Qoksihaq li tasal hu Li Chaabʼil Esil re kʼutuk
1. Chanru kʼubʼanbʼil li tasal hu Li Chaabʼil Esil?
1 Joʼ xqil saʼ li hu Li Qakʼanjel Chirix li Yos re li po Julio, jun rehebʼ li hu li nakʼanjelak re xkʼutbʼal li yaal chiruhebʼ li qas qiitzʼin aʼan li tasal hu Li Chaabʼil Esil li Nachalk Rikʼin li Yos. Saʼ li tasal hu aʼin, ebʼ li raqal li Santil Hu moko xkʼemank ta chi tzʼiibʼanbʼil re naq li tzolom tixsikʼ saʼ li Raatin li Yos. Usta yaal naq ebʼ li qatasal hu kʼubʼanbʼil re naq li qas qiitzʼin tixtzol ribʼ xjunes, li tasal hu aʼin kʼubʼanbʼil re naq junaq laj testiiw ttzoloq rehebʼ. Joʼkan bʼiʼ, naq tqayeechiʼi re li qas qiitzʼin, qakʼutaq chiru chanru xtzolbʼal li Santil Hu, ut chi joʼkan tixkʼe reetal naq chʼinaʼus xtzolbʼal li chaabʼil esil (Mat. 13:44).
2. Chanru tooruuq roksinkil li tasal hu Li Chaabʼil Esil naq naqulaʼani xbʼeen sut junaq li poyanam?
2 Naq taawulaʼani xbʼeen sut junaq li poyanam: Naru nakaaye: «Saʼ xkʼabʼaʼ chixjunil li esil li naqabʼi, naabʼalebʼ yookebʼ xkʼaʼuxl chirix li tkʼulmanq saʼ li kutan chaalel. Ut laaʼat kʼaru nakaaye ma t-usaaq tawiʼ chixjunil saʼ junaq kutan? [Kanabʼ naq tsumenq.] Ma nakaanaw naq li Santil Hu naxye naq t-usaaq saʼ junaq kutan? Li tasal hu aʼin naxkʼut wiibʼ oxibʼ li patzʼom li naxsume li Santil Hu». Taakʼe re li tasal hu aʼin ut taaye re naq tixsikʼ junaq rehebʼ li patzʼom li wank saʼ xraqik. Taakʼut chiru chanru natzolmank li Santil Hu rikʼin roksinkil li xbʼeen raqal re li tzolom li naxsume li patzʼom. Jun chik li naʼlebʼ, taakʼut chiru chanru natenqʼank li tasal hu aʼin chi xtawbʼal saʼ li Santil Hu li xsumenkil li patzʼom li xaawisi saʼ jun rehebʼ li tzolom. Wi saʼ jw.org wank jun li bʼideo li naʼaatinak chirix li tzolom li yookat xkʼutbʼal, naru nakaawoksi.
3. Chʼolobʼ chanru tqatzol junaq li poyanam rikʼin li tasal hu Li Chaabʼil Esil.
3 Chanru roksinkil re xtzolbʼalebʼ li poyanam: 1) Yaabʼasi li patzʼom li bʼonbʼil chiʼus, li wank jun li ajl chixkʼatq re naq li poyanam tril bʼar wank tzʼaqal xyaalal. 2) Chirix chik aʼan, taayaabʼasi li raqal. 3) Taayaabʼasi ebʼ li raqal li Santil Hu li wank chi qʼeqʼo ut taakʼoxla chiʼus kʼaru chik li patzʼom taabʼaanu re, chi joʼkan truuq xsumenkil rikʼin li Santil Hu li patzʼom li bʼonbʼil chiʼus. 4) Wi moko jun ta ajwiʼ li raqal wank re xsumenkil li patzʼom, taabʼaanu li naʼlebʼ li naxye saʼ li 2 ut saʼ li 3. Wi wank jun li bʼideo li naxsume li patzʼom aʼin, ut wi toj maajiʼ nakaakʼut chiru, naru nakaawoksi saʼ laatzolom. 5) Re xraqbʼal, taaye re li qas qiitzʼin naq tixsume li patzʼom, chi joʼkan chʼolchʼooq chaawu naq xtaw ru li yook xtzolbʼal.
4. Kʼaru tooxtenqʼa chi roksinkil chiʼus li tasal hu aʼin?
4 Tzol chiʼus chanru roksinkil li tasal hu ut taawoksi naq tixkʼe ribʼ chaawu. Naq taakawresi aawibʼ, taakʼoxla laatzolom ut taakʼoxla ajwiʼ chanru taawoksi ebʼ li xraqal li Santil Hu re naq taakʼe chi kʼoxlak (Prov. 15:28; Hech. 17:2, 3). Naq taanaw chik roksinkil chiʼus li tasal hu aʼin, t-alaaq saʼ laachʼool roksinkil re xtenqʼankilebʼ li qas qiitzʼin chi xnawbʼal li yaal.