Ma jultik aawe?

Ma xaakʼe aachʼool chi rilbʼal ebʼ li hu li tojeʼ xeʼelk Laj Kʼaakʼalehom? Kʼutbʼesi ma nakaanaw xsumenkil ebʼ li patzʼom:

Kʼaru li eetalil naqataw saʼ li Santil Hu chirix naq li Yos narekʼa li qarahilal?

Naq ebʼ laj Israel xeʼwank choʼq moos aran Egipto, li Yos naxnaw naq yookebʼ chi rahobʼtesiik ut narekʼa li xrahilalebʼ (Ex. 3:7; Is. 63:9). Saʼ xkʼabʼaʼ naq yobʼtesinbʼilo joʼ xjalam u li Yos, naru naqekʼa ajwiʼ li xrahilalebʼ li junchʼol. Li Yos naxkʼe ribʼ saʼ qanaʼaj usta naqakʼoxla naq moko qakʼulubʼ ta naq tooxra (wp18.3-S, perel 8 ut 9).

Chanru kixtenqʼa li Jesus ebʼ li qas qiitzʼin chi xqʼaxbʼal li tzʼeqtaanank?

Saʼ xkutankil li Jesus, naabʼalebʼ laj Judiiy qʼetqʼetebʼ. Li Kriist kixye naq aajel ru tqakubʼsi qawankil ut tqatzʼeqtaana li nekeʼxqʼetqʼeti ribʼ xbʼaanebʼ li xtenamit. Kixye naq ebʼ li xtzolom tento teʼril ribʼ joʼ riitzʼinebʼ ribʼ (w18.06, perel 9 ut 10).

Kʼaru naqatzol chirix li kibʼaanunk re, naq li Yos inkʼaʼ kixkanabʼ chi ok laj Moises saʼ li chʼochʼ li yeechiʼinbʼil chaq rehebʼ?

Laj Moises wank chaq choʼq ramiiw li Jehobʼa (Deut. 34:10). Kachʼin chik ma nekeʼraqeʼk xbʼeninkil li chaqichʼochʼ chiru li 40 chihabʼ naq ebʼ laj Israel keʼok chi wechʼink wiʼ chik saʼ xkʼabʼaʼ naq maakʼaʼ li haʼ. Li Yos kixye re laj Moises naq traatina li pek. Abʼan inkʼaʼ kixbʼaanu, kixsakʼ bʼaan li pek. Maare li Jehobʼa kichalk xjosqʼil rikʼin xbʼaan naq inkʼaʼ kixbʼaanu li kiyeheʼk re malaj inkʼaʼ kikʼeheʼk xloqʼal joʼ chanru xkʼulubʼ xbʼaan li sachbʼachʼoolej (Num. 20:6-12). Aʼin naxkʼut chiqu naq qʼaxal aajel ru xpaabʼankil li Jehobʼa ut xkʼebʼal xloqʼal (w18.07, perel 13 ut 14).

Saʼ kʼaru li paltil naru nokootʼaneʼk wi nokooraqok aatin saʼ xbʼeenebʼ li junchʼol aʼ yaal chanru naqilebʼ?

Wank oxibʼ li naʼlebʼ li naxbʼaanu naq naabʼalebʼ teʼraqok aatin saʼ xbʼeenebʼ li junchʼol: li xtenamit, li xtumin ut li xchihabʼ. Saʼ li junjunq chi naʼlebʼ aʼin, tqil chanru tqayuʼami li xtaql li Jesus. Aajel ru naq tqatzol rilbʼalebʼ li junchʼol chi maakʼaʼaq li tzʼeqtaanank, joʼ chanru narilebʼ li Jehobʼa (Hech. 10:34, 35) (w18.08, perel 8 toj 12).

Chanru yookebʼ chi tenqʼank ebʼ li cheek saʼebʼ li chʼuut?

Li qechpaabʼanel li cheek chik ut xjalaak xkʼanjel, oxloqʼ chiru li Yos ut naru naxtenqʼahebʼ li junchʼol. Naru naxtenqʼa ebʼ li bʼeelomej li maawaʼebʼ aj Testiiw, li xeʼkehoʼk saʼebʼ li xpaabʼal, xtzolbʼalebʼ li qas qiitzʼin chirix li Santil Hu ut tzʼaqonk saʼ jalan jalanq li xkʼanjel li Yos (w18.09, perel 8 toj 11).

Kʼaru wank saʼ li qakʼanjelobʼaal re kʼutuk?

Saʼebʼ li kʼanjelobʼaal wank li hu chirix jw, li hu re bʼoqok, waqxaqibʼ li tratado li yiibʼanbʼil chiʼus ut ebʼ li hu La Atalaya ut li hu ¡Despertad! saʼ Español. Wank ajwiʼ wiibʼ oxibʼ li folleto, wiibʼ li tasal hu re tzolok ut kaahibʼ li chaabʼil bʼideo, saʼ xyanq aʼin wank li bʼideo Kʼaʼut us naq tattzoloq chirix li Santil Hu? (w18.10, perel 16).

Kʼaru tento tixbʼaanu junaq laj paabʼanel re xloqʼbʼal li yaal, joʼ naxye saʼ Proverbios 23:23, TNM?

Moko aajel ta ru naq tookʼehoq tumin re xtawbʼal li yaal. Abʼan, tento tqakʼe qahoonal ut qachʼool re xtawbʼal aʼin (w18.11, perel 4).

Kʼaru naqatzol chirix chanru kiril laj Oseas, li xGomer, li rixaqil?

Saʼ reqaj ribʼ, li xGomer kixmux li xsumlajik. Abʼan, laj Oseas kixkuy xmaak ut inkʼaʼ kixjach li xsumlajik. Wi jun rehebʼ li sumsu naxmux li xsumlajik, li ixaqilbʼej malaj li bʼeelomej li inkʼaʼ xmaakobʼk naru naxkuy xmaak li xsumʼaatin. Li Yos inkʼaʼ naxkʼulubʼa naq li bʼeelomej malaj li ixaqilbʼej tixjach li xsumlajik wi ak xwank wiʼ chik rikʼin li xsumʼaatin (w18.12, perel 13).