Ebʼ li chʼutam re xik chi puktesink
1. Chanru nokooxtenqʼa ebʼ li chʼutam re xikʼ chi puktesink?
1 Saʼ jun kutan li Jesus kixchʼutubʼ ribʼ xbʼeenwa rikʼin wiibʼ oxibʼ rehebʼ li xtzolom tojaʼ naq kixtaqlahebʼ chi puktesink (Luc. 10:1-11). Kixwaklesihebʼ xchʼool rikʼin xjultikankil rehebʼ naq moko wankebʼ ta xjunes xbʼaan naq li Jehobʼa «laj Eechal qʼolom» wank rikʼinebʼ. Joʼkan ajwiʼ, kixkʼehebʼ xnaʼlebʼ re naq teʼxbʼaanu chiʼus li kʼanjel li keʼtenebʼaak saʼ xbʼeenebʼ ut kixkʼubʼebʼ re xtaqlankilebʼ saʼ «kaʼkabʼil». Saʼebʼ li qakutan, ebʼ li chʼutam chirix li puktesink naxwaklesi ajwiʼ qachʼool, naxkʼe qanaʼlebʼ ut nokooxkʼubʼ.
2. Chalen li po Abril, chiru jarubʼ kʼasal twanq li chʼutam re puktesink?
2 Ebʼ li chʼutam re xikʼ chi puktesink nawank chiru 10 ut 15 kʼasal. Nekeʼxkʼubʼ li chʼuut, nayeemank bʼar t-uxq xik ut nawank tijok. Abʼan chalen li po Abril, li chʼutam aʼin twanq chiru 5 ut 7 kʼasal. Ut wi li puktesink twanq naq xraqeʼk jun rehebʼ li qachʼutam moko najt ta chik twanq li chʼutam aʼin xbʼaan naq tojaʼ tooraqeʼq rabʼinkil li Raatin li Yos. Wi moko najt ta roq li chʼutam aʼin ebʼ laj puktesinel teʼruuq xkʼebʼal xkomon li hoonal saʼ li puktesink. Ut chi joʼkan ebʼ li nekeʼkʼamok bʼe saʼ li puktesink ut ebʼ laj puktesinel li eqʼla nekeʼxtikibʼ puktesink inkʼaʼ teʼxsach naabʼal xhoonalebʼ.
3. Chanru kʼubʼanbʼilaq li chʼutam re puktesink?
3 Li chʼutam re xik chi puktesink kʼubʼanbʼilaq chiʼus re xtenqʼankilebʼ laj puktesinel. Naabʼalebʼ laj paabʼanel li nekeʼwulak chiru naq nekeʼchʼutlaak saʼ jalan jalanq chi naʼajej, xbʼaan naq nachʼ nakanaak chiruhebʼ li chʼutam ut li teep re xik chi puktesink. Chi joʼkan moko chʼaʼaj ta xkʼubʼankilebʼ laj paabʼanel ut moko chʼaʼaj ta ajwiʼ chiruhebʼ li cheekel winq rilbʼalebʼ. Li chʼuut chi cheekel winq naxkʼoxla kʼaru us choʼq re li chʼuut abʼan xbʼeenwa naxkʼe reetal kʼaru naʼajmank. Naq twanq li tijok, aajel ru naq chixjunilebʼ teʼxnaw bʼar teetzʼaq puktesink ut ani t-ochbʼeninq rehebʼ.
4. Kʼaʼut li chʼutam re puktesink wank ajwiʼ xwankil?
4 Li chʼutam re xik chi puktesink wank ajwiʼ xwankil. Saʼ li chʼutam aʼin kaʼajwiʼ nekeʼkʼulunk li nekeʼelk chi puktesink abʼan moko chixjunilebʼ ta. Abʼanan, moko naraj ta xyeebʼal naq tbʼaanumanq saʼ junpaat malaj tkubʼsimanq xwankil. Chixjunil ebʼ li chʼutam aʼan xmaatan li Jehobʼa ut naxbʼaanu naq tqara qibʼ ut naq tqabʼaanu li chaabʼil kʼanjel (Heb. 10:24, 25). Joʼkan naq li teʼbʼeresinq re tento naq teʼxtzol ribʼ chiʼus re naq tixkʼe xloqʼal li Jehobʼa ut teʼxtaw rusilal li teʼrabʼi chaq. Li nekeʼelk chi puktesink aajel ru naq junelik teʼxkʼe xqʼe chi wank saʼ li chʼutam aʼin.
Li chʼutam chirix li puktesink inkʼaʼ tbʼaanumanq saʼ junpaat chi moko tkubʼsimanq xwankil
5. a) Kʼaru li kʼanjel naxbʼaanu li cheekel winq re xkʼubʼankil li chʼutam re puktesink? b) Chanru teʼxbʼeresi ebʼ li ixq li chʼutam aʼin?
