Qoksihaq jw.org saʼ li puktesink

Li qanaʼaj saʼ Internet nakʼanjelak re xpuktesinkil li chaabʼil esilal «toj saʼ xmaril li ruuchichʼochʼ» (Hech. 1:8). Abʼanan, naabʼalebʼ li qas qiitzʼin inkʼaʼ nekeʼxnaw; abʼan teʼxnaw wi junaq laj puktesinel t-aatinaq chirix malaj tixkʼut chiruhebʼ.

Jun rehebʼ li cheekel winq li naʼulaʼanink chʼuut kixkʼe saʼ li xbʼoqlebʼaal chʼiichʼ li bʼideo Kʼaʼut Us naq Tattzoloq Chirix li Santil Hu? ut naxkʼut naq naxkʼe ribʼ chiru. Naq naxik chirekabʼlal, naxye: «Yookin chi ulaʼanink junpaataq re xtenqʼankilebʼ li qas qiitzʼin chi xsumenkil oxibʼ rehebʼ li xninqal ru patzʼom: Kʼaʼut wank naabʼal li chʼaʼajkilal? Chanru tixbʼaanu li Yos re xtuqubʼankil? Ut, naq toj maajiʼ nawulak xkutankil, kʼaru yooqo xbʼaanunkil? Li bʼideo aʼin usta moko najt ta roq naxsume li oxibʼ chi patzʼom». Chirix chik aʼan, naq naxkʼe chi eekʼank li bʼideo naril chanru nekeʼnaʼlebʼak. Saʼ xkʼabʼaʼ naq chʼinaʼus li bʼideo naabʼalebʼ nekeʼkanaak rilbʼal toj naq naraqeʼk. Chirix chik aʼan li hermaan naxye: «Joʼ xaakʼe reetal, naru nakaapatzʼ aatzolbʼal chirix li Santil Hu saʼ li qanaʼaj saʼ jw.org. Ut wi nakaawaj, naru ninkʼut chaawu chanru xbʼaanunkil». Wi naxkʼulubʼa, li hermaan naxkʼut chiru chanru natzolmank li Santil Hu rikʼin li tasal hu Li Chaabʼil Esil. Ut wi maakʼaʼ xhoonal, li hermaan naxyeechiʼi ribʼ re sutqʼiiq saʼ jun chik kutan. Ut joʼkan ajwiʼ naxbʼaanu naq nachunlaak chixkʼatq junaq li qas qiitzʼin bʼarwiʼ nekeʼkʼayink kape. Ut laaʼo? Ma yooko roksinkil li jw.org saʼ li puktesink?