Naq jun rehebʼ naxmux li xsumlajik

«Naq linbʼeelom kixye we naq tinxkanabʼ xbʼaan naq xtaw jun chik li ixq toj saaj, xwaj raj kamk. Jwal yiibʼru li kixbʼaanu we. Xinkʼe inchʼool chi xraabʼal...» (xMaria, España).

«Maakʼaʼ saʼ inchʼool naq li wixaqil xinxkanabʼ. Saʼ li kutan aʼan xwekʼa naq wank kʼaru xkamk saʼ linchʼool. Chixjunil li xqakʼubʼ, li xqaj xbʼaanunkil ut li xqoybʼeni naq tkʼulmanq kiʼosoʼk. Wank kutan nawekʼa naq sa chik wankin, abʼan nachalk wiʼ chik xrahil inchʼool» (Laj Bill, España).

JWAL ra naq teʼxmux laasumlajik. Yaal, wankebʼ keʼruuk xkuybʼal xmaak li xsumʼaatin li kixyotʼ xchʼool ut keʼxyiibʼ wiʼ chik ru li xyuʼamebʼ.a Abʼanan, maakʼaʼ naxye wi teʼxkuy xmaak malaj inkʼaʼ, li kikʼateʼk roq jwal narahoʼk saʼ xchʼool. Kʼaru truuq aatenqʼankil re naq kʼojkʼooq laachʼool?

LI XRAQAL LI SANTIL HU LI TRUUQ AATENQʼANKIL

Usta jwal rahebʼ saʼ xchʼool, naabʼalebʼ li keʼkʼateʼk roq xbʼaan li xsumʼaatin keʼxtaw xkʼojobʼankil xchʼool saʼ li Santil Hu. Naq keʼril xsaʼ, keʼxkʼe reetal naq li Yos naril li xyaʼalebʼ ru ut naxtaw ru li xrahilalebʼ (Malaquias 2:13-16).

«Naq numtajenaq namayok saʼ inchʼool, laaʼat nakakʼojobʼ ut nakasahobʼresi li waanm» (Salmo 94:19).

Laj Bill naxjultika: «Naq nawil li raqal aʼin, ninkʼoxla naq li Jehobʼa yook xkʼojobʼankil linchʼool, joʼ naxbʼaanu jun chaabʼil yuwaʼbʼej».

«Tiik laachʼool rikʼin li tiik xchʼool» (Salmo 18:26).

Li xCarmen, li kimuxeʼk ru li xsumlajik chiru naabʼal po, naxchʼolobʼ: «Linbʼeelom kixmux ru li qasumlajik, abʼan laaʼin ninnaw naq li Jehobʼa tiik xchʼool, maajunwa tixrahobʼtesi inchʼool».

«Maakʼaʼ kʼaʼaq re ru chiʼok wiʼ eekʼaʼuxl, junelik bʼan cheqʼaxtesi saʼ roq ruqʼ li Yos leepatzʼom rikʼin tijok ut tzʼaamank. [...] Ut li tuqtuukil usilal li nachalk rikʼin li Yos ut naxqʼax ru chixjunil li naʼlebʼ, tixkʼuula leechʼool» (Filipenses 4:6, 7).

Li xSasha naxye: «Naabʼal sut xwil li raqal aʼin. Naq inkʼaʼ ninkanabʼ tijok, jwal nawekʼa tzʼaqal li xtuqtuukilal li Yos saʼ linyuʼam».

Chixjunilebʼ li poyanam li xqil saʼ li hu aʼin wank sut keʼxkʼoxla naq inkʼaʼ chik teʼxkuy, abʼan keʼxkʼojobʼ xchʼool rikʼin li Jehobʼa, ut li Santil Hu kixkawresi xchʼoolebʼ. Laj Bill kixye aʼin: «Linpaabʼal chirix li Yos kixkʼe rajbʼal linyuʼam naq kiwekʼa naq chanchan tawiʼ kiʼosoʼk chixjunil. Usta wank sut kinbʼeek saʼ li “qʼoqyinkil taqʼa”, li Yos kiwank chinkʼatq» (Salmo 23:4).

a Re xnawbʼal xkomon li naʼlebʼ chirix xkuybʼal xmaak li kixmux li xsumlajik, chaawil li jalan jalanq chi naʼlebʼ bʼarwiʼ naxye naq jun rehebʼ naxkʼat roq li xsumʼaatin saʼ li hu Ajsi aawu! 22 re Abril 1999, perel 3, 5 ut 9. Maakʼaʼ saʼ Qʼeqchiʼ.

Kʼaru keʼxbʼaanu wiibʼ oxibʼ li poyanam

Kʼoxla rix li xraqal li Santil Hu li tixwaklesi aachʼool

Laj Bill naxye: «Xwil li xhu laj Job ut moqon chik ebʼ li Salmo, ut xinjuchʼ chixjunil li raqal li naxkʼut li yookin xkʼulbʼal. Xinkʼe reetal naq junjunq rehebʼ li keʼtzʼiibʼank re li Santil Hu keʼrekʼa ajwiʼ li rahil chʼoolejil li xwekʼa chaq ut li naʼok wiʼ inkʼaʼuxl».

Sikʼ xkʼojobʼankil aachʼool saʼ li bʼich

Li xCarmen naxjultika: «Saʼebʼ li qʼoqyink, naq inkʼaʼ kinruuk chi wark, kiwabʼi li bʼich. Aʼin kixkʼojobʼ inchʼool». Laj Daniel naxye: «Xintzol xwajbʼankil li guitaar ut xwil naq li xyaabʼ li bʼich xinxtenqʼa chi xtawbʼal wiʼ chik li xtuqtuukilal inchʼool».

Aatinan chirix li nakaawekʼa

Laj Daniel naxjultika: «Moko kʼaynaqin ta chi aatinak chirix li nawekʼa, abʼan wankebʼ li wamiiw ut wulaj wulaj ninsikʼebʼ. Ninye rehebʼ li wank saʼ linchʼool malaj nintzʼiibʼa. Aʼin jwal xinxtenqʼa». Li xSasha naxye: «Jwal xinxtenqʼa linjunkabʼal. Linnaʼ junelik xinxtenqʼa. Naq nawaj chaq aatinak, junelik xinrabʼi. Linyuwaʼ ajwiʼ xinxtenqʼa re naq inkʼaʼ tinxuwaq ut re naq timil timil tintaw wiʼ chik xtuqtuukilal inchʼool».

Junelik tattijoq

Li xCarmen naxye: «Junelik xintijok. Xwekʼa naq li Yos wank chinkʼatq, yook chi wabʼinkil ut intenqʼankil. Naq xinkʼul aʼin, jwal xinjilok chixkʼatq li Yos».