Naq nakamk junaq laakomon
WI AK xkamk junaq laakomon, maare xrahoʼk ajwiʼ aachʼool, xaawekʼa naq wankat aajunes ut maakʼaʼ xatruuk xbʼaanunkil chirix, ut maare ajwiʼ xatpoʼk, xatxuwak ut xaakʼoxla naq saʼ aamaak xkʼulmank. Maare xaakʼoxla ajwiʼ ma toj wank rusilal laayuʼam.
Wi nakatyaabʼak chirix li kikamk, aʼin moko naraj ta xyeebʼal naq inkʼaʼ kaw aachʼool. Nakaakʼutbʼesi naq oxloqʼ chaawu li qas qiitzʼin aʼin. Abʼanan, ma naru tnumeʼq bʼayaq xrahil aachʼool?
KʼARU KEʼXBʼAANU WIIBʼ OXIBʼ LI POYANAM
Usta taakʼoxla naq maakʼaʼ truuq risinkil xrahil aachʼool, ebʼ li naʼlebʼ aʼin naru tatxtenqʼa.
KʼE AAHOONAL RE YAABʼAK
Li rahil chʼoolejil li nekeʼrekʼa li poyanam moko junaqik ta ru chi moko li kutan li teʼrekʼa wiʼ aʼin. Abʼanan, wi tatyaabʼaq, aʼin naru tatxtenqʼa. Li xVanessa, li xooʼaatinak wiʼ saʼ xtiklajik, naxye: «Junelik ninyaabʼak. Nawaj risinkil chixjunil li nawekʼa». Li xSofia, li kikamk jun li riitzʼin ixq chi maakʼaʼ saʼ xchʼool, naxye: «Jwal ra li ninkʼoxla ut li nawekʼa. Chanchan naq teʼxte laatiqʼilal re xmesbʼal ru chiʼus. Jwal ra tzʼaqal aʼin, abʼan aajel ru re naq tkʼiraaq».
YE LI NAKAAKʼOXLA UT LI NAKAAWEKʼA
Wank sut ak re, naq taawaj wank aajunes, abʼan li rahil chʼoolejil aʼin jwal aal re naq taakʼam aajunes. Laj Jared, jun li saaj al li wank 17 chihabʼ re li kikamk li xyuwaʼ, naxye: «Maakʼaʼ tana xyaalalil li xinye chaq, abʼan aatinak chirix li nawekʼa rikʼinebʼ li junchʼol xinxtenqʼa». Li xJanice, li xqil saʼ li xbʼeen tasal re li hu aʼin, naxye jun chik rusilal: «Jwal kixkʼojobʼ inchʼool aatinak rikʼin junaq li poyanam. Xwekʼa naq xeʼxtaw ru li xinkʼul ut moko wankin ta injunes».
KʼULUBʼA NAQ TATEʼXTENQʼA
Jun laj bʼanonel naxye: «Ebʼ li nekeʼxkanabʼ naq li xjunkabʼal ut ebʼ li ramiiw teʼtenqʼanq rehebʼ chi xnumsinkil li rahil chʼoolejil li nekeʼrekʼa saʼ xtiklajik, moko chʼaʼajkaq ta chik chiruhebʼ xkuybʼal li tchalq moqon». Ye rehebʼ laawamiiw chanru teʼruuq aatenqʼankil. Maare teʼraj xbʼaanunkil, abʼan inkʼaʼ nekeʼxnaw chanru (Proverbios 17:17).
JILON CHIXKʼATQ LI YOS
Li xTina naxye: «Naq kikamk linbʼeelom xbʼaan li cancer, maaʼani chik aj e tinye re li nawekʼa ut xinʼok xyeebʼal chixjunil re li Yos. Naq ninwakli, ninye re, naq tixkʼe inmetzʼew re xnumsinkil li kutan. Li Yos xinxtenqʼa rikʼin jalan jalanq li naʼlebʼ...». Li xTarsha wank 22 chihabʼ re, naq kikamk li xnaʼ, naxjultika: «Rilbʼal wulaj wulaj li Santil Hu jwal kixkʼojobʼ inchʼool. Junelik xbʼaanu naq tinkʼoxla junaq li chaabʼil naʼlebʼ».
KʼOXLA LI WAKLIIK WIʼ CHIK CHI YOʼYO
Li xTina naxye: «Saʼ xtiklajik, moko xkʼojobʼ ta inchʼool xnawbʼal naq teʼwakliiq wiʼ chik chi yoʼyo li kamenaq. Saʼ li hoonal aʼan xwaj rilbʼal linbʼeelom ut linkokʼal xeʼraj naq li xyuwaʼ twanq rikʼinebʼ. Abʼanan, anaqwan naq ak xnumeʼk kaahibʼ chihabʼ, jwal kʼojkʼo inchʼool naq teʼwakliiq wiʼ chik li kamenaq. Aʼan li natenqʼank we re naq tinruuq xkuybʼal. Xkʼoxlankil li kutan naq tqil wiʼ chik qibʼ naxkʼe xsahil ut xtuqtuukilal inchʼool».
Maare taawekʼa naq inkʼaʼ t-elq xrahil aachʼool saʼ junpaat, abʼan li kixye xVanessa tixkʼojobʼ tana aachʼool. Aʼan naxye: «Maare taakʼoxla naq maajunwa tatruuq xnumsinkil, abʼan wanq kutan bʼarwiʼ sa twekʼa aawibʼ».
Jultika aʼin: usta maakʼaʼ truuq xtuqubʼankil ru li nakaawekʼa, abʼan toj wank rusilal laayuʼam. Rikʼin li xtenqʼ li Yos, toj naru naq sahaq saʼ laachʼool rikʼinebʼ laawamiiw ut taawil naq wank rajbʼal laayuʼam. Chi seebʼ, li Yos tixwaklesi wiʼ chik ebʼ li kamenaq. Aʼan naraj naq taaqʼaluhebʼ wiʼ chik laakomon malaj laawamiiw ut naq li rahil chʼoolejil li nakaawekʼa anaqwan tsachq chi junajwa.