Saʼebʼ li qakutan chʼinaʼus puktesink bʼarwiʼ nekeʼnumeʼk naabʼal li poyanam
1. Kʼaru yeebʼil rehebʼ li chʼuut li wankebʼ saʼebʼ li teep bʼarwiʼ nekeʼnumeʼk naabʼal li qas qiitzʼin?
1 Yeebʼil rehebʼ li chʼuut li nekeʼpuktesink saʼebʼ li naʼaj bʼarwiʼ nekeʼnumeʼk naabʼal li qas qiitzʼin naq teʼxkʼe li meex malaj junaq li karetiiy rikʼin ebʼ li qatasal hu. Wi t-oksimanq junaq li karetiiy, jun ajwiʼ laj puktesinel xaqxooq malaj chunchuuq chixkʼatq. Abʼan wi t-oksimanq li meex, wanq wiibʼaq aj puktesinel. Tento naq chixjunilebʼ teʼxkʼe xchʼool chi aatinak saʼ tuulanil ut seʼseʼaq ruhebʼ. Naq junaq li qas qiitzʼin tjiloq chixkʼatq li meex, jun rehebʼ laj puktesinel naru tixye: «Ma xaakʼoxla jun sutaq kʼaru naxye li Santil Hu chirix li naʼlebʼ aʼin?». Ut jun malaj wiibʼ yooqebʼ chi puktesink rikʼinebʼ li yooqebʼ chi numeʼk, abʼan inkʼaʼ teʼxik chi najt.
2. Chʼolobʼ junaq li eetalil li naxkʼut rusilal li puktesink aʼin rikʼin roksinkil ebʼ li meex.
2 Saʼ xkʼabʼaʼ li puktesink aʼin, naabʼalebʼ ak xeʼok xtzolbʼal li Santil Hu. Qakʼoxlaq aʼin, jun ixq li naxik saʼ li nimla tzolebʼaal kixtzʼiibʼa jun li kʼanjel chirixebʼ laj Testiiw re li Jehobʼa, abʼan maajun li Chʼutlebʼaal Kabʼl kixtaw. Naq ak xnumeʼk jun xamaan, kiril saʼ li nimla tzolebʼaal jun li meex rikʼin jalan jalanq li tasal hu. Kiʼok xtzolbʼal li Santil Hu ut anaqwan jun rehebʼ aj puktesinel li ak xsubʼ ribʼ saʼ haʼ ut natzʼaqonk ajwiʼ saʼ li puktesink aʼin.
3. Kʼaru nekeʼxkʼoxla ebʼ li nekeʼtzʼaqonk saʼ li puktesink aʼin?
3 Jun li hermaan ixq li natzʼaqonk saʼ li puktesink aʼin kixye: «Wankebʼ nekeʼchalk xpatzʼbʼal qe li akʼ tasal hu La Atalaya ut ¡Despertad! Ut wankebʼ maajunwa rabʼihomebʼ chirixebʼ laj Testiiw re li Jehobʼa. Rikʼin li puktesink aʼin naru naqakʼe chi naweʼk li yaal re naabʼal li qas qiitzʼin». Jun chik li qech aj paabʼanel ixq kixye: «Jalan li puktesink aʼin ut kʼajoʼ xchʼinaʼusal xbʼaan naq ebʼ li qas qiitzʼin nekeʼjilok chiqakʼatq usta yal re rilbʼal kʼaru naqayeechiʼi».
4. Kʼaʼut us naq inkʼaʼ tjalmanq xhoonal, xkutankil ut xnaʼaj li meex li naqoksi re puktesink?
4 Abʼanan, us naq inkʼaʼ tjalmanq xhoonal, xkutankil ut xnaʼaj li meex li naqoksi re puktesink. Chi joʼkan, ebʼ li qas qiitzʼin teʼkʼayq chi rilbʼal ut inkʼaʼ chʼaʼajkʼaq chiruhebʼ jilok chi xbʼaanunkil li patzʼom malaj xpatzʼbʼal junaq li tasal hu. Ma xkʼubʼ laachʼuut tzʼaqonk saʼ li puktesink aʼin? Kawresi aachʼool ut tzʼaqonk saʼ li puktesink aʼin li yook xkʼeebʼal chi naweʼk li Xʼawabʼejilal li Yos «toj saʼ xmaril li ruuchichʼochʼ» (Hech. 1:8).