Qatawaq Xsahil Qachʼool naq Tqajultika Xkamik li Jesus!
1. Kʼaru tento taabʼaanu re naq tnumtaaq xsahil aachʼool chiruhebʼ li po naq naqajultika xkamik li Jesus?
1 Ma taawaj naq tnumtaaq xsahil aachʼool chiruhebʼ li po Marzo, Abril ut Mayo? Jun rehebʼ li naʼlebʼ li ttenqʼanq aawe re naq sahaq saʼ laachʼool aʼan xkʼeebʼal xkomon laahoonal saʼ li puktesink, ut wi naxkʼe ribʼ chaawu naru nakaabʼaanu 30 malaj 50 hoonal. Abʼan, kʼaʼut tixsahobʼresi aachʼool li kʼanjel aʼin?
2. Kʼaʼut nanimank xsahil qachʼool naq naqakʼe xtzʼaqobʼ li qahoonal re puktesink?
2 Chaanima Xsahil Aachʼool. Naq li Jehobʼa kooxyobʼtesi, kixbʼaanu naq sahaq saʼ qachʼool chi xloqʼoninkil ru (Luc. 11:28). Ut kixbʼaanu ajwiʼ naq tookʼehoq chi sa saʼ qachʼool (Hech. 20:35). Li qakʼanjel chiru li Yos nokooxtenqʼa chi xloqʼoninkil ru ut chi xtenqʼankilebʼ li qas qiitzʼin. Wi inkʼaʼ naqakanabʼ tzʼaqonk saʼ li kʼanjel aʼin, tnumtaaq xsahil qachʼool. Ut wi junelik yooqo chi puktesink, tooruuq xbʼaanunkil chiʼus li kʼanjel, tooruuq roksinkil chiʼus li Santil Hu ut yooq chi elk qaxiw. Joʼkan ajwiʼ, tqataw qahoonal re xkʼutbʼal li yaal ut re xtikibʼankil junaq li tzolom chirix li Santil Hu. Chixjunil aʼin naxbʼaanu naq li xkʼanjel li Yos jwal chʼinaʼusaq chiqu.
3. Kʼaʼut saʼ li po Marzo ut Abril tooruuq chi kʼanjelak chi kaw chiru li Yos?
3 Chiru li po Marzo ut Abril tooruuq chi kʼanjelak chi kaw chiru li Yos xbʼaan naq tooruuq xsikʼbʼal ma tqabʼaanu 30 malaj 50 hoonal saʼ li puktesink. Ut tooruuq ajwiʼ chi tzʼaqonq saʼ jun li nimla kʼanjel bʼarwiʼ tqaye rehebʼ li poyanam naq teʼwulaq saʼ li chʼutam re Xnimankil Xkamik li Jesus. Li kʼanjel aʼin ttiklaaq saʼ li Sabado 22 re Marzo toj saʼ li Lunes 14 re Abril. Saʼebʼ li chʼuut wanq naabʼal li kʼanjel xbʼaan naq ebʼ laj puktesinel teʼkʼanjelaq chi junaj ru xchʼoolebʼ re naq teʼruuq chi wulak saʼ naabʼal chi teep li tenebʼanbʼil saʼ xbʼeenebʼ (Sof. 3:9).
4. Kʼaru tento taabʼaanu wi nakaawaj puktesink chiruhebʼ li po aʼin?
4 Chaakʼuubʼ Aawibʼ Anaqwan. Wi toj maajiʼ nakaakʼuubʼ aawibʼ, chaakʼe reetal chanru wank laahoonal ut kʼaru tatruuq xbʼaanunkil re naq tattzʼaqonq chiru jun malaj chiruhebʼ li po li teʼxkʼe ribʼ chaawu. Tijon chiru li Jehobʼa (Sant. 1:5). Taakʼuubʼ rikʼin laajunkabʼal ut rikʼinebʼ laawech aj paabʼanel (Prov. 15:22). Tatruuq ajwiʼ xtawbʼal xsahil aachʼool chi xbʼaanunkil li kʼanjel aʼin usta inkʼaʼ sa wankat malaj inkʼaʼ nakatkʼanjelak jun waʼlebʼ ajwiʼ.
5. Kʼaru rusilal tqataw wi naqakʼe xtzʼaqobʼ qahoonal chi puktesink chiruhebʼ li po aʼin?
5 Li Jehobʼa naraj naq ebʼ laj kʼanjel chiru sahaqebʼ saʼ xchʼool (Sal. 32:11). Wi naqakʼe qachʼool chi xkʼeebʼal qahoonal saʼ li puktesink chiruhebʼ li po aʼin, tnumtaaq xsahil qachʼool ut tqasahobʼresi xchʼool li Qayuwaʼ li wank saʼ choxa (Prov. 23:24; 27:11).