Qoksihaq chiʼus li qahoonal saʼ li puktesink
Saʼ li qakʼanjel chiru li chihabʼ 2014 joʼ aj Testiiw re li Jehobʼa xqabʼaanu 1.945.487.604 li hoonal, aʼin naxkʼutbʼesi naq inkʼaʼ naqaj xkanabʼankil kʼanjelak chi kaw chiru li Jehobʼa (Sal. 110:3, Wy; 1 Cor. 15:58). Saʼ xkʼabʼaʼ naq «yo chi numeʼk li honal», us raj naq tooʼaatinaq rikʼin naabʼalebʼ chik li poyanam naq yooqo chi puktesink (1 Cor. 7:29).
Re naq tooruuq roksinkil chiʼus li qahoonal saʼ li puktesink, tento tookʼoxlaq chiʼus. Qakʼoxlaq aʼin, wi ak xnumeʼk jun hoonal malaj ak xqʼax jun hoonal ut toj maajiʼ nokooruuk chi aatinak rikʼin junaq li qas qiitzʼin, kʼaru raj tento tqabʼaanu re xtawbʼalebʼ? Yaal naq moko juntaqʼeet ta li junjunq chi teep, abʼan qilaq kʼaru li naʼlebʼ naru tooxtenqʼa chi roksinkil chiʼus li qahoonal, ut inkʼaʼ tookʼanjelaq chi maakʼaʼ rajbʼal (1 Cor. 9:26).
Li puktesink chirekabʼlal. Chiru naabʼal chihabʼ ebʼ laj puktesinel ak kʼaynaqebʼ chi xtikibʼankil li puktesink chirekabʼlal. Abʼanan, saʼ xkʼabʼaʼ naq naabʼalebʼ li poyanam nekeʼxik chi kʼanjelak chixjunil li kutan, us raj naq toopuktesinq chirekabʼlal naq ak xʼewu malaj naq ak xqʼoqyinoʼk. Saʼ li hoonal aʼin, ebʼ li qas qiitzʼin ak wankebʼ saʼ rochoch ut yookebʼ chi hilank. Joʼkan ajwiʼ, maare eqʼla us t-elq li qakʼanjel chirix li puktesink saʼebʼ li bʼe malaj saʼebʼ li kʼayibʼaal.
Toopuktesinq bʼarwiʼ nekeʼnumeʼk naabʼal li poyanam. Saʼebʼ li qateep re puktesink tento xkʼebʼal li meex ut li kʼanjelobʼaal bʼarwiʼ nekeʼnumeʼk naabʼal li qas qiitzʼin (chaawil li hu Li Qakʼanjel Chirix li Yos re Julio 2013 perel 5, saʼ kaxlan aatin). Wi saʼ junaq kutan moko naabʼalebʼ ta chik nekeʼnumeʼk saʼ li naʼaj aʼin, ebʼ li cheekel winq li nekeʼxkʼubʼ li kʼanjel chirix li puktesink teʼruuq xjalbʼal xnaʼaj li meex ut teʼxkʼe bʼarwiʼ nanumeʼk naabʼal li poyanam.
Rulaʼaninkil wiʼ chik ebʼ li poyanam ut xtzolbʼalebʼ. Wank li hoonal bʼarwiʼ inkʼaʼ naqatawebʼ li qas qiitzʼin. Maare raj us naq tqulaʼanihebʼ ut tqatzolebʼ li poyanam saʼ li hoonal aʼin. Jun li eetalil, wi chiru li Sabado eqʼla naqatawebʼ li qas qiitzʼin chirekabʼlal, us raj naq tqatzolebʼ ewu malaj naq yooq chi ok qʼoqyink. Ut wi saʼ bʼelebʼaal chʼiichʼ nokooxik chi ulaʼanink, maare us raj naq moko naabʼalaqo ta saʼ li junjunq chi bʼelebʼaal re naq bʼayʼus tqabʼaanu.
Usta yaal naq naqajla li hoonal li naqabʼaanu saʼ li puktesink, abʼan jwal tsahoʼq wiʼ chik saʼ li qachʼool wi tqatawebʼ li qas qiitzʼin. Wi saʼ junaq li hoonal inkʼaʼ tqatawebʼ li qas qiitzʼin, us raj naq tqajal qahoonal. Tijonqo chiru li Jehobʼa, «laj eechal qʼolom» re naq tooxtenqʼa chi roksinkil chiʼus li qahoonal saʼ li puktesink (Mat. 9:38).