1. Ebʼ li ninqi hiik
«Talajeʼwanq ninqi hiik» (LUCAS 21:11, SBG).
● Naq kikʼulmank li nimla hiik saʼ Haití ebʼ laj yehol esil li wankebʼ aran keʼrabʼi naq wank ani yook chi tzʼuyink rubʼel li jukʼinbʼil ochoch, li yook chaq chi tzʼuyink aʼan li xWiniie li numenaq 1 chihabʼ wank re. Kaʼajwiʼ aʼan kikoleʼk li xnaʼ xyuwaʼ keʼkamk.
KʼARU NAXKʼUT EBʼ LI ESIL? Saʼ li nimla hiik li kikʼulmank Haití saʼ li po enero 2010 keʼkamk 300,000 chi kristiʼaan ut 1,300,000 keʼkanaak chi maakʼaʼebʼ rochoch. Usta qʼaxal ra keʼxkʼul saʼ li nimla hiik aʼin, moko kaʼaj tawiʼ saʼ Haití kikʼulmank aʼan. Chiru li po abril 2009 toj abril 2010 kikʼulmank tana 18 li nimla hiik.
LI NEKEʼXYE. Juntaqʼeet li hiik li nakʼulmank anaqwan joʼ junxil, li xjalaak aʼan naq anaqwan naqabʼi chik resil.
MA YAAL LI NEKEʼXYE? Qajultikaq naq li Santil Hu moko naxye ta li xkʼihalil li ninqi hiik li tkʼulmanq saʼ rosoʼjikebʼ li kutan. Naxye bʼan naq ebʼ li «ninqi hiik» tkʼulmanq «saʼ naabʼal chi naʼajej» ut aʼin naxkʼut chi chʼolchʼo ru naq wanko saʼ rosoʼjikebʼ li kutan (Marcos 13:8; Lucas 21:11, SBG).
KʼARU NAKAAKʼOXLA? Ma yook chi tzʼaqlok ru li kixye li Santil Hu chirixebʼ li ninqi hiik?
Xjunes ebʼ li ninqi hiik maare moko nekeʼxkʼutbʼesi ta naq wanko saʼ rosoʼjikebʼ li kutan, abʼan wank saʼ xyanq li propesiiy li yook chi tzʼaqlok ru saʼebʼ li qakutan. Anaqwan qilaq xkabʼ li propesiiy.
[Naxye]
«Ebʼ li ninqi hiik naabʼal li rahilal nekeʼxkʼam chaq».
[Li jalam u chalenaq]
© William Daniels/Panos Pictures