Jun siʼeent chihabʼ xpuktesinkil li Xʼawabʼejilal li Yos
1. Kʼaru kiyeemank re li xtenamit li Jehobʼa kachʼin chik ma jun siʼeent chihabʼ anaqwan?
1 «Ilomaq, li Awabʼej ak yook chi jolomink! Laaʼex joʼ aj kʼanjel chiru li Yos teekʼe chi naweʼk. Joʼkan naq kʼehomaq resil, kʼehomaq resil, kʼehomaq resil li Awabʼej ut li Xʼawabʼejilal.» Kachʼin chik ma jun siʼeent chihabʼ anaqwan kiyeemank chaq aʼin. Ut rikʼin ebʼ li aatin aʼin, li hermaan Rutherford kixwaklesi xchʼool li xtenamit li Jehobʼa re naq teʼxpuktesi li chaabʼil esilal chirix li Xʼawabʼejilal li Yos toj saʼ xmaril li Ruuchichʼochʼ. Ut xooruuk xbʼaanunkil! Joʼ keʼxbʼaanu li xbʼeen aj paabʼanel, laaʼo yooko ajwiʼ xpuktesinkil li chaabʼil esilal chirix li Xʼawabʼejilal li Yos «rehebʼ chixjunil junsut junrubʼel choxa» (Col. 1:23). Kʼaru xqabʼaanu chiru li jun siʼeent chihabʼ aʼin chirix xkʼeebʼal chi naweʼk li Xʼawabʼejilal li Yos? Ut kʼaru tento tqabʼaanu re naq inkʼaʼ tqakanabʼ xkʼeebʼal li esil aʼin anaqwan naq yook chaq chi nachʼok jun siʼeent chihabʼ xkʼojlajik?
2. Chanru naxkʼe chi naweʼk ebʼ li qatasal hu, li Xʼawabʼejilal li Yos?
2 Qajultikaq li ak xbʼaanumank chaq. Ak najter naʼok chi puktesiik li Xʼawabʼejilal li Yos saʼebʼ li qatasal hu. Chalen chaq li chihabʼ 1939, yooko chaq roksinkil jun li nimla tasal hu li naxkʼabʼaʼi La Atalaya. Anunciando el Reino de Jehová. Li tasal hu aʼin naʼaatinak chirix li Xʼawabʼejilal li Yos ut li tixbʼaanu. Joʼkan ajwiʼ li tasal hu ¡Despertad! naxchʼolobʼ naq kaʼajwiʼ li Xʼawabʼejilal li Yos tixkʼam chaq li osobʼtesink saʼ xbʼeenebʼ li qas qiitzʼin. Jwal nasahoʼk saʼ qachʼool naq li wiibʼ chi tasal hu aʼin yook chi numsimank saʼ naabʼal chi aatinobʼaal ut yook chi jekʼimank saʼ chixjunil li ruuchichʼochʼ! (Apoc. 14:6.)
3. Yaabʼasi wiibʼ oxibʼ li naʼlebʼ li kiʼoksimank chaq re xkʼeebʼal chi naweʼk li Xʼawabʼejilal li Yos.
3 Li xtenamit li Jehobʼa naroksi jalan jalanq li naʼlebʼ re xkʼeebʼal chi naweʼk li Xʼawabʼejilal li Yos. Saʼ xtiklajik kiʼoksimank ebʼ li bʼelebʼaal chʼiichʼ rikʼin bʼosiin, xeʼxkʼe ebʼ li esil saʼ li raay ut joʼkan ajwiʼ keʼxkʼe jun laj puktesinel re naq tixkʼe chi eekʼank li disco. Ebʼ li naʼlebʼ aʼin kikʼanjelak re xkʼeebʼal chi naweʼk li chaabʼil esilal rehebʼ li qas qiitzʼin. Ut xeʼxbʼaanu aʼin naq moko naabʼalebʼ ta ebʼ laj puktesinel chirix li Xʼawabʼejilal li Yos (Sal. 19:5 [19:4, Wy]). Chiruhebʼ li chihabʼ aʼin wank naabʼal li naʼlebʼ saʼ jw.org, ut chi miyon ebʼ li qas qiitzʼin yookebʼ xnawbʼal chirix li Xʼawabʼejilal li Yos, ut yook chi wulak ajwiʼ saʼebʼ li tenamit bʼarwiʼ inkʼaʼ nekeʼraj naq tpuktesimanq li chaabʼil esilal.
