutam ut naq naqawotz rikʼinebʼ li junchʼol li ak xqatzol.

Qajultikaq

• Bʼar naxye chanru tqaloqʼoni ru li Yos?

• Kʼaʼut kaʼajwiʼ li Jehobʼa tqaloqʼoni ru?

• Kʼaʼut tqaloqʼoni ru li Jehobʼa rikʼinebʼ li qech aj paabʼanel?

SIKʼ XKOMON LI NAʼLEBʼ

Tzol chanru jun li ixq kixkanabʼ xloqʼoninkil ru ebʼ li pechʼbʼil yos, saʼ li resil xyuʼam «Moko wankin ta chik rubʼel xwankil ebʼ li pechʼbʼil yos».

«Li Santil Hu kixjalebʼ xyuʼam» (Laj Kʼaakʼalehom, 1 re julio 2011)

Tzol chanru tatruuq chi sumenk saʼebʼ li chʼutam.

«Qanimaq ru li Jehobʼa saʼ li chʼuut» (Laj Kʼaakʼalehom, enero 2019)

Kʼe reetal chanru li chʼutam kixtenqʼa jun li saaj al usta nachʼaʼajkoʼk chiru wulak.

Li Jehobʼa naxkʼe xchʼool chiwix (3:07)

Naabʼalebʼ li kristiʼaan nekeʼril li krus joʼ reetalil li paabʼal, abʼan ma tqoksi raj aʼin naq nokooloqʼonink?

«Kʼaʼut ebʼ laj testiiw re li Jehobʼa inkʼaʼ nekeʼroksi li krus?» (Li naʼlebʼ re jw.org)