Ye li naʼlebʼ li nekeʼraj rabʼinkil

Li kixbʼaanu li Jesús

BʼIDEO: Li Jesús naʼaatinak rikʼin jun li ixq li wank chire li poos

1. Taawil li BʼIDEO malaj taayaabʼasi Juan 4:​6-9. Chirix chik aʼan taatzʼil rix ebʼ li patzʼom aʼin:

1. Kʼaru kixkʼe reetal li Jesús naq toj maajiʼ naʼok chi aatinak rikʼin li ixq?

2. Li Jesús kixye re: «Kʼe bʼayaq wukʼaʼ». Kʼaʼut naq aʼin jun chaabʼil naʼlebʼ re xtikibʼankil aatinak?

Kʼaru naqatzol rikʼin li Jesús?

2. Maare us tooʼelq wi naqatikibʼ aatinak chirix li nawulak chiru li qas qiitzʼin.

Kʼam aawe rikʼin li Jesús

3. Naru taajal li xaakawresi chaq. Maatikibʼ aatinak chirix li naʼlebʼ li nakaawaj laaʼat, tikibʼ bʼan aatinak chirix li naʼlebʼ li naraj rabʼinkil li jun chik. Joʼkan naq te laakʼaʼuxl, jal li naʼlebʼ li xaakawresi chaq ut bʼaanu aawe ebʼ li patzʼom aʼin:

1. «Kʼaru yook chi abʼimank saʼebʼ li esil?».

2. «Chirix kʼaru nekeʼaatinak ebʼ li wechkabʼal, ebʼ li wechkʼanjel malaj ebʼ li wechtzolom?».

4. Il li wank saʼ laasutam. Bʼaanu aawe ebʼ li patzʼom aʼin:

1. «Kʼaru yook xbʼaanunkil li qas qiitzʼin saʼ li hoonal aʼin? Kʼaru tawiʼ yook xkʼoxlankil?».

2. «Kʼaru naxkʼut chiwu li xtiqibʼankil, li xjunxaqalil ut li rochoch chirix li xpaabʼal malaj li xtenamit?».

3. «Ma xhoonalil aʼin re naq tinʼaatinaq rikʼin?».

5. Kʼe aachʼool chi rabʼinkil.

1. Moko kʼi ta taaye.

2. Kʼe xhoonal re naq t-aatinaq. Naq truhanq, bʼaanu ebʼ li patzʼom.