Chi seebʼ tchaabʼiloʼq li qayuʼam
«Saʼ jun chʼina kʼamok maakʼaʼaqebʼ chik li inkʼaʼ usebʼ xnaʼlebʼ; [...]. Aʼut ebʼ li nebʼaʼ teʼreechani li chaabʼil naʼajej [“Ruuchichʼochʼ”, La Biblia. Traducción del Nuevo Mundo, 2019 saʼ español]. Kʼajoʼ xnimal li tuqtuukil usilal teʼxyal chi junelik!» (SALMO 37:10, 11, SBG).
MA TWULAQ raj chaawu rilbʼal naq ttzʼaqloq ru li propesiiy aʼin? Peʼyaal naq joʼkan? Chʼolchʼo naq chi seebʼ ttzʼaqloq ru aʼin.
Ebʼ li propesiiy li ak xqatzʼil rix naxkʼutbʼesi naq wanko «saʼ rosoʼjikebʼ li kutan» (2 Timoteo 3:1-5, SBG). Li Yos kixmusiqʼa ebʼ li winq re naq teʼxtzʼiibʼa ebʼ li propesiiy aʼin ut chi joʼkan twanq qoybʼenihom (Romanos 15:4). Li xtzʼaqlojik li propesiiy naxkʼutbʼesi naq chi seebʼ t-oso’q chixjunil ebʼ li chʼaʼajkilal li yooko xkʼulbʼal.
Kʼaru tkʼulmanq naq twulaq xraqik li rosoʼjik li kutan? Li Xʼawabʼejilal li Yos tjolominq re li Ruuchichʼochʼ (Mateo 6:9, 10). Il li naxye li Santil Hu chirix aʼin:
● Maakʼaʼaq chik weʼej. «Numtajenaqaq li awimq saʼ ruuchichʼochʼ heetanqebʼ saʼ xbʼeenebʼ li loqʼlaj tzuul» (Salmo 72:16, SBG).
● Maakʼaʼaq chik li yajel. «Maajun chik saʼ qayanq tixye: “Yajin”» (Isaías 33:24, SBG).
● Tchaabʼiloʼq wiʼ chik li Ruuchichʼochʼ. «Sahoqebʼ li chaqichʼochʼ ut li joxkʼ naʼajej! Chisahoʼq li junesal naʼajej ut chinujaq chi uutzʼuʼuj» (Isaías 35:1, SBG).
Aʼin yal wiibʼ oxibʼ li propesiiy li chi seebʼ ttzʼaqloq ru, wi taawaj xkomon laanaʼlebʼ patzʼ re jun aj Testiiw naq tixchʼolobʼ chaawu kʼaʼut naq naxpaabʼ naq chi seebʼ tchaabʼiloʼq li qayuʼam.