5 Chanru naxkʼubʼ ribʼ li nabʼeresink rehebʼ li chʼutam. Re naq junaq laj paabʼanel tixkʼubʼ chiʼus junaq li kʼanjel choʼq re li chʼutam, tento xqʼaxtesinkil re chiru naabʼal kutan. Joʼkan ajwiʼ nakʼulmank rikʼin li chʼutam re puktesink. Naq ebʼ li chʼuut nekeʼxchʼutubʼ ribʼ sa jalan jalanq chi naʼajej, ebʼ li nekeʼjolomink chʼuut ut ebʼ li nekeʼtenqʼank rehebʼ, teʼxbʼeresi li chʼutam. Abʼan naq chixjunil li chʼuut naʼelk saʼ jun chi naʼajej, li cheekel winq li naxkʼubʼ li kʼanjel re puktesink tixye ani tixjolomi li chʼutam aʼin. Wankebʼ li cheekel winq nekeʼxkʼe li tustukil kʼanjel rehebʼ li xaqabʼanbʼilebʼ chi risinkil li chʼuut ut nekeʼxletz aʼin saʼ xnaʼaj li esil. Re naq teʼxtaw rusilal li chʼutam, aajel ru naq teʼxnaw kʼutuk ut kʼubʼank, joʼkan naq li cheekel winq li naxkʼubʼ li kʼanjel re puktesink tixsikʼ chiʼus ani tixxaqabʼ chi xbʼeresinkil li chʼutam aʼin. Wi saʼ junaq kutan maajun li cheekel winq ut maakʼaʼ ajwiʼ aj tenqʼanel malaj junaq li winq li ak xsubʼeʼk saʼ haʼ li tzʼaqlojenaq re risinkil li chʼuut, li cheekel winq li naxkʼubʼ li kʼanjel re puktesink tixxaqabʼ junaq ixq li ak xsubʼeʼk saʼ haʼ ut wank xnawom chi xbʼaanunkil li kʼanjel aʼin. (Chaawil bʼarwiʼ naxye «Wi ixq tbʼeresinq re li chʼutam».)
6. Kʼaʼut tento naq tixkʼubʼ ribʼ chiʼus li tbʼeresinq re li chʼutam?
6 Naq kʼebʼil qakʼanjel saʼ li chʼutam Tzolok chirix Xpuktesinkil li Chaabʼil Esilal malaj saʼ li chʼutam Tzolok chirix li Xkʼanjel li Yos naqakʼubʼ qibʼ chiʼus ut oxloqʼ chiqu li kʼanjel. Naq ak xwulak xkutankil li chʼutam, maare wiibʼ oxibʼ ajwiʼ teʼoq xsikʼbʼal saʼ junpaat chanru teʼxkʼubʼ li kʼanjel. Wi tooʼeʼxkʼe xbʼeresinkil li chʼutam chirix li puktesink, tento tqakʼe xloqʼal. Anaqwan naq moko najt ta roq li chʼutam, tento tqakʼubʼ qibʼ chiʼus re naq tqataw rusilal li tqatzol ut re naq traqeʼq saʼ xhoonalil. Xkʼubʼankil qibʼ chiʼus naraj xyeebʼal naq ak naqanaw bʼar tooxik chi puktesink naq ttiklaaq li chʼutam aʼin.
7. Chirix kʼaru tooʼaatinaq saʼ junaq li chʼutam re xik chi puktesink?
7 Chirix kʼaru tooʼaatinaq. Saʼ xkʼabʼaʼ naq moko juntaqʼeet ta li junjunq chi naʼajej, li moosej tiik xchʼool moko kixkʼubʼ ta junaq li naʼlebʼ choʼq re li junjunq chi chʼutam aʼin. Wank wiibʼ oxibʼ li naʼlebʼ chirix aʼin saʼ li kaaxukuut «Chirix kʼaru tooʼaatinaq saʼ li chʼutam re puktesink». Saʼebʼ li qachʼutam tyeemanq rehebʼ laj paabʼanel naq naru nekeʼtzʼaqonk. Wank sut naru xbʼaanunkil junaq li kʼutbʼesink malaj rilbʼal junaq li bʼideo li wank saʼ jw.org li tooxtenqʼa saʼ li puktesink. Naq tixkʼubʼ ribʼ li tbʼeresinq re li chʼutam tento tixkʼoxla kʼaru li naʼlebʼ tixwaklesihebʼ xchʼool ut tixtenqʼahebʼ li teʼelq chi puktesink.
