Saʼ Noviembre Twanq jun li Nimla Kʼanjel: Tjekʼimanq li Hu Resil li Xʼawabʼejilal li Yos ajl 38!
1. Kʼaru patzʼom nekeʼxbʼaanu naabʼalebʼ li poyanam chirix li kamk, ut kʼaru tbʼaanumanq saʼ Noviembre re xtenqʼankilebʼ?
1 Li kamk xikʼ nokooril, maakʼaʼ naraj re kʼaru naqakʼoxla (1 Cor. 15:26). Naabʼalebʼ nekeʼxpatzʼ chanru wankebʼ li xkamenaq ut ma teʼril ruhebʼ saʼ junaq kutan. Ut re xtenqʼankilebʼ, chi seebʼ twanq jun li nimla kʼanjel saʼ chixjunil li Ruuchichʼochʼ re xjekʼinkil li hu Resil li Xʼawabʼejilal li Yos ajl 38, li naxkʼabʼaʼi Ma Teʼwanq wiʼ chik Xyuʼam ebʼ li Kamenaq? Li nimla kʼanjel aʼin ttiklaaq saʼ li 1 re Noviembre, ut twanq chiru chixjunil li po aʼin. Ut naq ak xnumeʼk li nimla kʼanjel aʼin, li hu Resil li Xʼawabʼejilal li Yos naru naqoksi yalaq joqʼe naq tooxik chi puktesink.
2. Chanru kʼuubʼanbʼil li hu Resil li Xʼawabʼejilal li Yos?
2 Chanru Kʼuubʼanbʼil li Hu: Li hu Resil li Xʼawabʼejilal li Yos ajl 38 tbʼasmanq chi xaqxo ru. Chiru li hu aʼin wank xjolomil li naʼlebʼ ut li patzʼom: «Ma taaye raj naq ... twanq? inkʼaʼ twanq? maare twanq?». Ut chisaʼ li hu, nakʼutunk li naxye li Santil Hu ut chanru natenqʼank xnawbʼal aʼin. Ut naxye ajwiʼ kʼaru xyaalal wank xpaabʼankil li Santil Hu. Ut toj chirix li hu, wank jun chik li patzʼom li tixbʼaanu naq t-alaaq saʼ qachʼool xtzolbʼal xkomon li naʼlebʼ.
3. Chanru tbʼaanumanq li nimla kʼanjel re xjekʼinkil li hu Resil li Xʼawabʼejilal li Yos ajl 38?
3 Chanru Tjekʼimanq li Hu: Li kʼanjel aʼin chanchan naq naqajekʼi ebʼ li hu li naqoksi re xkʼeebʼal resil li Xkamik li Jesus ut li Nimla Chʼutam re Oxibʼ Kutan. Ebʼ li cheekel winq teʼxye chanru tsutmanq ebʼ li naʼajej joʼ naxchʼolobʼ li hu 1 re Abril 2013 li taqlanbʼil rehebʼ li cheekel winq. Ebʼ li chʼuut li moko naabʼal ta xnaʼajebʼ re puktesink teʼruuq xtenqʼankilebʼ li chʼuut li nachʼ chixkʼatqebʼ ut naabʼalebʼ xnaʼaj re puktesink. Ut naq ebʼ laj puktesinel teʼxkʼam li hu Resil li Xʼawabʼejilal li Yos us raj teʼxchap li tkʼanjelaq chiruhebʼ chiru jun xamaan. Wi chiru li po Noviembre toj wank li hu aʼin ut ak xeʼwulak xjekʼinkil saʼ chixjunil ebʼ li ochoch, naru nekeʼxchoy xjekʼinkil saʼebʼ li bʼe. Ut wi naʼosoʼk li hu Resil li Xʼawabʼejilal li Yos naq toj maajiʼ naraqeʼk li po Noviembre, tqakʼanjela ebʼ li tasal hu li kʼeebʼil saʼ ajl chiru li po aʼin. Saʼ li xbʼeen Sabado re li po Noviembre inkʼaʼ tqakʼoxla xsikʼbʼalebʼ li nekeʼraj tzolok chirix li Santil Hu tqakʼe bʼan qaqʼe chi xjekʼinkil li hu Resil li Xʼawabʼejilal li Yos. Ut wi naruhank tqayeechiʼi La Atalaya ut li ¡Despertad! chiru li Sabado ut li Domingo. Joʼkan bʼiʼ, akaq yooqo xkʼuubʼankil qibʼ re naq tootzʼaqonq saʼ li nimla kʼanjel aʼin.