Tzol chiʼus li puktesink, taayeechiʼi li tasal hu Kʼaru naxchʼolobʼ?

Kʼaʼut aajel ru xbʼaanunkil. Li tasal hu Kʼaru naxchʼolobʼ? aʼan jun rehebʼ li kʼanjelobʼaal li naqoksi junelik saʼ li puktesink. Abʼan wi naqaj roksinkil re xtzolbʼalebʼ li qas qiitzʼin chirix li Santil Hu, xbʼeenwa tqayeechiʼi rehebʼ. Joʼkan naq, aajel ru naq tqakʼe qachʼool chi xtzolbʼal chiʼus chanru tqayeechiʼi saʼ li puktesink (Prov. 22:29). Wank naabʼal li naʼlebʼ re xbʼaanunkil, abʼan tento tqasikʼ li tkʼanjelaq saʼ li qateep.

Chanru xbʼaanunkil:

Bʼaanu jun li patzʼom re naq li poyanam traj rabʼinkil li naʼlebʼ li wank saʼ jun rehebʼ li tzolom li ak sikʼbʼil aabʼan. Maare tatruuq xsikʼbʼal jun rehebʼ li patzʼom li wank saʼ xtiklajik ebʼ li junjunq chi tzolom. Naq ak xaawabʼi li naxkʼoxla li poyanam, taayaabʼasi jun xraqal li Santil Hu ut, rikʼin wiibʼ oxibʼ li kʼasal, teetzʼil saʼ wiibʼal jun xraqal li tasal hu li naʼaatinak chirix li naʼlebʼ aʼin.
Jun chik li naʼlebʼ, taawoksi ebʼ li perel li wank saʼ xtiklajik re naq li poyanam traj rabʼinkil li esil ut taakʼut chiru saʼ li tasal hu kʼaru naxye li Santil Hu chirix li naʼlebʼ li yookex wiʼ chi aatinak. Jun li eetalil chirix aʼin, naq ak xat-aatinak chirix junaq li chʼaʼajkilal li yook chi abʼimank resil, naru nakaaye naq naabʼalebʼ li poyanam ak xeʼxbʼaanu ebʼ li patzʼom li wank saʼ li perel 3. Malaj taaye naq yookat rulaʼaninkilebʼ laawechkabʼal re xseeraqʼinkil rehebʼ li xsahilal li qoybʼenihom li tqakʼul saʼ li kutan chaalel. Kʼut chiru ebʼ li eetalil li wank saʼ li perel 4 ut 5, ut taapatzʼ re: «Bʼar wank rehebʼ li osobʼtesihom aʼin taawaj raj naq ttzʼaqloq ru?». Tatruuq ajwiʼ xyeebʼal naq yookat chi aatinak chirix wiibʼ oxibʼ li xnimal ru patzʼom li naqabʼaanu chiqajunilo. Taakʼut chiru ebʼ li patzʼom li wank saʼ xraqik li perel 6 ut taapatzʼ re, bʼar wank li jwal nawulak chiru.
Taayeechiʼi chi junajwa xtzolbʼal chirix li Santil Hu. Ut naru nakaaye re: «Yooko xyeechiʼinkil rehebʼ laawechkabʼal li tasal hu aʼin li nakʼanjelak re xtzolbʼal li Santil Hu. Ma ak aawilom li hu aʼin? [Kanabʼ naq tsumenq.] Wi wank bʼayaq aahoonal, naru tinkʼut chaawu chanru naʼoksimank re naq taatzol xsaʼ Laasantil Hu».

Yal xbʼaanunkil aʼin chiru jun po:

Saʼ xloqʼoninkil li Yos saʼ junajil joʼ junkabʼal, taawoksi li kʼutbʼesink re naq taatzol chanru xbʼaanunkil aʼin.
Naq tatxik chi puktesink, taayaabʼasi re laawech aj puktesinel kʼaru li aatin taawoksi rikʼinebʼ li poyanam naq taatikibʼ aatinak (Prov. 27:17). Wi nakaakʼe reetal naq moko us ta kʼubʼanbʼil, taajal.