Naq tixkʼubʼ ribʼ li tbʼeresinq re li chʼutam tento tixkʼoxla kʼaru tixwaklesihebʼ xchʼool ut kʼaru li naʼlebʼ ttenqʼanq rehebʼ li teʼelq chi puktesink
8. Chirix kʼaru naru nokooʼaatinak saʼ li chʼutam re puktesink chiru li kutan Sabado ut Domingo?
8 Chiruhebʼ li kutan Sabado naabʼalebʼ laj puktesinel nekeʼxyeechiʼi li tasal hu La Atalaya ut ¡Despertad! Wi moko wank ta saʼ li qaatinobʼaal ebʼ li tasal hu aʼin, tento tqayeechiʼi saʼ li teep bʼarwiʼ nekeʼaatinak saʼ kaxlan aatin ut wi maakʼaʼ junaq li chʼuut li naʼilok re. Joʼkan naq maare us raj naq tqayeechiʼi kaʼajwiʼ ebʼ li hu li wank saʼ li qaatinobʼaal. Ut naabʼal rehebʼ laj paabʼanel li nekeʼelk chiru li Sabado inkʼaʼ nekeʼruuk chi elk saʼ tiikil kutan, joʼkan naq maare nachʼaʼajkoʼk chiruhebʼ xjultikankil chanru xyeechiʼinkil li tasal hu li xeʼxtzʼil naq xeʼtzolok saʼ junajil joʼ junkabʼal. Joʼkan naq, us raj naq li hermaan li tixbʼeresi li chʼutam tixjultika chanru tyeechiʼimanq ebʼ li tasal hu li wank saʼ raqik li hu Li Qakʼanjel Chirix li Yos. Jun chik rehebʼ li naʼlebʼ maare us raj naq xkʼoxlankil chanru tqachap li naʼlebʼ li wank saʼ raqik li hu Li Qakʼanjel Chirix li Yos rikʼin junaq li esil, li kʼanjel malaj junaq li ninqʼe li naʼuxmank saʼ li teep. Joʼkan ajwiʼ tooruuq xyeebʼal chanru tqakʼubʼ qibʼ re rulaʼaninkil junaq li qas qiitzʼin li xkʼul li tasal hu La Atalaya ut li ¡Despertad! Ut wi saʼ xyanqebʼ laj puktesinel wank junaq laj puktesinel li ak yook xyeechiʼinkil li tasal hu La Atalaya ut li ¡Despertad! re li po aʼin, naru tixye rikʼin wiibʼ oxibʼ li aatin junaq li naʼlebʼ joʼ chanru tqayeechiʼi malaj tixseeraqʼi kʼaru li chaabʼil naʼlebʼ kixtaw. Joʼkan ajwiʼ tooruuq xbʼaanunkil saʼ li Domingo rikʼin ebʼ li tasal hu li naqayeechiʼi chiru jun po. Saʼebʼ li chʼutam chirix li puktesink naru ajwiʼ xyeebʼal chanru xyeechiʼinkil wiibʼ oxibʼ li tasal hu joʼ ebʼ li tasal hu Li Chaabʼil Esil ut Chaapaabʼ li Yos malaj li tasal hu Kʼaru Naxchʼolobʼ? li naqayeechiʼi yalaq kʼaru kutan ut li naqatzolebʼ wiʼ ebʼ li qas qiitzʼin.
9. Naq li chʼuut yooq chi tzʼaqonk saʼ jun li nimla kʼanjel, chirix kʼaru naru naʼaatinak chiru li Sabado ut li Domingo saʼ li chʼutam re puktesink?
9 Naq yooq chi tzʼaqonk li chʼuut saʼ jun li nimla kʼanjel, chiru li Sabado ut Domingo naru raj xtzʼilbʼal rix chanru tqayeechiʼi ebʼ li tasal hu La Atalaya ut ¡Despertad! rochbʼen li tratado malaj li hu li yooko xjekʼinkil malaj kʼaru tqabʼaanu wi junaq li qas qiitzʼin xwulak chiru li esil. Jun chik li naʼlebʼ li naruhank xbʼaanunkil aʼan xseeraqʼinkil junaq li chaabʼil naʼlebʼ li naxkʼutbʼesi naq li nimla kʼanjel wank xwankil.
10, 11. Kʼaʼut aajel ru naq ebʼ laj puktesinel teʼxkʼubʼ ribʼ choʼq re li chʼutam?
10 Chanru teʼruuq xkʼubʼankil ribʼ ebʼ laj puktesinel. Re naq us t-elq li chʼutam, aajel ru naq teʼwulaq ebʼ laj puktesinel. Wi nekeʼxkʼubʼ ribʼ xbʼeenwa, maare naq teʼtzoloq saʼ junajil joʼ junkabʼal, us teʼsumenq saʼ li chʼutam re xik chi puktesink. Re naq kʼubʼanbʼilaqo chiʼus tento naq wanq qikʼin ebʼ li tasal hu li tqoksi saʼ li puktesink naq toj maajiʼ natiklaak li chʼutam. Chi joʼkan inkʼaʼ toobʼayq chi wulak saʼ li teep.
