Qabʼoqaqebʼ chi anchal qachʼool
1. Joqʼe ttiklaaq li nimla kʼanjel re xbʼoqbʼalebʼ li qas qiitzʼin saʼ li nimla chʼutam re oxibʼ kutan?
1 Wi naabʼal li hoonal ut li tumin tqoksi re xkʼubʼankil junaq li tibʼelwa choʼq rehebʼ li qamiiw malaj ebʼ li qakomon, peʼyaal naq tqabʼoqebʼ chi anchal qachʼool? Joʼkan ajwiʼ tkʼulmanq rikʼin chixjunil li seeraqʼ li tqabʼi saʼ li jun chik nimla chʼutam re oxibʼ kutan. Naq oxibʼ xamaan chik ma natiklaak li nimla chʼutam, li Jehobʼa tooxkʼe chi xbʼoqbʼalebʼ li qas qiitzʼin. Kʼaru ttenqʼanq qe chi xbʼaanunkil chi anchal qachʼool?
2. Kʼaru t-eekʼasinq qe chi tzʼaqonk saʼ li nimla kʼanjel?
2 Wi naqakʼe qachʼool chi xkʼoxlankil chanru nokooxtenqʼa chiqajunqal chixjunil li naʼlebʼ li naxkʼe qe li Jehobʼa saʼebʼ li nimla chʼutam, aʼan t-eekʼasinq qe chi tzʼaqonk saʼ li nimla kʼanjel (Is. 65:13, 14). Joʼkan ajwiʼ, us xjultikankil naq li nimla kʼanjel aʼin naxkʼam chaq rusilal (chaawil li kaaxukuut «Wank rusilal»). Re chixjunilebʼ li qas qiitzʼin li xqabʼoqebʼ saʼ li nimla chʼutam maare wankebʼ teʼwulaq ut wankebʼ inkʼaʼ teʼwulaq. Abʼan maakʼaʼ naxye jarubʼebʼ teʼwulaq, li nimla kʼanjel li tqabʼaanu tixkʼe xloqʼal li Jehobʼa ut tixkʼut li xchaabʼilal (Sal. 145:3, 7; Apoc. 22:17).
3. Chanru tqajekʼi ebʼ li hu chirix li nimla chʼutam?
3 Ebʼ li cheekel winq joʼ chʼuut yalebʼ re chanru tjekʼimanq naabʼal li hu re xbʼoqbʼalebʼ li poyanam, ut ma twanq xkanabʼankil ebʼ li hu saʼebʼ li ochoch li maakʼaʼebʼ xsaʼ malaj tjekʼimanq saʼebʼ li bʼe li wank saʼ li qateep bʼarwiʼ nekeʼnumeʼk naabʼal li qas qiitzʼin. Chiruhebʼ li Sabado ut Domingo naq tixkʼe ribʼ chiqu, tqayeechiʼi ebʼ li hu La Atalaya ut li ¡Despertad! rikʼin li hu li naʼaatinak chirix li nimla chʼutam. Naq traqeʼq li nimla kʼanjel, sahaq saʼ qachʼool xbʼaan naq xootzʼaqonk chi anchal qachʼool ut xqakʼehebʼ xbʼoqbʼal naabʼalebʼ li poyanam re naq toleʼrabʼi li naʼlebʼ li naxkʼe qe li Jehobʼa.