Saʼ xqʼehil li xkamik li Jesus, ma taakʼam aawe rikʼin li Jehobʼa ut li Jesus naq nekeʼxkʼe xchʼool chi kʼanjelak?
1. Chanru nekeʼxkʼe xqʼe naabʼalebʼ laj Testiiw saʼ xqʼehil li xkamik li Jesus?
1 Li Jehobʼa naxkʼe xchʼool re naq ttzʼaqloq ru li rajom. Joʼkan bʼiʼ, naq li Santil Hu naʼaatinak chirix wiibʼ oxibʼ rehebʼ li osobʼtesink li tixkʼam chaq li Xʼawabʼejilal li Yos, Isaias 9:7 naxye: «Aʼin taaʼuxmanq saʼ xkʼabʼaʼ li xnimal xrahom li Nimajwal Yos!». Ut li Jesus, li ralal, naxkʼe ajwiʼ xchʼool chirix li tzʼaqal paabʼal (Juan 2:13-17; 4:34). Chiruhebʼ li kutan naq twanq xjultikankil li xkamik li Jesus, chi miyon ebʼ laj Testiiw tqakʼe qachʼool chi xkʼebʼal xtzʼaqobʼ li qakʼanjel chirix li puktesink re xkʼambʼal qe rikʼin li Jehobʼa ut li Jesus. Ut laaʼat, ma wanqat saʼ xyanqebʼ?
2. Kʼaru li kʼanjel tqatikibʼ saʼ li 7 re Marzo ut kʼaru rusilal tqataw wi naqakʼe qachʼool chi xbʼaanunkil?
2 Li nimla kʼanjel chirix li xkamik li Jesus. Li nimla kʼanjel aʼin ttiklaaq saʼ li Sabado 7 re Marzo. Us raj naq anaqwan ajwiʼ tqakʼubʼ qibʼ re naq tooruuq chi tzʼaqonk saʼ li nimla kʼanjel aʼin chi anchal qachʼool. Ebʼ li chʼuut kaw teʼkʼanjelaq re naq teʼruuq chi wulak saʼ chixjunil ebʼ li teep li xaqabʼanbʼil saʼ xbʼeenebʼ. Qakʼubʼaq qibʼ chiʼus re naq tooruuq xkanabʼankil junaq li hu saʼ ruqʼebʼ li qas qiitzʼin malaj tqakʼut li hu aʼin rikʼin li qanaʼaj saʼ jw.org, rehebʼ li qatzolom, li naqulaʼanihebʼ saʼ li teep, rehebʼ li qechkʼanjel, qechtzolom ut rehebʼ li qakomon.
3. Kʼaru tqabʼaanu re xkʼebʼal xtzʼaqobʼ li puktesink saʼ li po Marzo ut Abril?
3 Li nekeʼxbʼaanu 30 malaj 50 hoonal. Wi junelik naʼalaak saʼ qachʼool kʼanjelak aʼan tooreekʼasi chi xkʼebʼal xtzʼaqobʼ li qahoonal saʼ li puktesink. Ut maare naabʼalo tqabʼaanu li kʼanjel aʼin chiru li Marzo ut li Abril, ut naru naqachap re 30 hoonal. Naq yooqo xloqʼoninkil li Yos saʼ junajil joʼ junkabʼal, malaj naq yooqo chi tzolok chiqajunqal, naru nokootijok chiru li Jehobʼa re naq tooxtenqʼa chi rilbʼal chanru tqabʼaanu (Prov. 15:22). Li xsahil qachʼool naru naxbʼon ebʼ li qech aj paabʼanel re naq teʼraj tzʼaqonk ajwiʼ saʼ li kʼanjel aʼin. Wi naqakʼe xtzʼaqobʼ li qakʼanjel chirix li puktesink, tqakʼam qe rikʼin li Jesus (Mar. 6:31-34).
4. Kʼaru rusilal tqataw wi naqakʼam qe rikʼin li Jehobʼa ut li Jesus naq nekeʼxkʼe xchʼool chi kʼanjelak?
4 Wi saʼ xqʼehil li xkamik li Jesus, tqakʼam qe rikʼin li Jehobʼa ut li Jesus naq nekeʼxkʼe xchʼool chi kʼanjelak, tqataw naabʼal rusilal. Xbʼeenwa, naabʼalebʼ li qas qiitzʼin teʼruuq rabʼinkil li esil. Joʼkan ajwiʼ, sahaq saʼ qachʼool chi kʼanjelak chiru li Jehobʼa ut ebʼ li qas qiitzʼin (Hech. 20:35). Abʼan li wank tzʼaqal xwankil naq tqasahobʼresi xchʼool li Yos ut li Ralal.