Tzol chiʼus li puktesink, chanru xsumenkil junaq li qas qiitzʼin naq jwal yook xjosqʼil

Kʼaʼut aajel ru xbʼaanunkil. Saʼ li puktesink naqataw naabʼal li qas qiitzʼin li nekeʼsumenk saʼ usilal. Abʼanan, li Jesus ak kixye chaq naq wankebʼ xikʼ tooʼeʼril (Juan 17:14). Joʼkan naq, inkʼaʼ tooxuwaq naq teʼpoʼq qikʼin. Wi joʼkan raj tqakʼul, tento tqakʼoxla chiʼus chanru toosumenq re naq tqabʼaanu li nawulak chiru li Jehobʼa, li Yos li naqaloqʼoni ru (Rom. 12:17-21; 1 Ped. 3:15). Wi nokoosumenk chiʼus, inkʼaʼ tnimanq ru li aatin. Joʼkan ajwiʼ, us teʼaatinaq li yooqebʼ chi qilbʼal, ut chi joʼkan saʼ jun chik kutan teʼraj rabʼinkilebʼ laj Testiiw (2 Cor. 6:3).

Chanru xbʼaanunkil:

Matpoʼk saʼ junpaat ut seʼseʼaq aawu. Li naʼlebʼ aʼin ttenqʼanq qe re naq us wanqo. Maakʼoxla naq aawikʼin yook xjosqʼil li qas qiitzʼin (Ecl. 7:9). Maare wank xchʼaʼajkilal malaj laatzʼ ru naq xattʼokok. Ut wi napoʼk rabʼinkil li esil, maare inkʼaʼ naxnaw chi tzʼaqal kʼaru li esil nakaakʼam re (2 Cor. 4:4).
Aatinan saʼ tuulanil (Prov. 15:1). Ma xaawajsi? Ma xatwulak naq yook chi kʼanjelak? Yaal naq laaʼo joʼ aj Testiiw inkʼaʼ tqapatzʼ xkuybʼal qamaak re xbʼaanunkil li kʼanjel li tenebʼanbʼil saʼ qabʼeen. Abʼanan, maare naru nakaapatzʼ aakuybʼal wi laatzʼ ru naq xattʼokok. Ut wi yook xjosqʼil xbʼaan naq kirabʼi jun li tikʼtiʼ chiqix? Wi joʼkan, naru nakaaye re: «Nintaw ru kʼaʼut yook aajosqʼil. Abʼan moko yaal ta chixjunil li xaawabʼi chiqix. Wi nakaawaj naru tinchʼolobʼ chaawu?». Wi li qas qiitzʼin yook xjosqʼil xbʼaan naq saʼ li chʼuut naʼisiik junaq laj paabʼanel malaj naq inkʼaʼ naqakʼulubʼa li kikʼ, naru nakaaye re: «Yaal li nakaaye. Wankebʼ li qas qiitzʼin nekeʼxye ajwiʼ qe aʼin. Abʼan, ma naru ninkʼut chaawu rikʼin li Santil Hu kʼaʼut naqabʼaanu aʼin?».
Wi li qas qiitzʼin jwal yook xjosqʼil, maare us raj naq maakʼaʼ tqaye ut tooʼelq chiru. Ut wi tixye naq inkʼaʼ chik naraj naq t-ulaʼaniiq xbʼaanebʼ laj Testiiw re li Jehobʼa, taaye re, wi joʼkan naraj, joʼkan tqabʼaanu.

Yal xbʼaanunkil aʼin chiru jun po:

Naq yooqat xloqʼoninkil li Yos saʼ junajil joʼ junkabʼal teebʼaanu ebʼ li kʼutbʼesink chirix chanru xbʼaanunkil aʼin.
Naq ak xaachaqʼrabʼi junaq li qas qiitzʼin li jwal yook xjosqʼil, patzʼ re li naʼochbʼenink aawe chan raj ru xaasume chiʼus.