Qatikibʼaq Xtzolbʼalebʼ li Yookebʼ Xkʼulbʼal li Tasal Hu La Atalaya ut li ¡Despertad!
1. Kʼaʼut li xmolam li Jehobʼa naxye qe naq rajlal po tqakʼe La Atalaya ut li ¡Despertad! rehebʼ li nekeʼwulak chiru rilbʼal xsaʼ ebʼ li tasal hu aʼin?
1 Chiru naabʼal chihabʼ li xmolam li Jehobʼa naxye qe naq rajlal po tqakʼe La Atalaya ut li ¡Despertad! rehebʼ li nekeʼwulak chiru rilbʼal xsaʼ, abʼan inkʼaʼ nekeʼraj tzolok chirix li Santil Hu. Kʼaʼut? Xbʼaan naq ebʼ li tasal hu aʼin naru naxbʼaanu naq li Raatin li Yos t-oq chi xeʼink saʼebʼ li xchʼool li poyanam (1 Ped. 2:2). Wank sut naq nekeʼril xsaʼ junaq li tasal hu, nawulak saʼebʼ li xchʼool ut nekeʼraj chik tzolok.
2. Kʼaru tento tqabʼaanu re naq li nekeʼkʼuluk re ebʼ li tasal hu teʼraj aatinak chirix li Santil Hu?
2 Qatʼaqresiq Riyajil li Yaal. Moko kaʼaj tawiʼ tqakanabʼ ebʼ li tasal hu saʼ ruqʼebʼ li qas qiitzʼin tento bʼan tooʼaatinaq rikʼinebʼ re naq teʼkʼayq chi seeraqʼik qikʼin. Chi joʼkan tatruuq xnawbʼal chanru xyuʼamebʼ, kʼaru nekeʼwulak chiru ut kʼaru nekeʼxpaabʼ. Ut aʼin ajwiʼ tatxtenqʼa chi xsikʼbʼal kʼaru taaye ut chanru tat-aatinaq rikʼinebʼ (Prov. 16:23). Abʼan re xbʼaanunkil aʼin tento naq tqatzol qibʼ chiʼus. Qasikʼaq saʼebʼ li tasal hu junaq li naʼlebʼ ut junaq li raqal li Santil Hu re naq tooruuq xchʼolobʼankil. Ut chi joʼkan tqatʼaqresi li iyaj re li yaal saʼebʼ li xchʼool (1 Cor. 3:6). Misach saʼ qachʼool xtzʼiibʼankil rajlal sut xkutankil naq xqulaʼani junaq li poyanam joʼ ajwiʼ ebʼ li tasal hu, chirix kʼaru xooʼaatinak ut ebʼ li raqal li Santil Hu li xqayaabʼasi.
3. Naq ak xqakanabʼ li tasal hu, joqʼe tzʼaqal tooruuq chi sutqʼiik?
3 Rajlal Jarubʼ Kutan Tento Rulaʼaninkilebʼ. Jun sut chiru li po tento taakʼam rehebʼ li tasal hu. Abʼan wi li qas qiitzʼin naru aakʼulbʼal ut nawulak chiru li yook xtzolbʼal, maare moko jun sut ta ajwiʼ chiru li po taawulaʼani. Naq ak xaakanabʼ li tasal hu, joqʼe tzʼaqal tatruuq chi sutqʼiik? Maare naq ak xnumeʼk jun malaj wiibʼ xamaan tatsutqʼiiq ut taaye re: «Kaʼajwiʼ nawaj xkʼutbʼal chaawu jun rehebʼ li chaabʼil naʼlebʼ li xintaw saʼebʼ li tasal hu li xinkanabʼ aawe». Wi nakaabʼaanu aʼin, maare t-alaaq saʼ xchʼool xsikʼbʼal junaq chik li naʼlebʼ saʼebʼ li tasal hu. Abʼan wi teʼxye aawe naq ak xeʼril li naʼlebʼ, naru nakaapatzʼ re kʼaru naxkʼoxla re naq tatruuq chi seeraqʼik chirix li naʼlebʼ aʼin. Ut wi junaq li poyanam nawulak chiru ebʼ li qatasal hu, naru nakaakʼut chiru ebʼ li tratado, ebʼ li folleto malaj ebʼ li tasal hu li yook chi yeechiʼimank chiru li po.
4. Kʼaru tento tqabʼaanu re naq li nekeʼkʼuluk re ebʼ li tasal hu teʼoq chi tzolok chirix li Santil Hu?
4 Moko tqoybʼeni ta naq junaq li qas qiitzʼin tchalq qikʼin chi xpatzʼbʼal xtzolbʼal chirix li Santil Hu, laaʼo bʼan tqayeechiʼi re. Usta maare saʼ xtiklajik inkʼaʼ kiraj, naq tixkʼe ribʼ chaawu naru nakaakʼut chiru li naʼlebʼ: «Preguntas sobre la Biblia» li wank saʼ li tasal hu La Atalaya. Wi nakaabʼaanu aʼin, maare t-oq chi tzolok chirix li Santil Hu usta inkʼaʼ tatroksi saʼ rochoch. Ut wi inkʼaʼ tixkʼulubʼa tzolok, maakanabʼ xkʼambʼal re ebʼ li tasal hu re naq saʼ junaq kutan t-oq chi tzolok.