11 Aajel ajwiʼ ru naq tqakʼe qachʼool chi wulak saʼ li chʼutam naq wiibʼ oxibʼ kʼasal chik ma natiklaak, joʼ naqabʼaanu rikʼin ebʼ li qachʼutam. Wi ewu nokoowulak, naru naqalatzʼebʼ ru malaj tqajukʼ li ak xkʼubʼamank. Chanru tqabʼaanu aʼin? Laj paabʼanel li naxbʼeresi li chʼutam naxkʼoxla xbʼeenwa chanru teʼkʼanjelaq ebʼ laj paabʼanel. Qakʼoxlaq aʼin, wi moko naabʼalebʼ ta li wankebʼ saʼ li chʼutam, maare tixtaqla chixjunilebʼ laj puktesinel saʼ jun chi teep li toj maajiʼ nachoymank xpuktesinkil. Ut wi najt nakanaak li naʼaj, maare tixtaqlahebʼ li maakʼaʼaʼebʼ xbʼelebʼaal chʼiichʼ chirixebʼ li wankebʼ xbʼelebʼaal. Joʼkan ajwiʼ, wi xiwxiw li naʼaj bʼarwiʼ toopuktesinq, maare tixye rehebʼ laj puktesinel winq naq teʼpuktesinq chixkʼatq malaj rochbʼenebʼ laj puktesinel ixq. Wi yaj junaq laj puktesinel, maare tixtaqla saʼebʼ li ochoch li wank chire bʼe re naq inkʼaʼ yooq chi taqsink ut chi kubʼeek. Malaj tixye rehebʼ li nekeʼxnaw puktesink naq teʼrochbʼeni li toj akʼebʼ. Abʼan, wi ewu nokoowulak, li hermaan tixjal wiʼ chik li rochbʼenebʼ laj paabʼanel ut tixjal li ak xkʼubʼ. Yaal, maare chiqajunilo ak qakʼulum, naq wank sut ewu nokoowulak saʼ xkʼabʼaʼ junaq li naʼlebʼ li inkʼaʼ yooko roybʼeninkil. Abʼanan, wi junelik naqabʼaanu aʼin, us xkʼoxlankil naq maare inkʼaʼ chik oxloqʼ chiqu ebʼ li chʼutam re puktesink malaj aajel ru naq tqakʼubʼ qibʼ chiʼus.
12. Wi laaʼo jun rehebʼ li kʼaynaqebʼ chi elk rikʼin jun ajwiʼ li rech aj paabʼanel, kʼaru us tqabʼaanu?
12 Maare wankebʼ aj puktesinel ak xeʼxkʼoxla rikʼin ani teʼkʼanjelaq malaj teʼroybʼeni naq li hermaan tixsikʼ rikʼin ani teʼelq. Abʼan wi laaʼo jun rehebʼ li kʼaynaqebʼ chi elk rikʼin jun ajwiʼ li rech aj paabʼanel, us raj naq toopuktesinq rikʼin jalan chik (2 Cor. 6:11-13). Ut naq tixkʼe ribʼ chiqu, tooʼelq chi puktesink rikʼinebʼ li akʼ ut tqatenqʼahebʼ chi kʼutuk chiʼus (1 Cor. 10:24; 1 Tim. 4:13, 15). Qakʼehaq qachʼool chi rabʼinkil chixjunil li tyeheʼq qe saʼ li chʼutam joʼ ajwiʼ li naʼaj bʼarwiʼ tqatikibʼ puktesink. Naq ak xraqeʼk li chʼutam, inkʼaʼ tqajal li ak xkʼubʼamank ut tooxik saʼ junpaat saʼ li teep.
13. Wi chiqajunilo tqakʼubʼ qibʼ, chanru tqataw rusilal li chʼutam chirix li puktesink?
13 Ebʼ li tzolom li kixtaqlahebʼ li Jesus chi puktesink, keʼsutqʼiik chi «sahebʼ saʼ xchʼool» (Luc. 10:17). Us kiʼelk li kʼanjel xbʼaan naq li Jesus xbʼeenwa kichʼutlaak rikʼinebʼ. Joʼkan ajwiʼ nakʼulmank rikʼin li qachʼutam chirix li puktesink. Wi chiqajunilo tqabʼaanu aʼin, ebʼ li chʼutam aʼin tixwaklesi qachʼool, tixkʼe qanaʼlebʼ ut tooxtenqʼa chi xkʼubʼankil qibʼ chirix li kʼanjel re «xchʼolobʼankil li yaal chiruhebʼ chixjunil li tenamit» (Mat. 24:14).