ULAʼANIHEBʼ
TZOLOM 9
Taw ruhebʼ
Li naxye li Santil Hu: «Sahaq saʼ eechʼool rikʼinebʼ li sahebʼ saʼ xchʼool, yaabʼanqex rikʼinebʼ li nekeʼyaabʼak» (Rom. 12:15).
Li kixbʼaanu li Jesús
1. Taawil li BʼIDEO malaj taayaabʼasi Marcos 6:30-34. Chirix chik aʼan taatzʼil rix ebʼ li patzʼom aʼin:
Kʼaʼut li Jesús ut ebʼ li xʼapóstol xeʼraj xik «saʼ jun li naʼaj bʼarwiʼ teʼruuq chi wank xjunesebʼ»?
Kʼaru kiʼekʼasink re li Jesús re xyeebʼal li Raatin li Yos re li tenamit?
Kʼaru naqatzol rikʼin li Jesús?
2. Naq nokootawok u, naqakʼe qachʼool chirixebʼ li qas qiitzʼin ut naqakʼe chi naweʼk li chaabʼil esil.
Kʼam aawe rikʼin li Jesús
3. Kʼe aachʼool chi rabʼinkil. Maachʼik aawibʼ naq yooq xyeebʼal aawe li narekʼa. Wi naxye aawe kʼaʼut inkʼaʼ naxkʼulubʼa li naʼlebʼ malaj naxye aawe li xkʼaʼuxl ut li narekʼa, maabʼaanu aawibʼ naq inkʼaʼ nakaawabʼi. Wi nakaakʼe aachʼool chi rabʼinkil, tixkʼe reetal naq oxloqʼ chaawu li naxkʼoxla.
4. Kʼoxla li naxkʼul li qas qiitzʼin. Jultikoʼq aawe chirix li xexʼaatinak chaq ut bʼaanu aawe ebʼ li patzʼom aʼin:
«Kʼaʼut aajel ru naq tixtzol li yaal?».
«Wi tixtzol li Santil Hu, chanru tchaabʼiloʼq li xyuʼam anaqwan ut saʼ li kutan chalk re?».
5. Oksi li naʼlebʼ li naru natenqʼank re. Matbʼayk chi xkʼutbʼal chiru naq rikʼin xtzolbʼal li Santil Hu naru tixtaw xsumenkil ebʼ li xpatzʼom ut naru natenqʼaak yalaq joqʼe.