4. Kʼaru li nimla naʼlebʼ yook chi bʼaanumank?
4 Li xtenamit li Jehobʼa kixkʼubʼ li nimla naʼlebʼ re xpuktesinkil chiʼus li Xʼawabʼejilal li Yos. Jun li eetalil chirix aʼin. Chalen chaq xyiijachil li chihabʼ 1990, moko kaʼaj tawiʼ nokoopuktesink chirekabʼlal, nokoopuktesink ajwiʼ saʼebʼ li parke, saʼebʼ li kʼayibʼaal joʼ ajwiʼ bʼarwiʼ nekeʼxaqli ebʼ li bʼelebʼaal chʼiichʼ. Tojeʼ xtiklaak jun li nimla kʼanjel chirix li puktesink saʼebʼ li nimla tenamit saʼ chixjunil li Ruuchichʼochʼ. Ut ak naabʼal li chʼuut yookebʼ xnaʼlebʼankil li puktesink aʼin saʼ li xteepebʼ. Nekeʼroksi li kʼanjelobʼaal ut ebʼ li meex bʼarwiʼ nekeʼxtus ebʼ li tasal hu ut nekeʼxkʼe ribʼ bʼarwiʼ nekeʼnumeʼk naabʼal li qas qiitzʼin. Usta yook chi bʼaanumank aʼin, inkʼaʼ naqakanabʼ xik chirekabʼlal xbʼaan naq aʼan li xnimal ru naʼlebʼ re xpuktesinkil li Xʼawabʼejilal li Yos (Hech. 20:20).
5. Kʼaru li kʼanjel tooruuq xbʼaanunkil saʼ li po Septiembre saʼ xtiklajik li qakʼanjel chiru li Yos?
5 Qakʼoxlaq li tkʼulmanq moqon. Chiru po Septiembre naq ttiklaaq li qakʼanjel chiru li Yos naabʼalebʼ teʼxtikibʼ xbʼaanunkil 70 hoonal saʼ li puktesink. Ut laaʼat, ma wanqat saʼ xyanqebʼ? Wi inkʼaʼ tatruuq, ma ak xaakʼoxla xbʼaanunkil 30 malaj 50 hoonal naq tixkʼe ribʼ chaawu? Wi tatruuq malaj inkʼaʼ tatruuq xbʼaanunkil li kʼanjel aʼin, li Jehobʼa tatrosobʼtesi wi junelik nakaasikʼ chanru tattzʼaqonq re xkʼeebʼal chi naweʼk li xʼawabʼejilal (Mal. 3:10).
6. Kʼaʼut wanq xwankil chiqu li po Octubre 2014?
6 Saʼ li po Octubre 2014 ttzʼaqloq ru jun siʼeent chihabʼ xkʼojlajik li Xʼawabʼejilal li Yos. Joʼkan naq, us naq li tasal hu La Atalaya re li po aʼin, li naqajekʼi rehebʼ li qas qiitzʼin, t-aatinaq chirix li Xʼawabʼejilal li Yos. Qakʼehaq qachʼool chi xjekʼinkil li tasal hu aʼin re chixjunilebʼ li qas qiitzʼin. Ut anaqwan naq yooko roybʼeninkil li tkʼulmanq, inkʼaʼ tqakanabʼ xpuktesinkil «li xChaabʼil Esil li xnimajwal awabʼejihom li Yos» rehebʼ li nekeʼraj qabʼinkil (Hech. 8:12).